༢༠༡༣ ཟླ་ ༩ ཚེས་ ༡༨ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༩ ཚེས་ ༡༧ ཉིན་གྱི་སྔ་དྲོ་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཅེཀ་སྤྱི་མཐུན་རྒྱལ་ཁབ་ཀྱི་རྒྱལ་སར་རྟེན་གཞི་བྱས་པའི་ཞུ་ཕིན་ཚོགས་ཁང་ཆེན་མོའི་གསར་འགོད་ལྷན་ཚོགས་ཁང་ནང་སྐུ་ཞབས་ཐོ་མི་སི་སྣེ་ཁྲིད་འོག་གསར་འགོད་པ་ལྔ་བཅུ་བརྒལ་བ་ལྷན་འཛོམས་ཐོག་གསར་འགོད་པ་ཚོས་བོད་རྒྱའི་འབྲེལ་བའི་འཕེལ་རིམ་དང་རྒྱ་ནག་གཞུང་གི་འགོ་ཁྲིད་གསར་པ་ཚོས་འགན་ཁུར་བླངས་རྗེས་བཟང་ཕྱོགས་ཀྱི་འགྱུར་བ་ཞིག་ཡོང་རྒྱུར་བོད་ཀྱི་༸སྐྱབས་མགོན་ཏཱ་ལའི་བླ༌མ་མཆོག་གིས་ཐུགས་རེ་མཛད་ཀྱི་ཡོད་མེད་ཐོག་གི་དྲི་བར་མགོན་པོ་གང་ཉིད་མཆོག་གིས་བཀའ་ལན་སྩལ་དོན།
ད་ལྟའི་དྲི་བ་འདི་སྲིད་དོན་གྱི་སྐོར་རེད་འདུག ངོས་རང་ཕྱི་ལོ་ ༢༠༡༡ ནས་ཆབ་སྲིད་ཀྱི་ལས་གནས་ནས་རྒས་ཡོལ་ཞུས་ཏེ་མི་དམངས་ནས་འོས་འདེམས་བྱས་པའི་ཆབ་སྲིད་ཀྱི་འགོ་ཁྲིད་ཚོར་རྩིས་སྤྲོད་བྱས་པ་ཡིན། ངོས་ཀྱིས་མང་གཙོའི་འགྲོ་སྟངས་ཀྱི་ལམ་ལུགས་དེ་ལེགས་ཤོག་ལ་ངོས་འཛིན་བྱེད་བཞིན་ཡོད། དེང་སྐབས་ངོས་ལ་ཆབ་སྲིད་ཀྱི་ལས་འགན་གང་ཡང་མེད། འོན་ཀྱང་ཏཱ་ལའི་བླ་མ་སྐུ་ཕྲེང་རིམ་བྱོན་དང་བོད་མི་དམངས་ཀྱི་འབྲེལ་བ་ཁ་བྲལ་ཐབས་མེད་པའི་གནས་སུ་ཡོད། སྤྱིར་བཏང་ངོས་རང་བོད་མི་ཞིག་ཡིན་པའི་འོས་འགན་བླངས་ཏེ་ཞུས་ན། ཕྱི་ལོ་ ༡༩༧༠ དང་ ༨༠ ནང་ང་ཚོས་རྒྱ་ནག་གཞུང་ལ་འབྲེལ་བ་བྱས་ཡོད་པ་མ་ཟད། མཁས་དབང་དང་ཤེས་ཡོན་ཅན་ཚོར་ཡང་འབྲེལ་བ་བྱས་ཡོད། འོན་ཀྱང་སྐབས་དེར་རྒྱ་ནག་མི་དམངས་ཁྲོད་འབྲེལ་བ་གཏིང་ཟབ་པོ་བྱུང་མེད་ལ་དེ་ཙམ་དོ་སྣང་བྱེད་མཁན་ཡང་བྱུང་མེད། གནམ་བདེ་སྒོ་མོའི་དོན་རྐྱེན་བྱུང་རྗེས་རྒྱ་ནག་གཞུང་དང་ང་ཚོའི་དབར་གྱི་འབྲེལ་བ་རྒྱང་རིང་དུ་ཕྱིན་ཡོད། འོན་ཀྱང་རྒྱ་ནག་མི་དམངས་དང་ཤེས་ཡོན་ཅན་གྱི་ཁྲོད་ནས་བོད་ཀྱི་གནད་དོན་ལ་དོ་སྣང་དང་རྒྱབ་སྐྱོར་བྱེད་མཁན་ཇེ་མང་དུ་ཕྱིན་ཡོད། དེ་ནི་བཟང་ཕྱོགས་ཀྱི་འགྱུར་བ་ཞིག་རེད། ངོས་ཀྱིས་མི་དམངས་ཀྱི་རྒྱབ་སྐྱོར་ཧ་ཅང་གལ་ཆེན་པོ་རྩི་བཞིན་ཡོད།
མང་གཙོ་ནི་དེ་བས་ཀྱང་གལ་འགངས་ཆེན་པོ་བརྩིས་དང་རྩི་མུས་ཡིན། དེ་བཞིན་རྒྱ་ནག་གཞུང་གི་འགོ་ཁྲིད་གསར་པ་ཚོས་བཟང་ཕྱོགས་ཀྱི་འགྱུར་བ་ཞིག་གཏོང་རྒྱུར་རེ་བ་བྱེད་བཞིན་ཡོད། གང་ལ་ཞེ་ན། ངོས་ཀྱི་རྒྱ་རིགས་གྲོགས་པོ་ཚོས་གསུང་དོན་ལྟར་ན། རྒྱ་ནག་གཞུང་གི་འགོ་ཁྲིད་གསར་པ་ཚོར་དུས་ད་ལྟ་བར་དུ་བོད་མིའི་ཐོག་ལག་བསྟར་བྱས་པའི་སྲིད་བྱུས་དེ་རན་གྱི་མེད་པའི་ཚོར་སྣང་ཡོད་པ་འདྲ་འདུག ཅེས་བརྗོད་མཁན་བྱུང། དེ་བཞིན་ཞི་ཅིན་ཕིང་གིས་ལྐོག་ཟ་རུལ་སུངས་བཀག་འགོག་གིས་སྲིད་བྱུས་དངོས་སུ་ལག་བསྟར་བྱས་པ་ནི་བསྔགས་བརྗོད་ཞུས་འོས་པ་ཞིག་རེད། སྤྱིར་བཏང་གསར་འགོད་པ་ཁྱེད་རྣམས་ནི་མི་དམངས་ཀྱི་བསམ་བློའི་གོ་རྟོགས་གོང་འཕེལ་གཏོང་མཁན་གྱི་བརྒྱུད་ལམ་ཡག་ཤོས་དེ་རེད། དེར་བརྟེན་གླང་ཆེན་གྱི་སྣ་ཆོག་ལྟར་བརྐྱངས་ཏེ་རྒྱབ་མདུན་ངོ་ལྐོག་མེད་པའི་ཐོག་ནས་གནས་ཚུལ་ཚང་མ་མཁོ་སྒྲུབ་བྱ་རྒྱུ་ཧ་ཅང་གལ་ཆེན་པོ་ཡིན། ཞེས་བཀའ་ལན་སྩལ་འདུག་པ་བཅས། །
