༢༠༡༣ ཟླ་ ༨ ཚེས་ ༢༠ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༨ ཚེས་ ༡༨ ཉིན་རྒྱ་གར་ལྷོ་ཕྱོགས་སྦེང་ལོར་བོད་ཁྱིམ་དུ་བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་མཆོག་གིས་བཙན་བྱོལ་བོད་མིའི་མཐོ་རིམ་སློབ་མ་རྣམས་ཀྱི་འོས་འགན་དང་བླང་དོར་གྱི་སྐོར་གསུང་བཤད་གནང་དོན། ད་ཐེངས་བོད་ཁྱིམ་འགན་འཛིན་གྱི་སྙན་ཞུའི་ནང་མཐོ་རིམ་སློབ་མའི་འོས་འགན་ཞེས་གསལ་ཡོད་པ་དེར་སེམས་ཚོར་ཆེན་པོ་བྱུང་། དེང་དུས་ཀྱི་སྤྱི་ཚོགས་ཁྲོད་དུ་ཐོབ་ཐང་རྩོད་པ་ལས་འོས་འགན་སྐོར་ཤོད་མཁན་ཧ་ཅང་ཉུང་ཉུང་ཡིན།
ཐེངས་འདིར་བོད་ཁྱིམ་འགན་འཛིན་གྱི་སྙན་ཞུའི་ནང་འོས་འགན་སྐོར་གསུང་རོགས། ཞེས་གསལ་པ་དེ་ནི་ཡ་རབས་བཟང་སྤྱོད་དང་མཐུན་པ་ཞིག་ཆགས་ཡོད། བཙན་བྱོལ་བོད་མིའི་སློབ་མ་ཚོའི་འོས་འགན་ཆེ་ཤོས་ནི་རང་དབང་ཅན་གྱི་བསམ་བློའི་ཐོག་རང་གིས་བརྟག་དཔྱད་བྱས་ནས་རང་ཐག་རང་གཅོད་ཀྱིས་ཕུགས་འདུན་སྒྲུབ་དགོས་པ་དེ་ཡིན། རང་དབང་ངང་རྒྱུ་མཚན་ལྡན་པའི་བསམ་བློ་གཏོང་བ་ནི་ཤེས་བྱ་ཀུན་གྱི་ལྡེ་མིག་ལྟ་བུ་ཆགས་ཡོད།
ང་ཚོར་དལ་འབྱོར་ཚང་ཞིང་ལེགས་ཉེས་བླང་དོར་འབྱེད་ཤེས་བའི་མི་ཞིག་ཡིན་པའི་ཆ་ནས། དེ་དང་མཐུན་པའི་འཚོ་བ་ཞིག་སྐྱེལ་དགོས་པ་ལས། དེ་མིན་གང་བྱུང་གིས་ཉིན་རེའི་ལྟོ་གོས་སྡོད་གནས་ཙམ་དུ་མི་ཚེ་སྐྱེལ་བ་ནི་དུད་འགྲོ་དང་གཅིག་པ་ཡིན་པས་ངེས་པར་དུ་མི་ལུས་རིན་ཆེན་གྱི་རིན་ཐང་དང་། དོན་སྙིང་རྟོགས་ཏེ་མི་ཚེ་བསྐྱལ་རྒྱུ་གལ་ཆེན་ཡིན། ཞེས་སོགས་ཀྱི་གསུང་བཤད་དང་སློབ་ཕྲུག་ཚོའི་དྲི་བར་ལན་འདེབས་གནང་ཡོད་འདུག
