༢༠༡༣ ཟླ་ ༨ ཚེས་ ༥ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༨ ཚེས་ ༤ ཉིན་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་ཨི་ཊ་ལི་ཁུལ་གནས་སྡོད་བོད་རིགས་རྣམས་ལ་རྒྱ་གར་ནང་གི་བོད་མིའི་གཞིས་ཆགས་སྐྱོ་ཁག་སྲ་བརྟན་ཐུབ་ཐབས་ཆེད་རྒྱབ་སྐྱོར་གནང་རྒྱུའི་འགན་ཆེ་ཙམ་འཁྱེར་དགོས་པའི་འབོད་སྐུལ་ཞུས་འདུག
དེ་ཡང་བཀའ་བློན་མཆོག་ནང་སྲིད་བཀའ་བློན་དུ་བསྐོ་གཞག་གནང་རྗེས་ཕྱི་རྒྱལ་དུ་གཞུང་འབྲེལ་ཕྱོགས་ཕེབས་ཐོག་མའི་སྐབས་འདིར། ཨི་ཊ་ལིའི་རྒྱལ་ས་རོམ་དང། གྲོང་ཁྱེར་མི་ལཱན། ལྷོ་ཊེ་རོལ་ཁུལ་དུ་གནས་སྡོད་བོད་རིགས་རྣམས་ལ་བཀའ་ཤག་སྐབས་བཅུ་བཞི་པའི་ལས་འཆར་ནང་ནུབ་ཕྱོགས་ཡུལ་གྲུར་གནས་སྡོད་བྱེད་བཞིན་པའི་བོད་རིགས་རྣམས་ཀྱིས་རྒྱ་གར་ནང་གི་གཞིས་ཆགས་སྐྱོ་ཁག་ལ་རོགས་སྐྱོར་གྱི་་གཞིས་ཆགས་སྲ་བརྟན་ཡོང་རྒྱུའི་ལས་གཞིའི་སྐོར་ངོ་སྤྲོད་དང་འབྲེལ་བཀའ་བློན་མཆོག་གིས་གསུང་དོན། ལས་གཞི་འདི་ནི་ཆིག་སྒྲིལ་དང། གསར་གཏོད། རང་ཁ་རང་གསོ་བཅས་བཀའ་ཤག་གི་ལྟ་གྲུབ་གསུམ་གཞིར་བཞག་ཐོག་ནུབ་ཕྱོགས་དང་རྒྱ་གར་དུ་རྟེན་གཞི་བྱས་པའི་བཙན་བྱོལ་བོད་མིའི་གཞིས་ཆགས་དབར་འབྲེལ་ལམ་ཤུགས་ཆེ་རུ་གཏོང་རྒྱུའི་ལས་གཞི་དང་འབྲེལ་བ་ཆགས་ཡོད། ད་སྐབས་ལས་གཞི་འདི་བཞིན་བོད་མིའི་སྒྲིག་འཛུགས་ཀྱིས་གཞིས་ཆགས་ཁག་ ༡༠ ཐོག་ལག་བསྟར་གནང་འཆར་ཡོད། ཅེས་གསུངས་ཡོད།
སྐབས་དེར་བྷོལ་ཛ་ནོར་གནས་སྡོད་བྱེད་བཞིན་པའི་བོད་མི་བདུན་གྱིས་རྒྱ་གར་ནང་གི་བོད་མིའི་རྒན་གསོ་ཁང་གི་རྒས་ཁོག་བརྒྱད་ལ་རོགས་རམ་གནང་རྒྱུའི་ཁས་ལེན་གནང་ཡོད་པ་མ་ཟད། ཨི་ཊ་ལིར་གནས་སྡོད་བྱེད་བཞིན་པའི་བོད་མི་གྲངས་འབོར་ཉུང་ཤས་ལས་མེད་ཀྱང་གཞིས་ཆགས་སྲ་བརྟན་གྱི་ལས་གཞི་དེར་རྒྱབ་སྐྱོར་ཤུགས་ཆེ་ཡོད་པའི་རྣམ་པ་བསྟན་ཡོད། ནང་སྲིད་ལས་ཁུངས་ཀྱི་ཁབ་ཁོངས་འོག་རྒྱ་བལ་འབྲུག་གསུམ་དུ་བོད་མི་གཞིས་ལས་ཁང་ ༤༦ དང། གཞིས་ཆགས་ཆེ་ཁག་དང་ཁ་ཐོར་གཞིས་ཁག ༧༡། སོ་ནམ་གཞིས་ཁག་ཆེ་བ་ ༡༢། སོ་ནམ་གཞིས་ཁག་ཆུང་བ་ ༢༡། མཉམ་འབྲེལ་སྒྲིག་འཛུགས་ཁག་ ༢༠། རུམ་བཟོ་ཁག་ ༢༠ སོགས་ཡོད།
དེ་བཞིན་ཕྱི་ཟླ་ ༨ ཚེས་ ༢ ཉིན་བཀའ་བློན་མཆོག་གིས་ཨི་ཊ་ལིའི་རྒྱལ་ས་རོམ་དུ་ཨི་ཊ་ལིའི་གྲོས་ཚོགས་འཐུས་མི་ལྕམ་སྐུ་ཕེ་ཌི་རི་ཀ་མོ་གྷི་རི་ནི་(Ms Federica Mogherini) ལགས་དང་ལྕམ་སྐུ་སིལ་ཝི་ཡ་ཕེརེཀ་གྷོ་ལེནཊ་(Ms Silvia Fregolent) ལགས་རྣམ་གཉིས་དང་ལྷན་མཇལ་འཕྲད་གནང་ཡོད།
སྐབས་དེར་ནང་སྲིད་བཀའ་བློན་མཆོག་གིས་བོད་ནང་དུ་དེང་སྐབས་རང་ལུས་མེར་སྲེག་སྐོར་ངོ་སྤྲོད་གནང་སྐབས། རྒྱ་ནག་གཞུང་གི་དབང་བསྒྱུར་འོག་བོད་མི་ཚོས་རང་གི་དཀའ་སྡུག་ཕྱིར་འདོན་ཆེད་རང་ལུས་མེར་སྲེག་གཏོང་རྒྱུ་ལས་གདམ་ཁ་གཞན་མེད་པའི་ཛ་དྲག་གི་གནས་སྟངས་ཆགས་ཡོད་སྐོར་འགྲེལ་བརྗོད་གནང་བ་མ་ཟད། རང་ལུས་མེར་སྲེག་གཏོང་མཁན་བོད་མི་ཚོས་ལུས་ལ་མེ་འབར་བཞིན་དུ་ལག་གཉིས་ཐལ་མོ་སྦྱར་ནས་བོད་དོན་ལ་རྒྱལ་སྤྱིས་རྒྱབ་སྐྱོར་གནང་རོགས། ཞེས་སོགས་ཀྱི་འབོད་སྐུལ་ཞུ་བཞིན་ཡོད། དེར་བརྟེན་རྒྱལ་སྤྱིའི་སྤྱི་ཚོགས་ཀྱི་བོད་མིའི་འབོད་སྒྲ་དེར་རྒྱབ་སྐྱོར་ངེས་པར་དུ་གནང་དགོས། ཞེས་གསུངས།
ཕྱོགས་མཚུངས་ལྕམ་སྐུ་ཕེ་ཌི་རི་ཀ་མོ་གྷི་རི་ནི་ལགས་ཀྱིས་བོད་མི་ཚོས་འཚེ་མེད་ཞི་བའི་ཐབས་ལམ་ཐོག་ནས་ལས་འགུལ་སྤེལ་བཞིན་པ་དེར་རྒྱབ་སྐྱོར་བྱེད་རྒྱུ་ང་ཚོའི་ལས་འགན་ཡིན་པ་དང། བོད་ནང་གི་ཛ་དྲག་གནས་སྟངས་སྐོར་དུས་ཐོག་གནས་ཚུལ་འབྱོར་རྒྱུའི་མཐུན་འགྱུར་བསྐྲུན་པར་བསྔགས་བརྗོད་ཀྱང་གནང་ཡོད།
གཞན་ཡང་ནང་སྲིད་བཀའ་བློན་མཆོག་གིས་རེ་ཌི་ཀལ་ཆབ་སྲིད་ཚོགས་པའི་ (Radical Party) ཚོགས་གཙོ་སྐུ་ཞབས་མར་ཀོ་པན་ནི་ལ་མཆོག་དང་མཇལ་འཕྲད་གནང་ཡོད།
ཕྱི་ཚེས་ ༥ ཉིན་ནང་སྲིད་བཀའ་བློན་མཆོག་གིས་ཨི་ཊ་ལིའི་རང་སྐྱོང་མངའ་ཁུལ་ལྷོ་ཊེ་རོལ་གྱི་གྲོང་ཁྱེར་བྷོལ་ཛ་ནོ་དང་ཊེ་རེན་ཊོའི་གཞུང་འབྲེལ་མི་སྣ་ཁག་གཅིག་མཇལ་འཕྲད་གནང་རྒྱུ་མ་ཟད། ཕྱི་ཚེས་ ༦ ཉིན་ནང་སྲིད་བཀའ་བློན་མཆོག་སྦར་སིལ་ཁུལ་དུ་ཕེབས་ཐོན་གནང་རྒྱུ་དང་། དེ་ནས་ཧོ་ལིན་ཌི་དང་ཕ་རན་སིར་ཕེབས་རྒྱུ་ཡིན་འདུག་པ་བཅས།།
