༢༠༡༣ ཟླ་ ༧ ཚེས་ ༣ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༧ ཚེས་ ༣ ཉིན་གྱི་སྔ་དྲོ་ཆུ་ཚོད་ ༧།༤༥ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕོ་བྲང་གཟིམ་ཆུང་ནས་ཝི་ཏི་ནམ་གྱི་ཆོས་ཞུ་བའི་སྐུ་ཚབ་ནས་སྤོས་སྣེས་སྔོན་བསུས་ཏེ་གདན་ཞུས་ཐོག་ཐེག་ཆེན་ཆོས་གླིང་གཙུག་ལག་ཁང་དུ་སྨན་བླའི་སྒྲུབ་ཞག་སྔོན་དུ་མཛད་གྲུབ་མཚམས་བཞུགས་ཁྲི་རིན་པོ་ཆེར་༸ཞབས་སོར་འཁོད་བསྟུན་ཝི་ཏི་ནམ་སྐད་དང་བོད་སྐད་ཐོག་ཤེས་རབ་སྙིང་པོ་གསུང་འདོན་གནང་རྗེས་མགོན་པོ་གང་ཉིད་མཆོག་གིས་ལམ་གཙོ་རྣམ་གསུམ་གྱི་ཆོས་ཐུན་འཕྲོས་སྐྱོང་མཛད་དེ་དགེ་བསྙེན་གྱི་སྡོམ་པ་འབོགས་ཆོག་དང་སྨོན་སེམས་ཆོ་ག་བཟུང་སྟེ་བྱང་སྡོམ་སྔོན་དུ་སོང་བའི་སྒོ་ནས་༸གོང་ས་ལྔ་པ་ཆེན་པོའི་དག་སྣང་ལས་བྱུང་བའི་གསང་བ་རྒྱ་ཅན་ནང་གི་བཅོམ་ལྡན་འདས་སྨན་བླའི་རྗེས་གནང་སྩལ་གྲུབ་བསྟུན་ཝི་ཏི་ནམ་གྱི་དད་ལྡན་ཆོས་ཞུ་བ་དང་དེ་མིན་ཕྱི་རྒྱལ་ཡུལ་གྲུ་ཁག དེ་བཞིན་བོད་རིགས་བཅས་ལ་ཉིན་གསུམ་རིང་ལམ་གཙོ་རྣམ་གསུམ་གྱི་ཆོས་འབྲེལ་དང་སྨན་བླའི་རྗེས་གནང་གྲུབ་རྗེས་བཀའ་སློབ་ཕེབས་དོན། ཆོས་ཞེས་པ་འདི་བྱིན་རླབས་ཀྱི་སྐད་ཆ་མ་རེད། ཉམས་ལེན་བྱེད་རྒྱུའི་སྐད་ཆ་རེད།
དེར་བརྟེན་ཉམས་ལེན་ཡག་པོ་བྱེད་དགོས། ཉམས་ལེན་བྱེད་པར་ཤེས་དགོས་པ་རེད། དེ་འདྲ་ཡིན་དུས་སློབ་སྦྱོང་བྱེད་རྒྱུ་དེ་དཔེ་གལ་ཆེན་པོ་རེད། ངོས་ནས་ནམ་རྒྱུན་འདི་ལྟར་བརྗོད་ཀྱི་ཡོད། ང་ཚོ་ནང་པའི་ཆོས་བྱེད་མཁན་ཚོས་དུས་རབས་ཉེར་གཅིག་པའི་ནང་པ་བྱེད་དགོས་པ་རེད། མདོར་ན། ནང་ཆོས་ཤེས་པ་བྱས་ཏེ་ཉམས་ལེན་བྱས་པ་ཡིན་ན། ནུས་པ་ཐོན་པ་ཞིག་ཡོང་གི་རེད། དེ་མིན་རང་རང་གི་ལུགས་སྲོལ་ལྟ་བུ་བྱས་ཏེ་གཟུངས་སྔགས་འདྲ་འདྲེན་ཏེ་བསྡད་ན་ནུས་པ་ཐོན་རྒྱུ་ཧ་ཅང་ཁག་པོ་རེད། དེར་བརྟེན་སློབ་སྦྱོང་བྱས་ཏེ་སེམས་ལ་བསྒྱུར་བཅོས་གཏོང་དགོས། ད་རེས་འདི་ག་རང་ཡིན། ཡང་ལོ་རྗེས་མ་ང་ཚོ་མཇལ་ཡོང་། ཞེས་བཀའ་སློབ་སྩལ་ཡོད། དེ་རྗེས་ཝི་ཏི་ནམ་ཆོས་ཞུ་བའི་འཐུས་མི་ཁག་གཅིག་གིས་བརྟན་བཞུགས་མདོར་བསྡུས་ཤིག་བསྟར་འབུལ་དང་མཇལ་ཁ་ཞུས་རྗེས་སྐབས་དེར་༸གོང་ས་མཆོག་གི་འཁྲུངས་སྐར་ལ་རྟེན་མཆོད་མངར་ཟས་ཆེན་པོ་ཞིག་འདེགས་འབུལ་གྱིས་ཝི་ཏི་ནམ་ཆོས་ཞུ་བ་ཡོངས་ཀྱི་མགྲིན་གཅིག་ཏུ། སྐུ་ཉིད་ཀྱི་འཁྲུངས་སྐར་ལ་བཀྲ་ཤིས་བདེ་ལེགས། ཞེས་འཚམས་འདྲི་ཞུས་ཏེ་ཁ་ཉིན་རང་༸གོང་ས་མཆོག་གིས་མཛད་པའི་སྨན་བླ་བདེ་གཤེགས་བདུན་གྱི་གསོལ་འདེབས་གསུང་འདོན་རྗེས་ཉིན་གསུམ་རིང་གི་ཆོས་འབྲེལ་ཡོངས་སུ་ལེགས་གྲུབ་བྱུང་བ་བཅས།།
