༢༠༡༣ ཟླ་ ༦་ཚེས་ ༧ རེས་གཟའ་པ་སངས།

༄༅། །ཕྱི་ལོ་ ༢༠༡༣ ཟླ་ ༦ ཚེས་ ༧ རེས་གཟའ་པ་སངས་ཉིན་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་ནང་ཕྱི་དྲིལ་དྲུང་ཆེ་བཀྲ་ཤིས་ཕུན་ཚོགས་ལགས་ཀྱིས་རྒྱ་གར་མཐོ་སློབ་ཀྱི་སློབ་གྲངས་ ༣༠་ལྷག་ཙམ་ལ་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་དང། རྒྱ་གར་ནང་བོད་མིའི་གཞིས་ཆགས་ཁག དགོན་སྡེ་གྲྭ་ཚང་། དེ་བཞིན་ཕྱི་རྒྱལ་སྐུ་ཚབ་དོན་ཁང་སོགས་ངོ་སྤྲོད་གནང་ཡོད།  སློབ་མ་དེ་དག་རྒྱ་གར་རྒྱལ་ས་ལྡི་ལིའི་ནང་རྟེན་གཞི་བྱས་པའི་ཏཱ་ལའི་བླ་མ་མཆོག་གི་ཀུན་ཕན་བདེ་རྩ་ཚོགས་པ་ (Foundation for Universal Responsibility of His Holiness The Dalai lama) ཞེས་པས་ལོ་ལྟར་སྒུ་རུ་ཀུལ་ (Gurukul Programme) ཞེས་ཤེས་ཡོན་ལས་འཆར་གོ་སྒྲིག་ཞུ་བཞིན་ཡོད་པ་ལྟར། འདི་ལོའི་ལས་འཆར་དེར་མཉམ་ཞུགས་གནང་མཁན་རྒྱ་གར་མཐོ་སློབ་ཀྱི་སློབ་མ་སུམ་ཅུ་སོ་གཅིག་ཕེབས་ཡོད། སློབ་མ་རྣམས་བཞུགས་སྒར་དུ་ཟླ་བ་གཅིག་རིང་བོད་མིའི་ཆོས་དང་རིག་གཞུང། སྤྱི་ཚོགས་ཀྱི་གནས་སྟངས་སོགས་རྒྱུས་ལོན་ཆེད་དུ་བུ་རྣམས་གྲྭ་ཚང་ཁག་དང་བུ་མོ་རྣམས་བཙུན་དགོན་ནང་དུ་བཞུགས་ཡོད།

སྤྱིར་སྒུ་རུ་ཀུལ་ (Gurukul Programme) ལས་འཆར་འདི་བཞིན་ཐོག་མར་ཕྱི་ལོ་ ༡༩༩༤ ལོར་འགོ་བཙུགས་གནང་བ་དང། དེ་སྔ་ལས་འཆར་འདིའི་འོག་མཐོ་སློབ་ཀྱི་སློབ་མ་དྲུག་བདུན་ཙམ་ལས་མཉམ་ཞུགས་གནང་མཁན་མེད་ཀྱང། འདས་པའི་ལོ་དྲུག་གི་སྔོན་ཙམ་ནས་ལས་འཆར་དེར་མཉམ་ཞུགས་གནང་མཁན་མང་དུ་ཕྱིན་ནས་ལོ་ལྟར་སློབ་མ་བུ་བཅོ་ལྔ་དང་བུ་མོ་བཅོ་ལྔ་བདམས་ནས་རྡ་སར་རྟེན་གཞི་བྱས་པའི་བོད་པའི་ཆོས་དང་རིག་གཞུང་། གོམས་གཤིས་སོགས་ཉམས་མྱོང་གསོག་རྒྱུ་ཙམ་མ་ཟད། བོད་མིའི་སྒྲིག་འཛུགས་ཀྱི་ལས་ཁུངས་མ་ལག་བཅས་ཤེས་རྟོགས་བྱ་རྒྱུ་ཡིན་འདུག

ཐེངས་འདིར་སྒུ་རུ་ཀུལ་ལས་འཆར་ནང་མཐོ་སློབ་འདྲ་མིན་ ༢༠ ནས་སློབ་མ་གྲངས་ ༣༡ མཉམ་ཞུགས་གནང་ཡོད་ཁོངས་ནས་རྒྱ་གར་སློབ་མ་ ༢༤ དང་། བོད་ཕྲུག་གྲངས་ལྔ། ལ་དྭགས་ནས་གཅིག ཉི་ཧོང་ནས་བུ་མོ་གཅིག་ཡོད། དེ་ཡང་སློབ་མ་ཁོང་རྣམས་ལ་ཕྱི་ལོ་ ༢༠༡༣ ཟླ་ ༦ ཚེས་ ༡ ནས་ ༤ བར་བཞུགས་སྒར་དུ་༸གོང་ས་༸སྐྱབས་མགོན་ཆེན་པོ་མཆོག་གི་སྤྱོད་འཇུག་ཆེན་མོའི་བཀའ་ཆོས་ཐོབ་ཡོད་པ་མ་ཟད། མགོན་པོ་གང་ཉིད་མཆོག་གི་མཇལ་ཁ་ཡང་ཐོབ་ཡོད། ཕྱོགས་མཚུངས་ཕྱི་ལོ་ ༢༠༡༣ ཟླ་ ༦ ཚེས་ ༣ ཕྱེད་ཡོལ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་སློབ་མ་རྣམས་ལ་བོད་དོན་ངོ་སྤྲོད་གནང་ཡོད་པ་བཅས།།