༢༠༡༣ ཟླ་ ༦ ཚེས་ ༡༤ རེས་གཟའ་པ་སངས།
༄༅། །དབུས་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ནས་གོ་སྒྲིག་ཐོག་ལོ་ལྟར་བོད་ཟླ་ ༥ ཚེས་ ༡༠ བར་སྟབས་བསྟུན་གྱིས་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་མཧཱ་གུ་རུའི་འབུམ་ཚོགས་འབུལ་གཤོམ་ཞུ་མུས་བཞིན། བོད་རྒྱལ་ལོ་ ༢༡༤༠ རབ་གནས་ཆུ་སྦྲུལ་ལོའི་བོད་ཟླ་ ༥ ཚེས་ ༦ ནས་ ༡༠ དང། ཕྱི་ལོ་ ༢༠༡༣ ཟླ་ ༦ ཚེས་ ༡༤ ནས་ཚེས་ ༡༨ བར་ཉིན་གྲངས་ལྔའི་རིང་སྤྱི་ནོར་༸གོང་ས་མཆོག་གི་སྐུའི་གསང་བ་གསུམ་ལ་ཚུལ་བསྟན་སྐུ་གེགས་ཀྱི་མཚན་མ་ཕྲ་མོ་ཙམ་ཡང་མ་རེག་པར་ས་གསུམ་སྐྱེ་འགྲོ་ཡོངས་ཀྱི་མགོན་སྐྱབས་དཔུང་གཉེན་དམ་པར་༸ཞབས་པད་བསྐལ་བརྒྱར་བརྟན་ཅིང་། བོད་ཀྱི་ཆོས་བརྒྱུད་ཆེན་པོ་བཞི་དང་། གཡུ་དྲུང་བོན་བཅས་ཀྱི་བླ་ཆེན་དབུ་ཁྲིད་རྣམ་པས་གཙོས་རིས་མེད་བསྟན་འཛིན་སྐྱེས་བུ་རྣམས་སྐུ་ཚེ་ཞབས་པད་བརྟན་ཅིང་། བསྟན་འགྲོ་སྐྱོང་བའི་ཐུགས་བཞེད་མཛད་པ་མཐའ་དག་ལྷུན་གྱིས་འགྲུབ་པ་དང་བོད་དོན་བདེན་མཐའ་གསལ་ཐབས་སུ་དམིགས་ཏེ་གཙུག་ལག་ཁང་གི་རྟེན་མཆོག་སྤྱན་སྔར་མཆོད་སྤྲིན་སྟོང་ཚར་འབུལ་བཤམས་ཐོག་རྣམ་གྲྭ་མཁན་ཟུར་རྒྱུད་སྟོད་བླ་མ་དབུ་མཛད་བྱ་དོ་རིན་པོ་ཆེ་མཆོག་དབུ་བཞུགས་ཐོག་བཞུགས་སྒར་ཁུལ་གནས་རིས་མེད་ཆོས་སྡེ་ཁག་གི་དགེ་བཙུན་སྔགས་གསུམ་དང་། གཞན་ཡང་གཉུག་མར་གནས་པ་དང་། གློ་བུར་དུ་ལྷགས་པའི་དགེ་བཙུན་སྔགས་གསུམ། དེ་བཞིན་མི་མང་བཅས་ཁྱོན་མི་གྲངས་བརྒྱ་ཕྲག་བརྒལ་བ་རྣམས་ནས་བྱང་གཏེར་རིག་འཛིན་གདུང་སྒྲུབ་ཀྱི་སྒོ་ནས་མཧཱ་གུ་རུའི་ཚོགས་མཆོད་འབུམ་ཐེར་སྨིན་སྒྲུབ་གནང་འགོ་ཚུགས་ཡོད་པ་བཅས།།
