༢༠༡༣ ཟླ་ ༦ ཚེས་ ༡༨ རེས་གཟའ་མིག་དམར།
༄༅། །དགོངས་པར་མངའ་གསལ་བཞིན་རྒྱ་ནག་དམར་པོའི་གཞུང་གིས་བོད་དང་བོད་མིའི་ཐོག་འཛིན་པའི་དྲག་གནོན་གདུག་རྩུབ་ཀྱི་སྲིད་བྱུས་རྒྱུན་སྐྱོང་བྱེད་པར་ངོ་རྒོལ་དང་། བོད་བསྟན་སྲིད་མི་རིགས་རང་དབང་དང་བཅས་པ་སྲུང་སྐྱོབ། དེ་བཞིན་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རང་ཡུལ་ཁ་བ་ཅན་དུ་སླར་ཡང་ཞབས་སེན་གྱི་རེ་ཁ་མངོན་པར་འགོད་ཐུབ་པའི་རེ་འདུན་ཤུགས་དྲག་འོག་འུ་ཐུག་ཐབས་ཀྱིས་ཟད་དེ་གཞིས་ལུས་དཔའ་བོ་དཔའ་མོ་སེར་སྐྱ་རྒན་གཞོན་བར་གསུམ་གྱིས་རང་ལུས་མེར་སྲེག་བཏང་དང་གཏོང་བཞིན་པ་ནས། བོད་ནས་གནས་ཚུལ་ཤེས་རྟོགས་བྱུང་བ་ལྟར་ད་བར་ཞལ་གྲངས་ ༡༡༩ ཟིན་ཡོད་ལ། ལྷག་པར་རང་ལུས་མེར་སྲེག་གཏོང་མཁན་ ༡༡༩ པ་ཁམས་རྟུའུ་རྫོངས་ནས་ཡིན་པའི་བཙུན་མ་དབང་ཆེན་སྒྲོལ་མ་དེ་ཉིད། ཕྱི་ལོ་ ༢༠༡༣ ཟླ་ ༦ ཚེས་ ༡༡ ཉིན་བོད་ནང་གི་ཕྱི་དྲོ་ཆུ་ཚོད་ ༥ པ་ཡས་མས་སུ་རྟའུ་ཉ་མཚོ་དགོན་པའི་ཉེ་འཁྲིས་སུ་མེར་བསྲེགས་བྱས་རྐྱེན་ཕྱི་ཚེས་ ༡༤ ཉིན་བོད་ནང་གི་ཕྱི་དྲོ་ཆུ་ཚོད་ ༨ པའི་ཐོག་མི་ཉག་དར་རྩེ་མདོའི་སྨན་ཁང་ཞིག་ཏུ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་འདུག་པས། ཁོང་གི་ཆེད་བཙན་བྱོལ་བོད་མིའི་འདུ་སྡོད་ཁུལ་དུ་གཞུང་འབྲེལ་གདུང་སེམས་མཉམ་བསྐྱེད་ཀྱི་མཆོད་འབུལ་དེ་ཉིད་བོད་ཟླ་ ༥ ཚེས་ ༡༠ ཕྱི་ཟླ་ ༦ ཚེས་ ༡༨ ཉིན་ཕྱི་དྲོ་ཆུ་ཚོད་ ༤ པའི་ཐོག་བསྐྱང་རྒྱུར་ཐུགས་གཏན་འཁེལ་བ་ལགས་ན། སྐུ་ཚབ་དོན་གཅོད་དང་། ས་གནས་འགོ་འཛིན་ལས་ཁུངས་སོ་སོ་ནས་དེ་ལྟར་གོ་སྒྲིག་ཡོང་བ་ཞུ་དགོས་ཕེབས་སོང་བས་དེ་དོན་དགོངས་འཇགས་ཞུ། ཆོས་རིག་ལས་ཁུངས་ནས་ཕྱི་ལོ་ ༢༠༡༣ ཟླ་ ༦ ཚེས་ ༡༧ ལ།།
