༢༠༡༣ ཟླ་ ༦ ཚེས་ ༡༩ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༦ ཚེས་ ༡༨ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཨོ་སི་ཊོ་ལི་ཡའི་གྲོང་ཁྱེར་སི་ཌི་ནིའི་ནང་རྟེན་གཞི་བྱས་པའི་སི་ཌི་ནི་ཞི་བདེའི་ཐེབས་རྩ་ཁང་ (Sydney Peace Foundation) གིས་གོ་སྒྲིག་འོག་ནིའུ་ས་འོ་ཏི་ཝེལ་སི་གྲོས་ཚོགས་ཁང་དུ་(New South Wales Parliament House) འཛམ་གླིང་ཡོངས་ལ་ཁྱབ་པའི་བཟང་སྤྱོད། (Ethics for a Whole World) ཅེས་པའི་བརྗོད་གཞིའི་ཐོག་བགྲོ་གླེང་ལྷན་ཚོགས་ནང་ལྷན་ཞུགས་མཛད་དེ་བཀའ་སློབ་དང་དྲི་བར་བཀའ་ལན་སྩལ་རྗེས་གྲོང་ཁྱེར་མེལ་བྷོན་(Melbourne) དུ་ཆིབས་ཞལ་བསྒྱུར་ཡོད།
དེ་ཡང་ཐེངས་འདིའི་བགྲོ་གླེང་ལྷན་ཚོགས་སྐབས་སློབ་ཕྲུག་དང་མང་ཚོགས་བཅས་ཁྱོན་མི་གྲངས་ ༡༧༠ བརྒལ་བ་མཉམ་ཞུགས་གནང་ཡོད། དེ་ཡང་བགྲོ་གླེང་དབུ་འཛུགས་མ་མཛད་གོང་ཐོག་མར་སི་ཌི་ནིའི་ཁུལ་གྱི་ས་ཆའི་བདག་པོ་ངོ་མ་ཡིན་པ་གདོད་མའི་མི་རིགས་(Cadigal people) རྣམས་ལ་གུས་འདུད་ཞུས། མི་རིགས་དེ་དག་ནི་བོད་ཀྱི་ས་དེ་བོད་མི་ཚོར་བདག་ཡོད་པ་བཞིན་སི་ཌི་ནིའི་ས་ཆའི་བདག་པོ་ངོ་མ་དེ་ཆགས་ཡོད་སྐོར་ངོ་སྤྲོད་ཞུས། དེ་རྗེས་ཨོ་སི་ཊོ་ལི་ཡའི་གསར་འགྱུར་བརྒྱུད་ལམ་གྲགས་ཅན་ཨེ་བྷི་སི་ (ABC) ཞེས་པའི་གསར་འགོད་པ་སྐུ་ཞབས་ཨེན་ཌི་རིའུ་ཝེ་སི་ཊི་ (Andrew West) ལགས་ཀྱིས་བོད་ནང་དུ་གནས་སྟངས་ཇི་འདྲ་འབྱུང་བཞིན་ཡོད་སྐོར་དྲི་བ་ཞུས་པ་དང་སྦྲགས། བགྲོ་གླེང་དངོས་སུ་དབུ་འཛུགས་གནང་ཡོད། སྐབས་དེར་༸གོང་ས་མཆོག་གིས་བཀའ་ལན་སྩལ་དོན།
བོད་ནང་གི་གནས་སྟངས་ལ་ཆ་མཚོན་ན། འདས་པའི་ལོ་ངོ་དྲུག་ཅུའི་ནང་སྐབས་རེ་ཡག་པོ་དང་མཚམས་རེ་སྡུག་པོ་བྱུང་བ་མ་ཟད། ལྷག་པར་ད་ལྟའི་སྐབས་ལ་ཆ་མཚོན་ན་གནས་སྟངས་ཧ་ཅང་ཛ་དྲག་ཆགས་ཡོད། ཅེས་བཀའ་ལན་སྩལ། དེ་རྗེས་སྐུ་ཞབས་ཨེན་ཌི་རིའུ་ཝེ་སི་ཊི་ལགས་ཀྱིས་ཕྱི་ལོ་ ༢༠༠༩ ནས་ད་བར་བོད་ནང་དུ་བོད་མི་ ༡༡༩ རང་ལུས་མེར་སྲེག་བཏང་སྐོར་ཐད་དྲི་བ་ཞུས་པར་༸གོང་ས་མཆོག་གིས་བཀའ་ལན་སྩལ་དོན། གཞིས་ལུས་བོད་མི་ཚོས་དཀའ་སྡུག་ཚད་མེད་མྱངས་པ་དེར་ངོས་ལ་ཧ་ཅང་བློ་ཕམ་ཡོང་བཞིན་འདུག དེང་སྐབས་བོད་ས་ཡོངས་རྫོགས་འཇིགས་སྣང་འོག་གནས་ཡོད། ཕྱི་ལོ་ ༡༩༩༠ ནང་ངོས་ལ་རྒྱ་རིགས་གཞོན་སྐྱེས་ཁག་གཅིག་ཐུག་སྐབས་རྒྱ་ནག་ནང་གི་གནས་སྟངས་ངོས་ལ་བརྗོད་བྱུང། སྐབས་དེར་ཁོང་ཚོས་དེང་སྐབས་རྒྱ་ནག་ནང་ཕན་ཚུན་གཅིག་གིས་གཅིག་ལ་འཇིགས་སྣང་དང་དོགས་པའི་འོག་གནས་དགོས་པར་བརྟེན། རང་གི་སེམས་ནང་གང་བསམ་པ་དེ་གཞན་ལ་བརྗོད་མ་ཐུབ་པའི་གནས་སྟངས་འོག་གནས་བཞིན་ཡོད་སྐོར་བརྗོད་པ་དེ་ངོས་ཀྱིས་དྲན་བྱུང། ཞེས་བཀའ་ལན་སྩལ། བགྲོ་གླེང་ལེགས་པར་གྲུབ་བསྟུན་གཙུག་ལག་སློབ་དཔོན་སྐུ་ཞབས་སི་ཊོ་ཊི་རིསི་ (Prof Stuart Rees) ལགས་ཀྱིས་ཨོ་སི་ཊོ་ལི་ཡའི་གྲོས་ཚོགས་འཐུས་མི་སྐུ་ཞབས་ཇོན་ཀ་ཡེས་ (MP John Kaye) མཆོག་གིས་བགྲོ་གླེང་གོ་སྒྲིག་ཆེད་མཐུན་འགྱུར་གནང་བར་ཐུགས་རྗེ་ཆེ་ཞུས་ཡོད།
༸གོང་ས་མཆོག་གིས་ཐེངས་འདིར་སི་ཌི་ནིའི་གྲོང་ཁྱེར་ནང་གི་མཛད་འཕྲིན་རྣམས་ཡོངས་སུ་ལེགས་གྲུབ་ཀྱིས་གནམ་ཐང་ནས་གྲོང་ཁྱེར་མེལ་བྷོན་དུ་ཆིབས་ཞལ་བསྒྱུར་ཏེ་༸ཞབས་སོར་འཁོད་བསྟུན། མེལ་བྷོན་ཀོན་ཝེན་ཤན་ཚོགས་ཁང་Melbourne Convention Centreཆེན་མོའི་ནང་ཆིབས་སྒྱུར་བསྐྱངས་ཏེ་མང་ཚོགས་ ༥༨༠༠ བརྒལ་བར་བྱམས་བརྩེ་ནི་བདེ་སྐྱིད་ཀྱི་རྩ་བ་ཡིན། ”Compassion: Foundation of Well-Being” ཞེས་པའི་བརྗོད་གཞིའི་ཐོག་བཀའ་སློབ་སྩལ་ཡོད།།
