༢༠༡༣ ཟླ་ ༥ ཚེས་ ༢༩ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༥ ཚེས་ ༢༩ ཉིན་རྡ་ས་གངས་སྐྱིད་གསོལ་ཐབ་ཡང་སྟེང་ཚོགས་ཁང་དུ་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་གོ་སྒྲིག་འོག་མཐོ་རིམ་སློབ་གཉེར་ཟབ་སྦྱོང་བ་རྣམས་ལ་དེང་གི་ན་གཞོན་དང་མ་འོངས་པའི་འགོ་ཁྲིད་ཅེས་པའི་ཟབ་སྦྱོང་ཐེངས་ ༡༢ པའི་ཉིན་མཐའ་མར་སྲིད་སྐྱོང་བློ་བཟང་སེང་གེ་མཆོག་གིས་གསུང་བཤད་གནང་ཡོད།
དེ་ཉིན་སྔ་དྲོ་ཆུ་ཚོད་ ༡༡།༣༠ ཐོག་སྐུ་མགྲོན་གཙོ་བོ་སྲིད་སྐྱོང་བློ་བཟང་སེང་གེ་མཆོག་དང་། བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་ངེས་སྟོན་པ་སྤྱི་འཐུས་ཆོས་སྐྱོང་དབང་ཕྱུག་ལགས། ལས་འཆར་འགན་འཛིན་སྤྱི་འཐུས་ཨཅརྱ་ཡེ་ཤེས་ཕུན་ཚོགས་ལགས། འབྲེལ་ལས་བསམ་འཕེལ་རྡོ་རྗེ་ལགས། རྒྱ་གར་གྱི་ས་གནས་བཅུ་ནས་མཉམ་བཞུགས་སློབ་ཕྲུག་བཅས་ཁྱོན་མི་གྲངས་ ༧༠ བརྒལ་བ་ལྷན་འཛོམས་ཐོག་ལས་འཆར་འགན་འཛིན་སྤྱི་འཐུས་ཨཅརྱ་ཡེ་ཤེས་ཕུན་ཚོགས་ལགས་ཀྱིས་ལས་དོན་ངོ་སྤྲོད་གསུང་བཤད་གནང་གྲུབ་མཚམས་སྐུ་མགྲོན་གཙོ་བོ་སྲིད་སྐྱོང་མཆོག་གིས་ས་གནས་སོ་སོའི་མཐོ་རིམ་སློབ་མའི་སྐུ་ཚབ་རྣམས་ལ་ཟབ་སྦྱོང་གི་ཕྱག་འཁྱེར་གནང་རྗེས་གསུང་བཤད་གནང་བའི་སྙིང་དོན།
བཀའ་ཤག་སྐབས་བཅུ་བཞི་པའི་ཚབ་ཞུས་ཏེ་སློབ་ཕྲུག་རྣམ་པར་འཚམས་འདྲི་དང་ཟབ་སྦྱོང་འདི་བརྒྱུད་བོད་མིའི་སྒྲིག་འཛུགས་ཀྱི་འགྲོ་སྟངས་མང་གཙོའི་ལམ་ལུགས་སྤྱི་ཡོངས་ཐོག་ནས་གོ་རྟོགས་བྱུང་བར་ཡིད་ཆེས་ཞུ་གི་ཡོད། ཁ་སང་འཛིན་རིམ་བཅུ་གཉིས་ཀྱི་ཡིག་རྒྱུགས་གསལ་བསྒྲགས་ཐོན་ཡོད། ད་རེས་སློབ་ཕྲུག་སྤྱི་ཡོངས་དང་སྒེར་ཐོག་ནས་ཡིག་རྒྱུགས་ཡག་པོ་དང་དེའི་ནང་ནས་བོད་མིའི་སྤྱི་ཚོགས་དང་གཏན་འཇགས་སློབ་གྲ་ཁག་ནས་སྤྱི་ཚོགས་ཚན་རིག་གི་བརྒྱ་ཆ་ ༩༥ ལྷག་ཐོབ་མཁན་ཐོག་མར་དེ་མ་སུ་རི་བོད་ཁྱིམ་སློབ་མ་བསྟན་འཛིན་ཆོས་སྐྱིད་བྱུང་འདུག བཀའ་ཤག་སྐབས་བཅུ་བཞི་པས་ཤེས་ཡོན་གལ་ཆེན་གྱི་སློབ་ཡོན་གནང་རྒྱུ་སྤར་ཡོད་པ་མ་ཟད་བརྒྱ་ཆ་ ༩༥ ལྷག་ལོན་ན་ཧིན་སྒོར་འབུམ་གཅིག་གནང་རྒྱུ་གསལ་བསྒྲགས་ཀྱི་ཟླ་ཤས་རྗེས་བྱུང་བར་རྟེན་འབྲེལ་དང་སྦྲགས་ཤེས་རིག་ལས་ཁུངས་ཀྱི་འགན་ཡོད་པའི་ཆ་ནས་དགའ་སྤྲོ་ཆེན་པོ་བྱུང་སྐོར་དང་།
དེ་བཞིན་སློབ་ཕྲུག་ཚོས་འབྱུང་འགྱུར་གྱི་ལས་དོན་གང་ཞིག་འགན་བཞེས་དགོས་ཀྱང་སྤྱི་ཡོངས་ལས་དོན་གྱི་འཆར་གཞི་ཡག་པོར་ལྟ་གྲུབ་གྱི་ལག་ལེན་འཆར་གཞི་ཞིག་ངེས་པར་དུ་དགོས། བཀའ་ཤག་སྐབས་བཅུ་བཞི་པའི་ལྟ་གྲུབ་གསུམ་ལས་རྡོག་རྩ་གཅིག་སྒྲིལ་ཐོག་ནས་ལས་དོན་གྱི་ནུས་པ་མཉམ་སྤུངས་དང་། ལས་དོན་བྱེད་ཕྱོགས་ལ་འཕྲུལ་ཆས་དང་མི་ཆ། ཐབས་ཤེས་ཐོག་ནས་གསར་གཏོད་དགོས། དཔལ་འབྱོར་དང་སྤྱི་ཚོགས་རང་ཁ་རང་གསོ་བྱུང་བ་ཡིན་ན་ཆབ་སྲིད་རྩ་དོན་ལ་ཕན་ཐོགས་ ཡོད། དེ་བཞིན་བཀའ་ཤག་སྐབས་བཅུ་བཞི་པས་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་ཆེན་དང་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན། འཛམ་གླིང་གང་སར་ཡོད་པའི་བོད་མིའི་འཐུས་མི་འདུ་སྐོང་གི་དམིགས་བསལ་ཚོགས་ཆེན་སོགས་རྡ་སར་ཚོགས་པ་དང་བཀའ་བློན་རྣམས་ཕྱི་རྒྱལ་ཁག་ཏུ་ཕྱོགས་སྐྱོད་ཀྱི་གནད་ཡོད་མི་སྣ་ཐུག་ཏེ་བོད་དོན་ཞུ་འབོད་སོགས་ཀྱི་ནུས་ཤུགས་ཕྱོགས་སྒྲིལ་གྱི་བོད་མིའི་སྒྲིག་འཛུགས་ནུས་པ་ཐོན་པ་མ་ཟད།
བོད་ནང་རང་ལུས་མེར་སྲེག་གི་ཛ་དྲག་གནས་སྟངས་དང་ཁོང་རྣམ་པའི་མངོན་འདོད་སྒྲུབ་ཆེད་ཞི་བ་དང་ཁྲིམས་མཐུན། ཆེས་མཐོང་ལྡན་པའི་ཐོག་ནས་བཀའ་སྤྱི་གཉིས་ཀྱི་གདུང་སེམས་མཉམ་སྐྱེས་ལས་འགུལ་དང་ཨ་རིའི་ནིའུ་ཡོཀ་ཏུ་ནོ་སྦེལ་ཞི་བདེའི་དང་འགྲོ་བ་མིའི་ཐོབ་ཐང་ཉིན་མོ་བོད་མི་ལྔ་སྟོང་ཙམ་འདུ་འཛོམས་ཀྱི་ལས་འགུལ། དེ་བཞིན་འདི་ལོའི་གསུམ་བཅུའི་དུས་དྲན་ཉིན་ཡུ་རོབ་རྒྱལ་ས་སྦར་སིལ་དུ་བོད་མི་སྟོང་ཕྲག་བཞི་བརྒལ་བ་འཛོམས་ཏེ་ལས་འགུལ་སྤེལ་བ་དང་། ལས་འགུལ་ཆ་ཤས་གཞན་ཞིག་ཕྱི་རྒྱལ་གྲོས་ཚོགས་ཁག་ཏུ་བོད་དོན་ཞུ་འབོད་དང་ས་གནས་སོ་སོའི་གསར་འགྱུར་བརྒྱུད་ལམ་ཁག་ཏུ་ཐོན་པའི་བོད་དོན་ཁྱབ་བསྒྲགས་བྱུང་སྐོར་དང་། དེ་བཞིན་བོད་རྒྱ་འབྲེལ་མོལ་ཐོག་༸གོང་ས་མཆོག་ཆབ་སྲིད་སྐུ་དབང་བཞག་རྗེས་དམིགས་བསལ་སྐུ་ཚབ་བརྐོས་དགོས་མིན་ཐད་གླེང་སློང་མང་པོ་ཡོང་གི་ཡོད་ཀྱང་། ང་ཚོའི་ངོས་ནས་ཕྱིའི་རྣམ་པ་ལས་་ནང་གི་དོན་སྙིང་གལ་ཆེར་འཛིན་བཞིན་ཡོད་པས་རྒྱལ་སྤྱིའི་གནད་ཡོད་མི་སྣ་ཐུག་འཕྲད་ཀྱི་བོད་ནང་ཛ་དྲག་གནས་སྟངས་དང་འབྲེལ་བའི་བོད་རྒྱ་འབྲེལ་མོལ་ཐོག་གླེང་སློང་ཡོང་བའི་འབོད་སྐུལ་ཞུ་རྒྱུ་བྱུང་ཡོད་ལ་བོད་དོན་ལ་རྒྱབ་སྐྱོར་ཆེན་པོ་ཡོང་དགོས་དོན་ནི་༸གོང་ས་མཆོག་གི་ཐུགས་རྗེའི་བཀའ་དྲིན་དང་མི་རབས་རྒན་པས་དཀའ་ངལ་བརྒྱབ་པ་ལ་བརྟེན་ནས་བྱུང་སྐོར་སོགས་བཀའ་ཤག་གསར་པས་ལོ་གཉིས་མིན་ཙམ་ནང་འཆར་གཞི་གང་དང་གང་བཞག་པ་དང། ལྟ་གྲུབ་ཡོད་པའི་ལས་དོན་ལག་ལེན་བསྟར་བའི་གསུང་བཤད་གནང་རྗེས་སློབ་ཕྲུག་རྣམས་ཀྱི་དྲི་བ་ཁག་ལ་ལན་འདེབས་གནང་གྲུབ་བསྟུན་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་ངེས་སྟོན་པ་སྤྱི་འཐུས་ཆོས་སྐྱོང་དབང་ཕྱུག་ལགས་ཀྱིས་ཟབ་སྦྱོང་གི་ལས་དོན་གྲུབ་འབྲས་དང་འབྲེལ་ཐུགས་རྗེ་ཆེ་ཞུས་ཏེ་གྲོལ་བ་བཅས།
