༢༠༡༣ ཟླ་ ༥ ཚེས་ ༢༣ རེས་གཟའ་པ་སངས།
༅༅། །ཕྱི་ལོ་ ༢༠༡༣ ཟླ་ ༥ ཚེས་ ༢༤ ཉིན་རྡ་སའི་ཉེ་འགྲམ་(Imperial Heights Resort)ཞེས་པའི་གསོལ་མགྲོན་ཁང་དུ་འཕྲོད་བསྟེན་ལས་ཁུངས་ཀྱི་གོ་སྒྲིག་ཐོག་སྤྱི་ཚོགས་ཀྱི་འཕྲོད་བསྟེན་སློབ་གསོ་དང་འབྲེལ་བའི་ཟབ་སྦྱོང་ཞིག་དབུ་འཛུགས་གནང་ཡོད། དེ་ཉིན་སྔ་དྲོ་ཆུ་ཚོད་ ༩།༣༠ ཐོག་སྐུ་མགྲོན་གཙོ་བོ་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་དང་། འཕྲོད་བསྟེན་དྲུང་ཆེ་བསོད་ནམས་ཆོས་འཕེལ་ལགས། འཕྲོད་བསྟེན་འབྲེལ་ལམ་ཐབས་བྱུས་ཀྱི་མཁས་དབང་ (Dr.Sanjanthi Velu ལགས། Dr. Nilesh Chatterjee) ལགས། དྲུང་གཞོན་འཕྲིན་ལས་པདྨོ་ལགས། གཞིས་ཆགས་ས་གནས་ཁག་གི་འཕྲོད་ལས་པ་དང་སྨན་ཞབས་རྣམ་པ་བཅས་ཁྱོན་མི་གྲངས་ ༤༠ བརྒལ་བ་ལྷན་འཛོམས་ཐོག་དྲུང་གཞོན་འཕྲིན་ལས་པདྨོ་ལགས་ཀྱིས་ཟབ་སྦྱོང་དམིགས་དོན་ངོ་སྤྲོད་གསུང་བཤད་གནང་རྗེས་སྐུ་མགྲོན་གཙོ་བོ་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་དབུ་འབྱེད་གསུང་བཤད་གནང་དོན། དེ་རིང་འདིར་ཕེབས་ཚང་མར་འཕྲོད་བསྟེན་ལས་ཁུངས་ཀྱི་ཚབ་ཞུས་ཏེ་འཚམས་འདྲིའི་བཀྲིས་བདེ་ལེགས་ཞུ་གི་ཡོད། བོད་མིའི་སྒྲིག་འཛུགས་ཀྱི་བློན་ཆེན་ལས་ཁུངས་བདུན་ཡོད་པའི་ནང་ནས་ང་ཚོ་འཕྲོད་བསྟེན་ལས་ཁུངས་ནི་མི་མང་དང་ཐད་ཀར་འབྲེལ་བ་ཡོད་པའི་ལས་ཁུངས་ཞིག་དང་རྒྱ་བལ་འབྲུག་གསུམ་གྱི་སྐྱབས་བཅོལ་བོད་མིའི་འཕྲོད་བསྟེན་ཡར་རྒྱས་གཏོང་ཕྱོགས་ཐོག་ལ་འཕྲོད་བསྟེན་ལས་ཁུངས་སུ་འགན་ཆེན་པོ་ཞིག་ཆགས་ཡོད་ལ་གང་ཐུབ་ཅི་ཐུབ་ཞུ་བཞིན་ཡོད། འཕྲོད་བསྟེན་ལས་ཁུངས་ཀྱི་ལས་འཆར་གཙོ་གནད་ཁག་ལྔ་ཙམ་ཡོད་པ་དབུས་ཀྱི་ལས་བྱེད་ཙམ་མིན་པར་ས་གནས་སུ་ཕྱག་ལས་གནང་མཁན་ལ་འབྲེལ་བ་ཆེན་པོ་ཆགས་ཡོད།
དེར་བརྟེན་འདིར་མདོར་ཙམ་ཞུས་ན་དང་པོ་འཕྲོད་བསྟེན་གྱི་གྲངས་ཐོ་ཡར་རྒྱས་གཏོང་ཕྱོགས་ལས་གཞི་དང་། གཉིས་པ་ནད་གཞི་སྔོན་འགོག་གི་འཕྲོད་བསྟེན་སློབ་གསོ་དང་འབྲེལ་བའི་ལས་གཞི་སྔར་ལྷག་བྱེད་དགོས་པ་དང་། གསུམ་པ་སྨན་བཅོས་འཕྲོད་བསྟེན་ལྟ་སྐྱོང་རིམ་པའི་ཐོག་ནས་མི་མང་ལ་འགྲོ་སོང་ཆེ་ཆུང་ཇི་བཏང་བཞི་པ་འཕྲོད་བསྟེན་ལས་བྱེད་ཚོའི་གནས་ཚད་ཤུགས་ཆེ་རུ་བཏང་རྒྱུ་སོགས་ཀྱི་མང་ཚོགས་ལ་ཞབས་ཕྱི་སྔར་ལྷག་ཞུ་རྒྱུ་དང་། ང་རང་གཞིས་ཆགས་ཁུག་ཀྱོག་ཁག་ཏུ་སླེབས་ཡོད་པ་དེ་དག་ལ་ང་ཚོའི་འཕྲོད་བསྟེན་ལས་གཞི་དེ་དག་སླེབས་ཐུབ་མི་འདུག་པས་ཤུགས་བརྒྱབ་སྟེ་ལས་གཞི་དེ་དག་སླེབས་ཐུབ་རྒྱུ་དང་། བཀའ་ཤག་གསར་པའི་ལྟ་གྲུབ་གསུམ་ལས། རྒྱ་བལ་འབྲུག་གསུམ་གྱི་བོད་མིའི་སྨན་བཅོས་ཡར་རྒྱས་བཏང་རྒྱུར་ཤུགས་རྒྱག་རྒྱུ་དང་། གསར་གཏོད་ཐོག་ནས་སྨན་གསར་པ་བཟོ་རྒྱུ་མེད་ཀྱང་། འཕྲོད་བསྟེན་སློབ་གསོའི་ལས་འགུལ་སྤེལ་ཏེ་མང་ཚོགས་ཀྱི་གོ་རྟོགས་རྒྱ་ཆེར་བཏང་རྒྱུ་དང་། མང་ཚོགས་ཀྱི་འཕྲོད་བསྟེན་ཡར་རྒྱས་ཕྱིན་པ་ཡིན་ན་ཉིན་རེའི་ལས་དོན་ཏག་ཏག་སྒྲུབ་ཏེ་ང་ཚོའི་སྤྱི་ཚོགས་རང་ཁ་རང་གསོ་ཡོང་རྒྱུར་ཕན་གྱི་ཡོད། ཞེས་གསུང་བཤད་གནང་གྲུབ་བསྟུན་ཟབ་སྦྱོང་ཕེབས་པ་ཚོས་སོ་སོ་ངོ་སྤྲོད་ཞུས་རྗེས་ཟབ་ཁྲིད་ཀྱི་ལས་རིམ་དབུ་འཛུགས་གནང་ཡོད་ད་ཐེངས་ཟབ་སྦྱོང་འདིར་གཞིས་ཆགས་ས་གནས་ཁག་ ༣༠ ནས་འཕྲོད་ལས་པ་དང་སྨན་ཞབས་པ་ ༣༨ མཉམ་བཞུགས་ཀྱི་འབྲེལ་ལམ་ཐབས་བྱུས་ཀྱི་ཐོག་ནས་འཕྲོད་བསྟེན་སློབ་གསོས་མིའི་བསམ་བློ་ཀུན་སྤྱོད་ཡར་རྒྱས་ཀྱི་ནད་གཞི་སྔོན་འགོག་ཐོག་བོད་པའི་སྤྱི་ཚོགས་ཧྲིལ་པོའི་འཕྲོད་བསྟེན་གནས་སྟངས་ཡར་རྒྱས་ཡོང་རྒྱུར་དམིགས་པ་ཞིག་ཡིན་འདུག
