༢༠༡༣ ཟླ་ ༥ ཚེས་ ༢༨ རེས་གཟའ་མིག་དམར།
༄༅། །གསར་འགྱུར་བརྒྱུད་ལམ་ཁག་ནས་གནས་ཚུལ་ཐོན་པ་ལྟར་ན། རྒྱ་ནག་གཞུང་གིས་བོད་མདོ་སྨད་ཀན་ལྷོ་རྨ་ཆུ་རྫོང་མུ་རྭ་དགོན་པའི་གྲྭ་གསུང་རབ་རྒྱ་མཚོ་ལགས་སུ་གཙོས་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས་རྒྱལ་ཁབ་ཀྱི་གསང་བ་ཕྱིར་བསྒྲགས་བྱེད་མཁན་གྱི་ཉེས་མིང་འོག་ལོ་ ༣ དུས་བཀག་བཙོན་འཇུག་གི་ཁྲིམས་བཅད་རྫོགས་ཏེ་ཀློད་གྲོལ་ཐོབ་ཡོད་ཀྱང་། བཙོན་ཁང་དུ་མནར་གཅོད་ཚད་མེད་བཏང་རྐྱེན་མཁལ་མ་སྐྱོན་ཅན་དུ་གྱུར་འདུག
གྲྭ་གསུང་རབ་རྒྱ་མཚོ་ལགས་ནི། ཀན་ལྷོ་ཁུལ་རྨ་ཆུ་རྫོང་མུ་རྭ་ཞང་བསམ་གཏན་ཆོས་འཁོར་གླིང་དགོན་པའི་གྲྭ་བ་ཡིན་ཞིང་། རང་ལོ་ ༣༧ དང་དེ་སྔོན་ས་གནས་ཀྱི་༼རེ་བའི་རྐང་ལམ༽ཞེས་པའི་ཚགས་པར་གྱི་རྩོམ་སྒྲིག་འགན་འཁུར་བ་དང་བོད་ཨ་མའི་རང་སྐད་སླར་གསོ་ཚོགས་པའི་ཚོགས་མི། རྩྭ་ཐང་བོད་ཡིག་རྨོངས་སེལ་སློབ་གྲྭའི་རྐང་འཛིན་དགེ་རྒན་བཅས་ཀྱི་འགན་འཁུར་ཡོད། ཕྱི་ལོ་ ༢༠༠༨ ལོའི་ཟླ་ ༣ ཚེས་ ༡༧ ཉིན་རྨ་ཆུ་རྫོང་ཉེན་རྟོག་པས་ནག་ཉེས་ཅི་ཡིན་གསལ་ཁ་མེད་པའི་ཐོག་འཇུ་བཟུང་གིས་དུས་ཐུང་བཀག་ཉར་བྱས་རྗེས་གློད་བཀྲོལ་དང་། ཕྱི་ཟླ་ ༥ ཚེས་ ༡༨ ཉིན་རྔ་བ་ཁུལ་ནས་འཇུ་བཟུང་ཐེངས་གཉིས་པ་བྱས་ཏེ་གློད་བཀྲོལ་བཏང་ཡོད་ཀྱང་། ཕྱི་ལོ་ ༢༠༡༠ ལོའི་ཟླ་ ༣ ཚེས་ ༢༥ ཉིན་ཁོང་ ༢༠༠༨ ལོའི་རྨ་ཆུ་རྫོང་ཁོངས་ཀྱི་བོད་མིའི་ཞི་རྒོལ་དང༌། ༢༠༡༠ ལོའི་རྨ་ཆུ་རྫོང་བོད་རིགས་སློབ་འབྲིང་གི་སློབ་མའི་ཁྲོམ་སྐོར་ལས་འགུལ་སོགས་ཀྱི་སྣེ་ཁྲིད་བྱེད་མཁན་གྱི་དོགས་གཞིའི་འོག་འཇུ་བཟུང་སྔ་ཕྱི་ཐེངས་གསུམ་བྱས་ཏེ་ལོའི་དེའི་ཕྱི་ཟླ་ ༡༠ ཚེས་ ༡༦ ཉིན་ཀན་ལྷོ་གཙོས་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས་རྒྱལ་ཁབ་ཀྱི་གསང་བ་ཕྱིར་བསྒྲགས་བྱེད་མཁན་གྱི་ཉེས་མིང་འོག་ལོ་ ༣ དུས་བཀག་བཙོན་འཇུག་གི་ཁྲིམས་ཐག་བཅད་དེ།
ད་བར་ཀན་སུའུ་ལན་ཀྲུའུ་གྲོང་ཁྱེར་ནས་མཚོ་སྔོན་ཞིང་ཆེན་ཟི་ལིང་གྲོང་ཁྱེར་གྱི་ལམ་བར་དུ་ཡོད་པའི་ཏིན་ཧྲི་ཞེས་པའི་བཙོན་ཁང་དུ་བཙོན་འཇུག་དང་། འདི་ཟླའི་ཕྱི་ཚེས་ ༢༡ ཉིན་ཁོང་གི་བཙོན་འཇུག་དུས་བཀག་རྫོགས་སྟེ་གློད་བཀྲོལ་གྱི་ས་གནས་དགོན་གྲོང་གཉིས་ཀྱིས་ཁོང་ལ་ཕེབས་བསུའི་ཁྲོད་ཕྱིར་རང་ཡུལ་དུ་ལོག་ཡོད་འདུག་མོད། ས་གནས་འབྲེལ་ཡོད་མི་སྣས་བརྗོད་པ་ལྟར་ན་རྒྱ་གཞུང་གིས་ཁོང་ལ་སྡུག་སྦྱོང་མནར་གཅོད་ཚད་མེད་བཏང་རྐྱེན་ད་ལྟའི་ཆར་ཁོང་གི་མཁལ་མ་སྐྱོན་ཅན་དུ་འགྱུར་འདུག
