༢༠༡༣ ཟླ ༤ ཚེས་ ༢༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༤ ཚེས་ ༢༨ ཉིན་ཌལ་ཧོར་གཏན་སློབ་དབུ་བརྙེས་ནས་ལོ་ལྔ་བཅུ་འཁོར་བའི་དུས་དྲན་སྲུང་བརྩིའི་མཛད་སྒོའི་སྐུ་མགྲོན་གཙོ་བོ་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་ཌལ་ཧོར་གཏན་སློབ་ཀྱི་རྐང་རྩེད་སྤོལ་ལོའི་ཐང་ཆེན་དུ་སྲུང་བརྩི་གཟབ་རྒྱས་ཞུས་པའི་མཛད་སྒོར་མགོན་པོ་གང་ཉིད་མཆོག་གིས་དེར་འདུས་སྲིད་སྐྱོང་བློ་བཟང་སེང་གེ་མཆོག་གིས་དབུས་བོད་སློབ་འཛིན་ཚོགས་ཀྱི་སྐུ་ཚབ། སློབ་སྤྱི་ཟུར་པ་མཁས་དབང་ཟམ་གདོང་རིན་པོ་ཆེ་མཆོག་གིས་གཙོས་དགེ་ལས་སློབ་ཟུར་རྣམ་པ། སློབ་གྲྭའི་སློབ་སྤྱི་དང་རེག་ཌར། དགེ་ལས་རྣམ་པ། འབྲེལ་ཡོད་མི་སྣ་དང་མི་མང་བཅས་ཁྱོན་མི་གྲངས་༡༠༠༠ བརྒལ་བར་དུས་དྲན་དང་འབྲེལ་བའི་བཀའ་སློབ་སྩལ་དོན། དེ་རིང་ཌལ་ཧོར་སློབ་གྲྭ་འགོ་བཙུགས་ནས་ལོ་ལྔ་བཅུ་འཁོར་བའི་དུས་དྲན་དམིགས་བསལ་ཅན་ཞིག་ཆགས་ཡོད། འདི་གར་སླེབས་པའི་ཁྱེད་རང་ཚོ་ཚང་མར་བཀྲིས་བདེ་ལེགས་བརྗོད་རྒྱུ་ཡིན། སློབ་གྲྭ་འདི་ནས་མི་མང་དག་ཅིག་ལ་ཤེས་ཡོན་སྤྲད་ནས་གང་ལྟར་ང་ཚོའི་བཙན་བྱོལ་སྤྱི་ཚོགས་ནང་ཞབས་འདེགས་ངེས་ཅན་དང་ལག་རྗེས་འཇོག་མཁན་མང་པོ་ཞིག་སློབ་གྲྭ་འདི་ནས་ཐོན་ཡོད།
དེ་བཞིན་ཕྱོགས་དང་མཚམས་སོ་སོར་གནས་ཡོད་མཁན་ཚོས་ཀྱང་སློབ་གྲྭ་འདིའི་བཀའ་དྲིན་དང་སྔར་གྱི་ཚོར་བ་དྲན་པའི་ཐོག་ནས་འདི་གར་སླེབས་ཡོད། ཕྱོགས་དང་མཚམས་སུ་ཡོད་སྐབས་ཀྱང་བོད་སྤྱི་པའི་ཚབ་བྱས་ནས་སྡོད་ཀྱི་ཡོད། ཁྱེད་རང་ཚོ་ཚང་མར་ཐུགས་རྗེ་ཆེ་བརྗོད་རྒྱུ་ཡིན། གང་ལྟར་གཞན་ཕན་བསྒྲུབ་རྒྱུ་ནི་མི་ཚེའི་སྙིང་པོ་རེད། གཞན་ལ་གནོད་པ་བསྐྱལ་ནས་མི་ཚེ་བསྐྱལ་ན་ཆོས་ཕྱོགས་ནས་བཤད་ན། མི་ལུས་བླངས་དང་མ་བླངས་མེད། སྤྱིར་བཏང་ཐོག་ནས་བཤད་ན། རྙོག་གྲ་ནི་རང་གཞན་གཉིས་ལ་དགོས་ཀྱི་མེད། མི་ཚེ་ཐུང་ཐུང་ཞིག་ལས་མེད་སྟབས། གཞན་ལ་ཕན་བདེ་བསྒྲུབ་པའི་ཐོག་ནས་བསྐྱལ་ཐུབ་ན་མི་ཚེ་དོན་དང་ལྡན་པ་ཞིག་ཡོང་གི་ཡོད། དེ་ལྟར་བྱེད་ཐུབ་ན། འཆི་ཁར་སོ་སོའི་སེམས་ནང་སྤོབས་པ་བསླེབ་རྒྱུ་ཞིག་དང་དགའ་བཞིན་སྤྲོ་བཞིན་མི་ཚེ་མཇུག་བསྡུ་རྒྱུ་ཆགས་ཀྱི་ཡོད། ཆོས་ཁས་བླངས་དང་མ་བླངས་གནས་ཚུལ་ཁག་ཁག་རེད། ཁྱེད་རང་ཚོས་ད་ལྟ་བར་དུ་ཧུར་ཐག་གནང་བར་ཐུགས་རྗེ་ཆེ་བརྗོད་རྒྱུ་ཡིན།
དེ་རིང་གཟེངས་བསྟོད་བཞེས་མཁན་རིན་པོ་ཆེར་ཆ་བཞག་ན། ལོ་ངོ་དེ་དག་རིང་ཆོས་སྲིད་གཉིས་ཐོག་ཧུར་ཐག་གནང་སོང་བས་ཐུགས་རྗེ་ཆེ་བརྗོད་རྒྱུ་ཡིན། དེ་བཞིན་ཁྱེད་རང་ཚོ་སློབ་གྲྭའི་དགེ་ལས་བགྲེས་སོང་བྱ་དགའ་ཐོབ་མཁན་ཚོས་ཀྱང་རང་ཉིད་ཀྱི་མི་ཚེ་དར་མ་སློབ་གྲྭའི་ནང་ལས་ཀ་བྱས་ནས་དུས་ཚོད་བསྐྱལ་ཏེ་བྱས་རྗེས་ངེས་ཅན་ཞིག་བཞག་ཡོད་པར་བརྟེན་ཐུགས་རྗེ་ཆེ་བརྗོད་རྒྱུ་ཡིན། དཔེར་ན། གོང་དུ་ཁྱེད་རང་ཚོས་རུ་སྟར་བསྒྲིགས་ཏེ་ཕྱི་ལོ་༡༩༦༣ ནས་ ༧༢ དང་། ༧༣། ༨༢ དེ་ནས་ ༨༣ ནས་ ༩༢ དེ་བཞིན་ ༩༣ ནས་ ༢༠༠༢ དང་། ༢༠༠༣ ནས་ ༢༠༡༣ བར་སློབ་ཟུར་ཁྱེད་རང་ཚོས་རིམ་བཞིན་གྲལ་སྒྲིག་པོ་མེད་པའི་གོམ་བགྲོད་བྱས་ཡོད། འོན་ཀྱང་ཁྱེད་རང་ཚོའི་སེམས་ནང་སྤྲོ་སེམས་དང་སྤོབས་པ་ཏན་ཏན་བྱུང་ཡོད། ཡང་དགའ་སྐྱོ་ཟུང་འབྲེལ་གྱི་ཚོར་བ་ཡང་བྱུང་ཡོད། མིའི་མི་ཚེ་མཐོ་ན་ལོ་བརྒྱ་ཡིན་སྲིད། ང་ཚོས་མི་རིགས་ཤིག་དང་ཆོས་དང་རིག་གཞུང་ཁྱད་པར་བ་ཞིག་གི་སྐད་ཆ་ཤོད་ཀྱི་ཡོད། དེ་མི་རབས་ནས་མི་རབས་བར་བརྒྱུད་འགྲོ་རྒྱུ་རེད།
དཔེར་ན། ཡོངས་གྲགས་བརྩིས་ན་སྟོན་པ་བཅོམ་ལྡན་འདས་བྱོན་ནས་ལོ་ཉིས་སྟོང་ལྔ་བརྒྱ་ལྷག་ཕྱིན་ཡོད། ཁོང་གིས་རྣམ་དཔྱོད་ཀྱི་རྩལ་ལས་ཐོན་པའི་ཆོས་ཚུལ་དེ་དུས་ད་ལྟ་ཡིན་རུང་འཛམ་གླིང་འདིའི་ཐོག་གནས་པ་ཙམ་མ། སྔར་སངས་རྒྱས་ཀྱི་ཆོས་དང་འབྲེལ་བ་མེད་པའི་མིའི་ནང་ནས་དོ་སྣང་གསར་པ་ཞིག་བྱེད་ཀྱི་ཡོད། ང་ཚོས་མི་རབས་ནས་མི་རབས་བསྟན་པ་འཛིན་སྐྱོང་སྤེལ་གསུམ་བྱས་ཡོད། སྟོན་པ་བཅོམ་ལྡན་འདས་དང་ཀླུ་སྒྲུབ་ཡབ་སྲས་སོགས་དགོངས་པ་མྱ་ངན་ལས་འདས་ཟིན་པ་རེད། འོན་ཀྱང་ཁོང་རྣམ་པས་གང་གི་དོན་དུ་མཛད་རྗེས་བཞག་ཡོད་པའི་སངས་རྒྱས་ཀྱི་ཆོས་དང་དེ་འབྲེལ་ལྟ་གྲུབ་ཟབ་མོ་དེ་དུས་ད་ལྟ་ཡིན་རུང་གནས་ཡོད། ང་ཚོ་བོད་ལ་བཞག་ན། ཆོས་རྒྱལ་གཉའ་ཁྲི་བཙན་པོ་དང་ཆོས་རྒྱལ་མེས་དབོན་རྣམ་གསུམ། མཁན་སློབ་ཆོས་གསུམ་བཅས་ཀྱི་སྐབས་ནས་བོད་མི་རིགས་ཆོལ་ཁ་གསུམ་ཡོངས་སུ་རྫོགས་པ་གཅིག་གྱུར་ཐོག་ནས་བོད་ཀྱི་ཆོས་དང་རིག་གཞུང་གི་རྩ་བ་ཚུགས་ཏེ་དུས་ད་ལྟ་བར་དུ་མི་རབས་མང་པོ་ཕྱིན་ཡང་མི་རིགས་ཀྱི་རྣམ་པ་དང་ཁྱད་ཆོས་བཟུང་ནས་གནས་ཡོད།
ཆབ་སྲིད་ཐོག་ནས་འཕོ་འགྱུར་སྣ་ཚོགས་བྱུང་ཡོད་ཀྱང་སངས་རྒྱས་པའི་ཆོས་དང་དེ་དང་འབྲེལ་བའི་རིག་གཞུང་དེ་ཆབ་སྲིད་ཀྱི་འཕོ་འགྱུར་གྱི་སྣ་ཚོགས་ཤིག་བྱུང་བའི་འོག་ནས་དེ་དག་བཟུང་ཐུབཡོད། དེར་བརྟེན་བོད་མི་རིགས་ཀྱི་རྣམ་པ་དེ་ད་ལྟ་ཡིན་རུང་གསལ་པོ་བྱས་ནས་གནས་ཐུབ་པ་ཞིག་བྱུང་ཡོད། ངོས་ཀྱིས་ནམ་རྒྱུན་དུ་ང་ཚོ་བོད་པར་སྐད་ཡིག་དང་དེའི་ནང་ཡོད་པའི་སངས་རྒྱས་པའི་ཆོས་རླབས་ཆེན་དང་གཏིང་ཟབ་ཡོད་པ་ཙམ་མ་ཟད། དེ་འབྲེལ་ང་ཚོར་གོམས་གཤིས་དང་རིག་གཞུང་ཞིག་ཡོད་པ་དེ་ང་ཚོ་བོད་མིའི་བླ་སྲོག་རེད། ཅེས་བརྗོད་ཀྱི་ཡོད། ཇི་ཙམ་དེ་གནས་ཐུབ་པ་བྱུང་ན། བོད་མི་རིགས་ཀྱི་རྣམ་པ་གནས་ཐུབ་ཀྱི་རེད། དེར་བརྟེན་ཁྱེད་རང་ཚོ་བོད་མི་མི་རེ་ངོ་རེ་ལུང་པ་འདྲ་མིན་ནང་སྡོད་ཀྱི་ཡོད་ཀྱང་ལོ་ངོ་སྟོང་ཕྲག་རིང་གི་སོ་སོའི་སྐད་ཡིག་དང་དེའི་ནང་ཡོད་པའི་ཆོས་དང་རིག་གཞུང་དེ་དག་སེམས་ནང་ཡོད་སྟབས། ས་གནས་གང་དུ་བསྡད་ཀྱང་སོ་སོ་ཡིན་རུང་གང་ཙམ་སྤོབས་པ་ཡོང་རྒྱུ་དང་རང་ཉིད་སེམས་པ་སྐྱིད་པ་ཡོང་གི་ཡོད། རོགས་པ་འ་ཆད་འུ་ཐུག་དེ་དག་མཐོང་སྐབས་ང་ཚོ་བོད་པར་ཐུན་མོང་མ་ཡིན་པའི་ཆོས་དང་རིག་གཞུང་གི་གོམས་གཤིས་ཤིག་ཡོད་པར་བརྟེན། དངོས་གནས་དྲིན་ཆེན་པོ་རེད་འདུག་བསམ་པ་ལྟ་བུ་དང་དཀའ་ངལ་ག་ཚོད་འཕྲད་ཀྱང་སེམས་ཞུམ་མེད་དང་རེ་བ་གཏན་ནས་བརླག་གི་མེད་པ་ཡོང་རྒྱུ་དེ་ཆོས་དང་རིག་གཞུང་ཐོག་ནས་རང་ཉིད་ཀྱི་སེམས་ལ་ཡིད་ཆེས་དང་དེ་བཞིན་རྐྱེན་གང་འདྲ་འཕྲད་ཀྱང་ཕྱོགས་ཡོངས་ནས་མཐོང་རྒྱུ་ཞིག་ཡོང་གི་འདུག
གང་ལྟར་ཁྱེད་རང་ཚོ་ས་ཆ་གང་དུ་བསྡད་ཡོད་ཀྱང་བོད་པའི་ཆོས་དང་རིག་གཞུང་སྐད་ཡིག་རྒྱུད་ལ་ཡོད་པའི་རིང་ལ་བོད་པའི་ཚབ་བྱེད་ཀྱི་ཡོད། སོ་སོའི་ཆོས་དང་རིག་གཞུང་སྐད་ཡིག་དེ་དག་དེ་ཙམ་མེད་ན། གནས་ཚུལ་ཐ་དད་རེད། ལུས་པོ་བོད་པའི་ལུས་པོ་རེད་ཀྱང་བོད་པ་ཆ་མ་ཚང་བ་ལྟ་བུ་ཆགས་ཀྱི་ཡོད། འདས་པའི་ལོ་ངོ་སྟོང་ཕྲག་ལྷག་རིང་ལ་ང་ཚོ་བོད་མི་ཆོལ་ཁ་གསུམ་ཡོངས་སུ་རྫོགས་པས་སོ་སོའི་བླ་སྲོག་བཟུང་ནས་བསྡད་པ་རེད། ང་ཚོ་བཙན་བྱོལ་ནང་གི་ལོ་ལྔ་བཅུར་ཆ་བཞག་ན། ཁྱེད་རང་རྒན་པ་ཚོའི་མཐུད་གཞོན་པ་ཚོས་རྒྱག་གི་ཡོད། དེ་ནི་མི་རིགས་ཀྱི་འཐབ་རྩོད་ཟེར་ན་འདྲ། མི་རིགས་ཀྱི་ཆོས་དང་རིག་གཞུང་འཛིནསྐྱོང་བྱ་རྒྱུ་ཟེར་ན་དེ་རེད་འདུག གང་ལྟར་གངས་ཅན་ལྗོངས་ཀྱི་མི་རིགས་འདི་འཚོ་ཞིང་གནས་དགོས་ན། ཆོས་དང་རིག་གཞུང་རྩ་བ་རེད། དེ་རིང་འདིར་རྗེས་དྲན་བྱ་རྒྱུ་དེ་ཡང་སློབ་སྦྱོང་བྱེད་སའི་བསྟི་གནས་ཤིག་ལོ་ལྔ་བཅུ་འཁོར་བའི་དྲན་གསོ་བྱེད་བཞིན་ཡོད་སྟབས། སློབ་སྦྱོང་དེ་གོང་དུ་བརྗོད་པ་མ་ཐག་པའི་སོ་སོའི་བླ་སྲོག་ངོ་སྤྲོད་བྱས་ནས་དེ་འཛིན་སྐྱོང་སྤེལ་གསུམ་བྱ་རྒྱུའི་རྟེན་གཞི་ཡིན་པ་རེད། དེའི་ཐོག་ནས་དེ་རིང་ལོ་ལྔ་བཅུ་འཁོར་བའི་རྗེས་དྲན་ཚང་མར་བཀྲིས་བདེ་ལེགས་བརྗོད་རྒྱུ་ཡིན་ཞེས་བཀའ་སློབ་སྩལ་ཡོད་པ་བཅས།།
