༢༠༡༣ ཟླ་ ༤ ཚེས་ ༣༠ རེས་གཟའ་མིག་དམར།
༄༅། །བོད་མིའི་སྒྲིག་འཛུགས་ཆོས་རིགས་ལས་ཁུངས་ནས་གོ་སྒྲིག་ཐོག་ཕྱི་ལོ་ ༢༠༡༣ ཟླ་ ༥ ཚེས་ ༡༤ ནས་ ༡༧ བར་ཉིན་གྲངས་བཞིའི་རིང་རྡ་སའི་ཉེ་འགྲམ་དཔལ་ལྡན་རྒྱུད་སྟོད་གྲྭ་ཚང་དུ་རིས་སུ་མ་མཆིས་པའི་བོད་བརྒྱུད་ཆོས་ལུགས་ཆོས་བརྒྱུད་ཁག་གི་བཤད་སྒྲུབ་བསྟན་པ་གོང་འཕེལ་གཏོང་ཕྱོགས་ཀྱི་ལྷན་ཚོགས་ཤིག་ཚོགས་གཏན་འཁེལ་ཡོད་པ་དང་། དེར་ཆོས་བརྒྱུད་ཆེན་པོ་བཞི་དང་། གཡུ་དྲུང་བོན། རིས་མེད་དགོན་སྡེ་ཁག་གི་སྐུ་ཚབ་བཅས་མཉམ་བཞུགས་ཀྱིས་བཤད་གྲྭ་དང་སྒྲུབ་གྲྭ་ཡར་རྒྱས་གཏོང་ཕྱོགས་དང་། དེ་བཞིན་གཞུང་ཆེན་རེ་རེའི་ཐོག་རིགས་གཅིག་རྐང་འཛིན་ཡོང་བ་དང། དེ་བཞིན་འཇང་དགུན་ཆོས་སམ་རྩོད་གྲྭ་ཆེན་མོ་དང་རིས་མེད་སྨོན་ལམ་ཆེན་མོ་ཚུགས་ཕྱོགས། དགོན་སྡེ་ཁག་སོ་སོ་ནས་ན་གཞོན་སློབ་ཕྲུག་དང་ས་གནས་མི་མང་ལ་ནང་ཆོས་ངོ་སྤྲོད་གནང་ཕྱོགས། འདུལ་བའི་བསྟན་པ་ཡར་རྒྱས་གཏོང་ཕྱོགས་བཅས་ཀྱི་བརྗོད་གཞིའི་སྐོར་ལ་ལྷན་ཚོགས་གནང་རྒྱུ་ཡིན་འདུག
