༢༠༡༣ ཟླ་ ༤ ཚེས་ ༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༣ ཚེས་ ༢༩ ཉིན་དབུས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་རྡ་ས་བོད་མིའི་མདུན་ལམ་སློབ་སྟོན་བསྟི་གནས་ཁང་དུ་གློག་ཀླད་རྨང་གཞིའི་ཟབ་སྦྱོང་ལེགས་གྲུབ་བྱུང་བའི་སློབ་ཕྲུག་ཁག་གཅིག་ལ་ཕྱག་འཁྱེར་གནང་ཡོད།
དེ་ཉིན་ཕྱི་དྲོ་ཆུ་ཚོད་ ༤ ཐོག་བོད་མིའི་མདུན་ལམ་སློབ་སྟོན་བསྟི་གནས་ཁང་གི་སྤྱི་ཁྱབ་འགན་འཛིན་འཇིགས་མེད་ཚུལ་ཁྲིམས་ལགས་དང་། རྡ་ས་ས་གནས་འགོ་འཛིན་བསོད་ནམས་རྡོ་རྗེ་ལགས། སློབ་ཁྲིད་པ་འཇིགས་མེད་ཚེ་བརྟན་ལགས། ཟབ་སྦྱོང་བ་རྣམས་བཅས་ལྷན་འཛོམས་ཐོག་སྤྱི་ཁྱབ་འགན་འཛིན་གྱིས་བོད་མིའི་སྒྲིག་འཛུགས་ཀྱི་དམིགས་དོན་ལྟར། ཟླ་གསུམ་གྱི་དུས་ཡུན་རིང་སློབ་ཕྲུག་རྣམས་ལ་གློག་ཀླད་ཀྱི་རྨང་གཞི་ཤེས་བྱ་བསླབ་པའི་འཕེལ་རིམ་ངོ་སྤྲོད་གནང་།
དེ་ནས་སློབ་ཕྲུག་ཁག་གཅིག་གིས་སོ་སོའི་བསམ་ཚུལ་གསུང་གྲུབ་མཚམས་རྡ་ས་ས་གནས་འགོ་འཛིན་བསོད་ནམས་རྡོ་རྗེ་ལགས་ཀྱིས་སློབ་ཕྲུག་རྣམས་ལ་ཕྱག་འཁྱེར་གནང་ཡོད། དེ་རྗེས་གློག་ཀླད་སློབ་ཁྲིད་པ་འཇིགས་མེད་ཚེ་བརྟན་ལགས་ཀྱིས་རྨང་གཞིའི་ཤེས་བྱ་སློབ་ཁྲིད་བྱས་པ་མུ་མཐུད་ཡར་རྒྱས་གཏོང་རྒྱུའི་རེ་བ་ཡོད་སྐོར་གསུངས་ཡོད། ཐེངས་འདི་ནི་བོད་མིའི་མདུན་ལམ་བསྟི་གནས་ཁང་ནས་སྦྱོང་བརྡར་སྤྲད་དང་སྤྲོད་མུས་ཡིན་པའི་སློབ་ཐོན་སློབ་མ་ཐེངས་གཉིས་པ་དེ་ཆགས་ཡོད་པ་མ་ཟད། ད་ཐེངས་སློབ་ཕྲུག་ ༢༨ ལ་གློག་ཀླད་རྨང་གཞིའི་སྦྱོང་བརྡར་ཐོན་པའི་ཕྱག་འཁྱེར་གནང་འདུག་པ་བཅས། །
