༢༠༡༣ ཟླ་ ༣ ཚེས་ ༨ རེས་གཟའ་པ་སངས།
༄༅། །བོད་མིའི་སྒྲིག་འཛུགས་བཀའ་ཤག་གི་བཀའ་འབྲེལ་འོག་ཕྱི་ལོ་ ༢༠༡༣ ཟླ་ ༣ ཚེས་ ༦ ཉིན་ཆོས་རིག་ལས་ཁུངས་ནས་གོ་སྒྲིག་ཞུས་པའི་མཆོད་འབུལ་སྨོན་ལམ་དུ་སྲིད་སྐྱོང་བློ་བཟང་སེང་གེ་མཆོག་གིས་མཆོད་འབུལ་སྨོན་ལམ་དང་འབྲེལ་བའི་གསུང་བཤད་གནང་དོན། མཁན་རིན་པོ་ཆེ་མཆོག་གིས་དབུས་སྐྱབས་གནས་དགེ་འདུན་གྱི་སྡེ་དང་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། སྲི་ཞུ་བ་རྣམ་པ། མང་ཚོགས་རྣམ་པ། བརྩེ་བའི་སློབ་ཕྲུག་རྣམ་པ་ཚོར་ཞུ་རྒྱུར། བློ་ཕམ་པའི་གནས་ཚུལ་ཞིག་ལ་ཉེ་ཆར་བོད་ནང་རང་ལུས་མེར་སྲེག་གཏོང་མཁན་ཁག་གཅིག་དང་བོད་ནས་ཡིན་པ་བལ་ཡུལ་དུ་རང་ལུས་མེར་སྲེག་གཏོང་མཁན་གཅིག་བྱུང་ཡོད། ཁོང་ཚོའི་ཆེད་དུ་སྨོན་ལམ་འཚོགས་བཞིན་ཡོད། བོད་ནང་རང་ལུས་མེར་སྲེག་གཏོང་མཁན་རང་ལོ་ ༢༠ ལ་སོན་པའི་ཕག་མོ་དོན་གྲུབ་ལགས་དང་རང་ལོ་ ༢༧ ལ་སོན་པའི་ཚེ་གསུམ་སྐྱབས་ལགས་གཉིས་འདས་གྲོངས་སུ་གྱུར་འདུག རང་ལོ་ཁ་གསལ་མེད་པའི་གསང་བདག་ལགས་ད་ལྟའི་ཆར་གར་སོང་ཆ་མེད་དུ་གྱུར་འདུག
དེ་བཞིན་བལ་ཡུལ་མཆོད་རྟེན་གྱི་སྐོར་ལམ་དུ་གྲྭ་སྒྲུབ་ཚེ་ལགས་ཀྱིས་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་འདུག ཁོང་གི་སྐུ་ཕུང་བལ་ཡུལ་གཞུང་ཐོག་ནས་ཉར་ཡོད་པར་བོད་མིའི་སྒྲིག་འཛུགས་ཀྱི་ལས་ཁུངས་བརྒྱུད་ནས་རག་ཐབས་ཀྱི་འབད་བརྩོན་ཞུས་ཀྱང་ད་ལྟའང་་རག་མེད་པར་བརྟེན། ང་ཚོ་ཙམ་མ་ཟད། བལ་ཡུལ་དུ་གནས་སྡོད་མི་མང་ཚོ་ཡིན་ནའང་བློ་ཕམ་དང་སེམས་འཚབ་ཆེན་པོ་གནང་གི་ཡོད། དེར་བརྟེན་ད་ལྟ་བར་བོད་ནང་རང་ལུས་མེར་སྲེག་གཏོང་མཁན་གྲངས་ ༡༠༧ བྱུང་བའི་ཁྲོད་ནས་ ༩༠ འདས་གྲོངས་སུ་གྱུར་འདུག སྤྱི་ཡོངས་ཐོག་ནས་གསར་འགྱུར་བརྒྱུད་ལམ་ཁག་ཏུ་གཟིགས་པ་ཡིན་ན་བོད་ནང་ཛ་དྲག་གནས་སྟངས་དང་། དེ་བཞིན་རང་ལུས་མེར་སྲེག་གནས་ཚུལ་རྣམས་དམིགས་བསལ་རྒྱལ་སྤྱིའི་གསར་འགྱུར་བརྒྱུད་ལམ་ཁག་ནང་འཐོན་བཞིན་འདུག
རྒྱལ་སྤྱིའི་སྡིངས་ཆའི་ཐོག་བོད་ནང་རང་ལུས་མེར་སྲེག་དང་ཛ་དྲག་གནས་སྟངས་སྐོར་བགྲོ་གླེང་ཡང་གང་ཙམ་ཡོང་གི་ཡོད་པའི་རྣམ་པ་འདུག ཉེ་ཆར་ང་རང་ཁེ་ན་ཌ་གྲོས་ཚོགས་ལ་བཅར་ཏེ་འཐུས་མི་མང་པོ་ཞིག་མཇལ་རྒྱུ་བྱུང་། སྐབས་དེར་བོད་དོན་སྐོར་ཞུ་སྐབས་ཁོང་རྣམ་པར་སེམས་འཚབ་དང་རྒྱབ་སྐྱོར་གྱི་རྣམ་པ་ཤུགས་ཆེན་པོ་འདུག ཉེ་ཆར་བློན་ཆེན་ཁག་བཞི་ཙམ་དང་། དེ་བཞིན་འབྲེལ་ཡོད་མི་སྣ་མང་པོ་ཞིག་མཇལ་ཏེ་བོད་དོན་སྐོར་ལ་ཞུ་རྒྱུ་བྱུང་ལ་དམིགས་བསལ་གསར་འགྱུར་བརྒྱུད་ལམ་ཁག་ནས་དོ་སྣང་ཤུགས་ཆེན་པོ་བྱེད་ཀྱི་འདུག
ཕྱོགས་མཚུངས་ཕྱི་དྲིལ་བཀའ་བློན་མཆོག་གིས་མཉམ་སྦྲེལ་རྒྱལ་ཚོགས་དང་འབྲེལ་བ་ཡོད་པའི་འགྲོ་བ་མིའི་ཐོབ་ཐང་གི་ཚོགས་འདུ་ཁག་གི་ཐོག་བོད་དོན་སྐོར་ལ་གླེང་སློང་གནང་སྐབས་ཧ་ཅང་དོ་སྣང་ཆེན་པོ་གནང་འདུག སྤྱིར་བཏང་རྒྱ་ནག་གཞུང་ནས་ཁ་མཆུ་ང་ཚོའི་མགོ་ཐོག་ཏུ་གཡོག་རྒྱུའི་འབད་བརྩོན་ཤུགས་ཆེ་བྱེད་ཀྱི་ཡོད་པ་ཧ་ཅང་གསལ་པོ་རེད། དེ་བཞིན་རྒྱ་ནག་གི་གཞུང་ཚབ་ཁག་ཡིན་ཡང་རྒྱལ་སྤྱིའི་གཞུང་ཁག་ལ་བཅར་ཏེ། གནད་དོན་མང་པོ་རྒྱུ་མཚན་བགྲངས་ནས་བཙན་བྱོལ་སྒྲིག་འཛུགས་དང་མི་སྣ་སོགས་ཀྱིས་བོད་ནང་གི་བོད་མིར་བརྒྱུད་སྐུལ་བྱས་སྐོར་གྱི་འཁྱོག་གཏམ་སྤེལ་རྒྱུའི་འབད་བརྩོན་ཤུགས་ཆེ་རུ་གཏོང་གི་ཡོད་པ་ཧ་ཅང་གསལ་པོ་ཡིན་སྟབས། ང་ཚོ་ཚང་མས་གཟབ་ནན་དང་དོ་སྣང་བྱེད་རྒྱུ་གལ་ཆེན་པོ་ཡིན། སྤྱི་ཡོངས་བོད་ལ་ཡོད་པའི་བོད་མིའི་མངོན་འདོད་ནི་༸གོང་ས་མཆོག་བོད་ལ་གདན་འདྲེན་ཞུ་དགོས་པ་དང་། བོད་མིར་རང་དབང་བསྐྱར་གསོ་བྱེད་དགོས་པ་རྣམས་རེད། དེར་བརྟེན་ང་ཚོ་རང་དབང་ལུང་པའི་ནང་ཡོད་པའི་བོད་མི་ཚོས་བོད་ནང་ཡོད་པའི་བོད་མིའི་མངོན་འདོད་བསྒྲུབ་རྒྱུར་གང་ཐུབ་ཅི་ཐུབ་གནང་གི་འདུག་ལ་ད་དུང་ཡང་གནང་རོགས་ཞུ་རྒྱུ་ཡིན། མཐའ་དོན་རང་ལུས་མེར་སྲེག་གཏོང་མཁན་ཁོང་རྣམ་པ་བཞིས་གཙོས་ཁོང་རྣམ་པའི་ནང་མི་སྤུན་མཆེད། དེ་བཞིན་ད་ལྟ་བར་དུ་བོད་ཀྱི་རྩ་དོན་སླད་རང་སྲོག་བློས་གཏོང་གནང་མཁན་ཚང་མའི་ཆེད་དུ་ཐུགས་སྨོན་ཡག་པོ་གནང་རོགས་ཞུ་རྒྱུ་ཡིན། ཐུགས་རྗེ་ཆེ། ཞེས་གསུང་བཤད་གནང་ཡོད་པ་བཅས། །
