༢༠༡༣ ཟླ་ ༣ ཚེས་ ༢༧ རེས་གཟའ་ལྷག་པ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༣ ཟླ་ ༣ ཚེས་ ༢༦ ཉིན་འབྲས་ལྗོངས་ཏ་ཐ་ག་ཏའི་སྐྱེད་མོས་ཚལ་ནང་དད་ལྡན་ཆོས་ཞུ་བ་ཉིས་ཁྲི་བརྒལ་བར་ཚེ་དབང་དང་སྒྲོལ་མའི་རྗེས་གནང་སྩལ་ཡོད།
དེ་ཡང་གོང་ཚེས་ཉིན་མགོན་པོ་གང་ཉིད་མཆོག་བཞུགས་གནས་མགྲོན་ཁང་ནས་གནད་ཡོད་མི་སྣ་སོགས་ཀྱིས་ལག་ཏུ་དཀར་གཙང་མཇལ་དར་དང་དགེ་འདུན་པ་རྣམས་ཀྱིས་དུང་རྒྱ་སྤོས་སྣེས་སྔོན་བསུས་ཏེ་གདན་ཞུས་ཀྱི་བཞུགས་ཁྲི་རིན་པོ་ཆེར་༸ཞབས་སོར་འཁོད་གྲུབ་མཚམས་ཐོག་མར་༸གོང་ས་༸སྐྱབས་མགོན་ཆེན་པོ་མཆོག་གིས་སྟོན་པའི་མཛད་རྣམ་སྙིང་བསྡུས་དང་སྐྱབས་འགྲོ་སེམས་བསྐྱེད་བཅས་ཀྱི་ཆོས་འབྲེལ་བཀའ་དྲིན་གྲུབ་མཚམས་སྒྲོལ་དཀར་གྱི་ཚེ་དབང་དང་སྒྲོལ་མའི་རྗེས་གནང་སྩལ་བ་དང་ལྷན་རྗེས་གནང་ངོ་སྤྲོད་མཛད་དོན། དེ་རིང་འདི་གར་ཚེ་དབང་དང་སྒྲོལ་མའི་རྗེས་གནང་བྱ་རྒྱུ་ཡིན། སྒྲོལ་མའི་རྗེས་གནང་དེ་ཡང་སྒྲོལ་མ་གཙོ་འཁོར་གསུམ་ཡོད་པའི་རྗེས་གནང་དེ་གསང་སྔགས་སྔ་འགྱུར་གྱི་ཁོངས་ཆགས་ཡོད། གསང་སྔགས་སྔ་འགྱུར་ལ་གསུམ་ཡོད་པའི་ནང་ནས་ཟབ་མོ་དག་སྣང་གི་ཁོངས་ཡིན། དག་སྣང་ཆོས་འཁོར་གྱི་ཁོངས་དེ་ཡང་༸གོང་ས་ལྔ་པ་ཆེན་པོའི་དག་སྣང་གསང་བ་རྒྱ་ཅན་ཆོས་འཁོར་མང་དག་ཅིག་ཡོད་ཁོངས་ཀྱི་རྗེས་གནང་ཞིག་ཆགས་ཡོད། དེར་བརྟེན་དེ་རིང་འདི་གར་༸གོང་ས་ལྔ་པ་ཆེན་པོའི་དག་སྣང་ལས་བྱུང་བའི་སྒྲོལ་མའི་རྗེས་གནང་བྱ་རྒྱུ་ཡིན། དེ་བཞིན་སེམས་ལ་ཞི་བདེ་ཡོང་རྒྱུར་སེམས་ལ་སྦྱོང་བརྡར་སྤྲོད་དགོས། སེམས་པ་བཟང་པོ་བྱུང་ན་སེམས་ལ་ཞི་བདེ་ཡོང་གི་རེད། དེའི་ཐོག་སྒྲོལ་མའི་གཟུངས་སྔགས་བགྲང་དགོས། དེ་ནས་བརྟན་བཞུགས་སྙིང་བསྡུས་ཤིག་འདོན་རྒྱུ་ཡིན། ཁྱེད་རང་ཚོས་ཀྱང་སྨོན་ལམ་ཡག་པོ་ཞིག་རྒྱག་དགོས། དེ་རིང་འདི་གར་རབ་གནས་དང་འབྲེལ་བའི་ཆོས་འབྲེལ་བྱེད་རྒྱུ་རྣམས་ལེགས་པར་གྲུབ་པ་རེད། མ་འོངས་པར་ང་ཚོ་ཐུག་གི་རེད། ཚང་མ་སེམས་སྐྱིད་པོ་བྱས་ནས་སྡོད་རོགས། བཀྲ་ཤིས་བདེ་ལེགས། ཞེས་བཀའ་སློབ་སྩལ་ཡོད།
དེ་ནས་འབྲས་ལྗོངས་མངའ་སྡེའི་གཞུང་དང་ར་ཝང་ལའི་བོད་མིའི་གཞིས་ཆགས་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་ཁམས་གསུམ་འགྲོ་བ་སྤྱི་དང་ཡང་སྒོས་བོད་གངས་ཅན་པ་རྣམས་ཀྱི་ཆེད་སྐུ་ཚེ་ཞབས་པད་བསྐལ་བརྒྱར་བརྟན་ཅིང་ཐུགས་ཀྱི་བཞེད་དགོངས་མཐའ་དག་འབད་མེད་ལྷུན་གྱིས་འགྲུབ་སླད་བརྟན་བཞུགས་བསྟར་འབུལ་ཞུས་ཡོད།
ཕྱེད་ཡོལ་མགོན་པོ་གང་ཉིད་མཆོག་ཐད་འཕུར་གནམ་གྲུ་བརྒྱུད་འབྲས་ལྗོངས་ཀྱི་རྒྱལ་ས་སྒང་ཏོག་ཏུ་ཆིབས་སྒྱུར་བསྐྱངས་ཡོད་པ་བཅས། །
