༢༠༡༣ ཟླ་ ༢ ཚེས་ ༧ རེས་གཟའ་ཕུར་བུ།
༄༅། །སུད་སིའི་གྲོང་ཁྱེར་ཇི་ནི་ཝའི་ནང་རྟེན་གཞི་བྱས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་འགོ་ཁྲིད་འོག་རྒྱལ་སྤྱིའི་བྱིས་པའི་ཐོབ་ཐང་རྟོག་ཞིག་སྡེ་ཚན་ནས་སྐོང་ཚོགས་གནང་བའི་དམིགས་བསལ་ཚོགས་འདུར་ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་མགྲིན་ཚབ་པ་མཉམ་ཞུགས་ཀྱིས་བོད་ནང་བྱིས་པའི་ཐོབ་ཐང་ཐོག་ཞན་ཆ་ཡོད་སྐོར་ཡིག་ངག་གཉིས་ནས་སྙན་ཞུ་ཕུལ་འདུག
གནས་ཚུལ་དེའི་སྐོར་ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་དབུ་ཁྲིད་ཀྱི་གྲས་སྐུ་ཞབས་མོན་ཀར་ལགས་ཀྱིས་ཕྱི་ལོ་ ༢༠༡༣ ཟླ་ ༢ ཚེས་ ༦ ཉིན་བརྒྱུད་ལམ་ཁག་གཅིག་ནང་གསུང་གསལ། རྒྱལ་སྤྱིའི་འགྲོ་བ་མིའི་ཐོབ་ཐང་ལས་ཁང་ནས་འགྲོ་བ་མིའི་ཐོབ་ཐང་སྲུང་སྐྱོབ་ཆེད་བཅའ་ཁྲིམས་ཁག་བདུན་གཏན་འབེབས་གནང་ཡོད་པའི་ཁོངས་ནས་སྡུག་སྦྱོང་མནར་གཅོད་དང་བྱིས་པའི་ཐོབ་ཐང་གིས་མཚོན་ཡིག་ཆ་ཁག་ལྔ་ལ་རྒྱ་ནག་གཞུང་ནས་མིང་རྟགས་བཀོད་པ་གཞིར་བཟུང་ལག་བསྟར་དོན་འཁྱོལ་ཚུལ་བཞིན་བྱས་ཡོད་མེད་ཐོག་རྟོག་ཞིབ་སྡེ་ཚན་ནས་ལོ་འདིའི་ནང་རྒྱ་ནག་གིས་གཙོས་རྒྱལ་ཁབ་ཁག་ནང་བྱིས་པའི་གནས་སྟངས་ཐད་རྟོག་ཞིབ་གནང་རྒྱུར་གཞིར་བཞག་རྒྱ་ནག་གཞུང་ལ་ཡང་བྱིས་པའི་གནས་སྟངས་ཐོག་དྲི་བ་བྱས་པ་ལྟར་རྒྱ་གཞུང་ནས་ལན་འདེབས་སྙན་ཐོ་ཕུལ་ཡོད། ཕྱོགས་མཚུངས་གཞུང་འབྲེལ་མིན་པའི་ཚོགས་པ་ཚོ་ལའང་བསམ་འཆར་ཤོད་རྒྱུའི་དམིགས་བསལ་གོ་སྐབས་སྤྲད་ཡོད་པར་བརྟེན་ང་ཚོས་གོ་སྐབས་བཟུང་ནས་བོད་ནང་གི་བྱིས་པའི་གནས་སྟངས་ཐོག་ཞན་ཆ་འདུག་ཅེས་བརྗོད་ཡོད།
རྒྱལ་སྤྱིའི་འགྲོ་བ་མིའི་ཐོབ་ཐང་ལས་ཁང་ནས་གཏན་འབེབས་གནང་བའི་བྱིས་པའི་ཐོབ་ཐང་གི་བཅའ་ཁྲིམས་ཀྱི་ཚིག་དོན་རྒྱ་ནག་གཞུང་ནས་ལག་བསྟར་དོན་འཁྱོལ་གནང་རྒྱུའི་ཁས་ལེན་བྱས་ཡོད། དེ་བཞིན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་དུའང་བྱིས་པའི་ཐོབ་ཐང་ཙམ་མ་ཟད། ཆོས་དད་དང་སྨྲ་བརྗོད་རང་དབང། འགྲོ་འོང་རང་དབང། སྐད་ཡིག་རང་དབང་། གྲངས་ཉུང་མི་རིགས་ཀྱི་ས་ཁུལ་ཐོབ་ཐང་སོགས་ཀྱི་གཏན་འབེབས་བྱས་ཡོད་ཀྱང་། ལག་བསྟར་དོན་འཁྱོལ་བྱ་རྒྱུའི་ཐོག་ད་དུང་ཡང་ཞན་ཆ་ཡོད། དཔེར་ན། པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༦ ལ་ཕེབས་སྐབས་རྒྱ་ནག་གཞུང་ནས་བཙན་བཟུང་བྱས་ཏེ་གར་སོང་ཆ་མེད་དུ་གྱུར་ཡོད།
དེ་བཞིན་ཕྱི་ལོ་ ༢༠༠༨ ལོར་བོད་རིགས་བུ་ཕྲུག་སོགས་ལ་ཆབ་སྲིད་ཀྱི་ཉེས་མིང་བཀལ་ཏེ་འཛིན་བཟུང་འོག་མནར་གཅོད་བཏང་བར་བརྟེན་ནས་རང་སྲོག་ཤོར་བ་མ་ཟད། མང་དག་ཅིག་གར་སོང་ཆ་མེད་དུ་གྱུར་ཡོད། ད་དུང་ཡང་མུ་མཐུད་བོད་ནང་དཀའ་ངལ་ཡོད། གང་ལ་ཞེ་ན། བོད་རིགས་སློབ་མ་ཚོས་གཅིག་མཇུག་གཉིས་མཐུད་ཀྱིས་མི་རིགས་འདྲ་མཉམ་དང་སྐད་ཡིག་འདྲ་མཉམ་དགོས་ཞེས་སྐད་འབོད་གནང་བར་རྒྱ་ནག་གཞུང་གིས་ཁྲིམས་ཀྱི་འགྲོ་ལུགས་བརྒྱུད་ནས་ཐོབ་ཐང་སྤྲོད་རྒྱུའི་ཚབ་ཏུ་རྡུང་རྡེག་དང་མནར་གཅོད་གཏོང་གཞིན་ཡོད། དེ་བརྟེན་ང་ཚོས་རྒྱལ་སྤྱིའི་བྱིས་པའི་ཐོབ་ཐང་ལས་ཁང་ལ་ཡིག་ངག་གཉིས་ནས་བོད་ནང་དཀའ་ངལ་ཡོད་པའི་དཔང་རྟགས་ཁུངས་བཙན་གྱི་གནས་ཚུལ་སྙན་སྒྲོན་ཞུས་པ་དང་ཆབས་ཅིག་རྟོག་ཞིབ་ནན་ཏན་གནང་དགོས་པའི་འབོད་སྐུལ་ཞུས་ཡོད། ཅེས་གསུངས་འདུག་པ་བཅས། །
