༢༠༡༣ ཟླ་ ༢ ཚེས་ ༢༧ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༢ ཚེས་ ༢༧ ཉིན་རྡ་ས་གངས་སྐྱིད་སྤྱི་ཐབས་ཡང་སྟེང་ཚོགས་ཁང་དུ་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་ཀ་ཉག་ཚེ་རིང་ལགས་
དང་བློ་བཟང་ཡེ་ཤེས་ལགས་གཉིས་ཀྱིས་གཙོ་འགན་ཐོག་རང་ལུས་མེར་སྲེག་དང་འབྲེལ་བའི་ལོ་རྒྱུས་ཡིག་ཚགས་དཔེ་དེབ་རྒྱ་བོད་དབྱིན་ཡིག་ཐོག་པར་སྐྲུན་གནང་བ་རྣམས་སྲིད་ཚབ་ནང་སྲིད་བཀའ་བློན་མཆོག་དང་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་དབུ་འབྱེད་གནང་ཡོད།
དེ་ཉིན་སྔ་དྲོ་ཆུ་ཚོད་ ༡༠ ཐོག་སྐུ་མགྲོན་གཙོ་བོ་སྲིད་ཚབ་ནང་སྲིད་བཀའ་བློན་རྒྱ་རི་སྒྲོལ་མ་མཆོག་དང་། དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག སྤྱི་འཐུས་རྒྱུན་ལས་རྣམ་པ། ལས་ཁུངས་ཁག་གི་དྲུང་ཆེ་རྣམ་པ། དེ་བཞིན་གཞུང་འབྲེལ་མིན་པའི་ཚོགས་པ་ཁག་གི་འཐུས་མི། གསར་འགོད་པ་བཅས་ཁྱོན་མི་གྲངས་ ༥༠ བརྒལ་བ་ལྷན་འཛོམས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་ཕུལ་རྗེས་རྒྱལ་གཅེས་པ་ཕོ་མོ་འདས་གསོན་ཡོངས་ཀྱི་ཆེད་མྱ་ངན་ངག་བཅད་སྐར་མ་གཅིག་གནང་གྲུབ་བསྟུན་དམིགས་བསལ་སྐུ་མགྲོན་མཆོག་གིས་དབྱིན་ཡིག་དང་རྒྱ་ཡིག་ཐོག་ཕབ་སྒྱུར་དང་པར་སྐྲུན་ཞུས་པའི་དཔེ་དེབ་གཉིས་དབུ་འབྱེད་གནང་མཚམས་སྐུ་མགྲོན་གཙོ་བོ་མཆོག་གིས་བོད་ཡིག་ཐོག་གི་དཔེ་དེབ་གསུམ་དབུ་འབྱེད་གནང་ཡོད།
དེ་ནས་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་ཀྱིས་ངོ་སྤྲོད་གསུང་བཤད་གནང་དོན། དཔེ་དེབ་འདི་བཞིན་བོད་ནང་རྒྱལ་གཅེས་པ་གྲྭ་བཀྲ་བྷེ་
ལགས་དང་བཙན་བྱོལ་ནང་རྒྱལ་གཅེས་པ་ཐུབ་བསྟན་དངོས་གྲུབ་ལགས་ཀྱིས་དབུས་རང་ལུས་མེར་གཏོང་མཁན་རྣམ་པའི་ལོ་རྒྱུས་ཀྱི་བརྗོད་བྱ་ཙོ་བོར་བྱས་པ་དང་། ཆབ་སྲིད་དང་འབྲེལ་བའི་ཉེས་མིང་འོག་བོད་མི་སྡུག་སྦྱོང་མྱངས་དང་མྱོང་བཞིན་པ་རྣམས་ཀྱི་ཡིག་ཚགས་ཕྱོགས་བསྡུས་བྱས་པ་ཞིག་ཡིན། རྒྱ་ནག་གཞུང་ནས་ང་ཚོ་དང་འབྲེལ་བ་ཡོད་པར་བསྙད་དེ་བློ་བཟང་དཀོན་མཆོག་ལགས་སུ་སྲོག་ཁྲིམས་བཅད་པ་རྒྱ་ནག་གཞུང་འབྲེལ་གྱི་བརྙན་འཕྲིན་ནང་ཁྱབ་བསྒྲགས་བྱས་ཡོད། འོན་ཀྱང་ང་ཚོ་དང་འབྲེལ་བ་རྩ་བ་ནས་མེད། དེ་བཞིན་ང་ཚོར་ཛ་དྲག་ཚོགས་ཆུང་བྱས་ཏེ་བོད་ནང་བརྒྱུད་སྐུལ་བྱ་རྒྱུའི་འདོད་པ་མེད་ལ་ད་བར་བྱེད་མྱོང་མེད། བོད་ནང་འཛིན་བཞིན་པའི་སྲིད་བྱུས་དང་། ལྷག་པར་རང་ལུས་མེར་སྲེག་དོན་རྐྱེན་ཐོག་རྒྱ་ནག་གཞུང་གིས་དངོས་རྟོགས་བདེན་འཚོོལ་བྱ་རྒྱུ་གལ་ཆེན་ཡིན། ཞེས་སོགས་ཀྱི་གསུང་བཤད་གནང་ཡོད།
དེ་ནས་དམིགས་བསལ་སྐུ་མགྲོན་མཆོག་གིས་དཔེ་དེབ་དབུ་འབྱེད་དང་འབྲེལ་བའི་
གསུང་བཤད་གནང་དོན། དེ་རིང་ཀིརྟིའི་བྱེས་པ་གྲྭ་ཚང་ནས་འགྲེམས་སྤེལ་གནང་བའི་རང་ལུས་མེར་སྲེག་དང་འབྲེལ་བའི་དཔེ་དེབ་དབུ་འབྱེད་ཀྱི་མཛད་སྒོར་ཕེབས་པའི་སྲིད་སྐྱོང་མཆོག་གི་སྐུ་ཚབ་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་དབུས་བོད་མི་མང་སྤྱི་འཐུས་རྒྱུན་ལས་རྣམ་པ་དང་། ལས་ཁུངས་ཁག་གི་དྲུང་ཆེ་རྣམ་པ། གཞུང་འབྲེལ་མ་ཡིན་པའི་ཚོགས་པ་ཁག་གི་འགན་འཛིན་རྣམ་པ། གསར་འགོད་པ་རྣམ་པ། ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་ཀྱིས་གཙོས་འབྲེལ་ཡོད་ཚང་མར་འཚམས་འདྲི་ཞུ་རྒྱུ་ཡིན། སྤྱིར་བཏང་ད་ལྟའི་ཆར་ང་ཚོ་བོད་ཀྱི་གནས་སྟངས་ཧ་ཅང་ཛ་དྲག་ཐོག་གནས་ཡོད། དེར་བརྟེན་ང་ཚོས་འདས་པའི་ལོ་རྒྱུས་ནང་གང་ཞིག་བྱུང་ཡོད་པ་དང་འབྱུང་འགྱུར་བསམ་བློ་གཏོང་རྒྱུ་ག་རེ་འདུག དེ་ལྟ་བུའི་ཐོག་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པས་གཙོ་འགན་ཁུར་ཐོག་རང་ལུས་མེར་སྲེག་དང་འབྲེལ་བའི་ལོ་རྒྱུས་ཡིག་ཚགས་ཀྱི་དཔེ་དེབ་བོད་ཡིག་ཐོག་གསུམ་དང་དབྱིན་ཡིག་ཐོག་གཅིག དེ་བཞིན་རྒྱ་ཡིག་ཐོག་གཅིག་བཅས་པར་སྐྲུན་གནང་བར་བོད་མི་མང་སྤྱི་འཐུས་ལྷན་ཚོགས་ངོས་ནས་བསྔགས་བརྗོད་ཞུ་རྒྱུ་ཡིན།
ལོ་རྒྱུས་ནི་དུས་དང་གནས་བབ་མང་པོ་ཞིག་གི་འོག་ནས་འགྱུར་བ་འགྲོ་སྐབས། ལོ་རྒྱུས་ཀྱི་ཡིག་ཚགས་འདི་ལྟ་བུ་པར་སྐྲུན་ཐུབ་ན། སྐབས་དེ་དུས་ཀྱི་མི་རིགས་ཀྱིས་འཐབ་རྩོད་ལ་དམིགས་ཡུལ་དང་ལས་འགུལ་གང་ཞིག་སྤེལ་ཡོད་པ་ཕྱི་རབས་པ་ཚོས་ཤེས་རྒྱུར་ཕན་ཐོགས་ཡོད། སྤྱིར་བཏང་ཕྱི་ལོ་ ༢༠༠༨ ནས་བཟུང་བོད་ནང་གི་གནས་ཚུལ་ཛ་དྲག་ཆེ་རུ་ཕྱིན་ཏེ་ཕྱི་ལོ་ ༢༠༠༩ ནས་བཟུང་དུས་ད་ལྟ་བར་རང་ལུས་མེར་སྲེག་གཏོང་མཁན་ཁྱོན་ ༡༠༧ བྱུང་ཡོད་ཁོངས་ནས་ ༨༩ འདས་གྲོངས་སུ་གྱུར་ཡོད། དེར་བརྟེན་རྒྱལ་སྤྱི་དང་ང་ཚོ་བོད་མི་རིགས་ངོས་ནས་དེའི་རྒྱུ་རྐྱེན་གང་ལ་ཐུག་ཡོད་མེད་རྩད་གཅོད་བྱ་རྒྱུ་ཧ་ཅང་གལ་ཆེན་པོ་ཆགས་ཡོད། རྒྱ་ནག་གཞུང་ནས་བོད་ནང་གི་དངོས་ཡོད་གནས་ཚུལ་རྩད་གཅོད་བྱ་རྒྱུ་ལས་ལྡོག་སྟེ་དེར་གདོང་ལེན་ཆེད་དྲག་ཆས་དམག་གི་ཁ་གཏད་དུ་ལངས་བཅུག་གི་ཡོད། རྒྱ་ནག་གཞུང་ཕྱོགས་ནས་གནད་དོན་དེའི་ཐོག་འགྲེལ་ལོག་མང་དག་ཅིག་བརྒྱབ་དང་རྒྱག་བཞིན་འདུག ང་ཚོ་བོད་མི་རིགས་ཤིག་ཡིན་པའི་ཆ་ནས་ཁོང་རྣམ་པས་བློས་གཏོང་གནང་བར་གདུང་སེམས་མཉམ་སྐྱེ་ཞུ་གི་ཡོད། དེ་བཞིན་བོད་མིའི་སྒྲིག་འཛུགས་དང་གཞུང་འབྲེལ་མ་ཡིན་པའི་ཚོགས་པ་ཁག་ནས་བོད་ནང་གི་དངོས་ཡོད་གནས་སྟངས་རྒྱལ་སྤྱིའི་ཐོག་གསལ་སྟོན་བྱ་རྒྱུ་ཧ་ཅང་གལ་ཆེན་པོ་ཆགས་ཡོད། རྒྱལ་སྤྱིའི་ནང་བོད་དོན་ལ་རྒྱབ་སྐྱོར་གནང་མཁན་གྲོས་ཚོགས་སོགས་ཀྱིས་བོད་ནང་རང་ལུས་མེེར་སྲེག་གི་གནད་དོན་ལ་སེམས་འཚབ་ཡོད་སྐོར་གྱི་གཏམ་བཤད་གནང་གི་ཡོད། འོན་ཀྱང་གཏམ་བཤད་གནང་བ་ཙམ་གྱིས་ང་ཚོར་ཕན་ཐོགས་དེ་ཙམ་ཡོང་གི་མི་འདུག ཅེས་སོགས་ཀྱི་གསུང་བཤད་གནང་ཡོད།
དེ་ནས་སྐུ་མགྲོན་གཙོ་བོ་སྲིད་ཚབ་ནང་སྲིད་བཀའ་བློན་མཆོག་གིས་དཔེ་དེབ་དབུ་འབྱེད་དང་འབྲེལ་བའི་གསུང་བཤད་གནང་དོན། གོང་དུ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་མཆོག་གིས་གསུངས་པ་ལས་ལྷག་པ་ཞིག་ངར་ཞུ་རྒྱུ་མེད། བོད་ནང་གི་བོད་མི་ཚོ་རྒྱ་ནག་གཞུང་གི་གདུག་རྩུབ་ཅན་གྱི་སྲིད་བྱུས་འོག་བསྡད་པ་ལས་འཆི་ན་དགའ་བསམ་པའི་གནས་སྟངས་ཆགས་ཡོད། བོད་ནང་གི་བོད་མི་ཚོར་རང་ཉིད་ཀྱི་སྨྲ་བརྗོད་རང་དབང་སོགས་ཤོད་ཡུལ་རྩ་བ་ནས་མེད་སྟབས། འུ་ཐུག་ཐབས་ཟད་ཀྱི་ལམ་ནས་བོད་མི་རྒྱལ་གཅེས་པ་ ༡༠༧ ནས་རང་ལུས་མེར་སྲེག་བཏང་བའི་གནས་ཚུལ་ཐོན་ཡོད། རྒྱ་ནག་གཞུང་གིས་བོད་ལ་བཙན་འཛུལ་གྱིས་ལོ་དྲུག་ཅུ་ལྷག་ཙམ་རིང་དྲག་གནོན་བྱས་པ་མ་ཟད། བོད་མི་རིགས་རིག་གཞུང་དང་བཅས་པར་རྩ་མེད་གཏོང་སླད་གདུག་རྩུབ་ཅན་གྱི་སྲིད་བྱུས་བཟུང་དང་འཛིན་བཞིན་ཡོད།
བོད་མི་རང་ལུས་མེར་སྲེག་གཏོང་མཁན་མང་ཆེ་བ་ཕྱི་ལོ་ ༡༩༥༩ རྗེས་ལ་སྐྱེས་འཚར་བྱུང་བ་རེད། གང་ལྟར་བོད་དོན་དང་བོད་མིའི་སྙིང་སྟོབས་དྲག་གནོན་གྱིས་རྩ་མེད་བཟོ་ཐབས་མེད་པ་ཧ་ཅང་གསལ་པོ་ཆགས་ཡོད། དེ་རིང་ནི་ཕྱི་ལོ་ ༢༠༠༩ ལོར་གྲྭ་བཀྲ་བྷེ་ལགས་ཀྱིས་རང་ལུས་མེར་བཏང་སྟེ་ལོ་བཞི་འཁོར་བའི་དུས་ཚོད་ལྟ་བུ་འཁེལ་ཡོད། རྡ་ས་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་རྣམས་གཉིས་ཀྱིས་འགན་ཁུར་རྐང་བཞེས་ཐོག་སྤྱིར་བོད་ནང་དང་ཡང་སྒོས་བོད་དོན་ཆེད་རང་ལུས་མེར་སྲེག་བཏང་བའི་ལོ་རྒྱུས་དང་འབྲེལ་བའི་དེབ་གྲངས་ལྔ་འགྲེམས་སྤེལ་གནང་ཐུབ་པར། ངས་བཀའ་ཤག་གི་ངོ་ཚབ་ཞུས་ཏེ་རྣམ་པ་གཉིས་ཀྱིས་གཙོས་མཐུན་རྐྱེན་སྐྲུན་མཁན་རྣམས་ལ་བསྔགས་བརྗོད་དང་སྦྲགས་ཐུགས་རྗེ་ཆེ་ཞུ་རྒྱུ་ཡིན།
སྤྱིར་བཏང་བོད་ནང་གི་དངོས་ཡོད་གནས་སྟངས་ལ་ཞིབ་འཇུག་གནང་སྟེ་བོད་རྒྱའི་དཀའ་ངལ་སེལ་རྒྱུའི་ཐབས་ལམ་རྒྱ་ནག་གཞུང་གི་ལག་པར་ཡོད། དེར་བརྟེན་རྒྱ་ནག་གཞུང་ནས་དངོས་རྟོགས་བདེན་འཚོལ་བྱ་རྒྱུ་དེ་ཧ་ཅང་གལ་ཆེན་པོ་རེད། བཙན་བྱོལ་བོད་མིའི་སྒྲིག་འཛུགས་ངོས་ནས་བོད་ནང་གི་བོད་མི་ཚོས་བོད་རྒྱལ་ཁབ་དང་མི་རིགས། ལྷག་པར་དྲང་བདེན་དང་འཚེ་མེད་ཞི་བའི་ཐོག་ནས་ལས་འགུལ་སྤེལ་བར་རྗེས་སུ་ཡི་རང་དང་། ཁོང་རྣམ་པའི་དགོས་འདུན་བསྒྲུབ་ཐབས། དེ་བཞིན་བོད་དོན་བདེན་མཐའ་མ་གསལ་བར་དུ་འབད་བརྩོན་བྱ་རྒྱུ་ནི་ང་ཚོའི་ལས་འགན་ཡིན་པར་ངོས་འཛིན་བྱེད་ཀྱི་ཡོད། ཅེས་སོགས་ཀྱི་གསུང་བཤད་གནང་རྗེས་ཀ་ཉག་ཚེ་རིང་ལགས་ཀྱིས་ཐུགས་རྗེས་ཞུས་ཏེ་གྲོལ་བ་བཅས། །
