༢༠༡༣ ཟླ་ ༡ ཚེས་ ༨ རེས་གཟའ་མིག་དམར།
༄༅། །བརྒྱུད་ལམ་ཁག་ནང་གནས་ཚུལ་ཐོན་གསལ། ཕྱི་ལོ་ ༢༠༡༣ ཟླ་ ༡ ཚེས་ ༧ ཉིན་གྱི་སྔ་དྲོ་ཆུ་ཚོད་ ༡༡ ཐོག་སྡེ་ར་ལྡུན་གྱི་ས་གནས་འགོ་འཛིན་གྱིས་གཙོས་ཁུལ་དེའི་བོད་མི་རྣམས་ལྷན་འཛོམས་ཐོག་བོད་མི་མང་སྤྱི་འཐུས་ལྷན་ཚོགས་ཀྱིས་སྣེ་ཁྲིད་འོག་བོད་དོན་ཞུ་གཏུག་གི་ལས་འགུལ་སྤེལ་འདུག
དེ་ཡང་ཁུལ་དེར་བོད་མི་མང་སྤྱི་འཐུས་བཞི་ཆེད་ཕེབས་ཀྱིས་རྒྱ་གར་གྱི་དཔོན་རིགས་ཁག་ལ་མཇལ་འཕྲད་དང་རྒྱ་གར་གྱི་ཡུལ་མི་རྣམས་ལ་བོད་དོན་ཆེད་རྒྱབ་སྐྱོར་ཡོང་བའི་འབོད་སྐུལ་ཞུས་པ་དང་ཆབས་ཅིག་གོང་ཚེས་ཉིན་བོད་མི་མང་སྤྱི་འཐུས་ཀྱིས་སྣེ་ཁྲིད་འོག་མི་མང་ཆིག་སྟོང་འདུ་འཛོམས་ཐོག་བོད་དོན་ཞུ་གཏུག་དང་བོད་ནང་གི་བོད་མིར་གདུང་སེམས་མཉམ་སྐྱེ་མཚོན་ཆེད་ཁ་ལ་རས་ནག་པོ་དཀྲིས་ཏེ་སྡེ་ར་ལྡུན་རྒྱལ་སར་ཞི་བའི་ཁྲོམ་སྐོར་གནང་འདུག
ལས་འགུལ་དེའི་ཐོག་སྤྱི་འཐུས་རྣམ་པ་བཞིས་གཙོས་བྱང་ཕྱོགས་ཁྲིམས་ཞིབ་པ་ཆེ་བ་མཆོག་དང་ས་གནས་འགོ་འཛིན། གཞུང་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་འགན་འཛིན་རྣམ་པ། དགེ་བཙུན་རྣམ་པ། མི་མང་བཅས་འདུ་འཛོམས་ཀྱི་མཛད་སྒོར་ས་གནས་འགོ་འཛིན་གྱིས་ལས་འགུལ་དེ་དང་འབྲེལ་བའི་སྐོར་ངོ་སྤྲོད་གསུང་བཤད་གནང། དེ་ནས་བོད་མི་མང་སྤྱི་འཐུས་ཟླ་བ་ཚེ་རིང་ལགས་ཀྱིས་གསུང་བཤད་གནང་དོན། ཕྱི་ལོ་ ༢༠༠༩ ནས་ ༢༠༡༢ བར་བོད་བསྟན་སྲིད་སླད་བོད་ནང་གི་བོད་མིས་ ༩༥ ནས་རྒྱ་གཞུང་ལ་ཞི་རྒོལ་ཆེད་རང་ལུས་མེར་སྲེག་བཏང་ཡོད། ཁོང་རྣམ་པས་འཛམ་གླིང་གི་མི་སྤྱི་ཡོངས་ལ་འགྲོ་བ་མིའི་ཐོབ་ཐང་ཡོད་པ་ལྟར། བོད་མིར་འགྲོ་བ་མིའི་ཐོབ་ཐང་དང་བོད་ཀྱི་སྐད་ཡིག་སྲུང་སྐྱོབ་བྱེད་དགོས། ཆོས་དད་རང་དབང་དགོས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་བཅུག་དགོས་ཞེས་སོགས་ཀྱི་དགོས་འདུན་བཏོན་ཏེ་རང་སྲོག་བློས་གཏོང་གནང་ཡོད། དེར་བརྟེན་ང་ཚོ་བོད་མི་ཚོས་བོད་མིའི་འཐབ་རྩོད་ཆེད་རྡོག་རྩ་ཆིག་སྒྲིལ་བྱ་རྒྱུ་གལ་ཆེན་ཡིན་སྐོར་སོགས་ཀྱི་གསུང་བཤད་གནང་འདུག་པ་བཅས། །
