༢༠༡༣ ཟླ་ ༡ ཚེས་ ༢༩ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༡ ཚེས་ ༢༨ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཁས་དབང་བློ་བཟང་སེང་གེ་མཆོག་རྡ་ས་ནས་ལྡི་ལིར་ཕེབས་ཐོན་གྱིས་ཕྱི་ཚེས་ ༢༩ ནས་ཟླ་ ༢ ཚེས་ ༢ བར་ལྡི་ལིར་བོད་མིའི་གདུང་སེམས་མཉམ་སྐྱེའི་ལས་འགུལ་ནང་མཉམ་ཞུགས་གནང་རྒྱུ་དང་། ཕྱི་ཚེས་ ༣ ཉིན་ལྡི་ལི་ནས་པ་ཊ་ན་བརྒྱུད་གནས་མཆོག་རྡོ་རྗེ་གདན་ལ་ཕེབས་ཐོན་གྱིས་ཕྱི་ཚེས་ ༤ ཉིན་ས་གནས་སུ་ལས་འཆར་ཡོད་འདུག
དེ་ནས་ཕྱི་ཚེས་ ༥ ཉིན་ལྡི་ལིར་ཕྱིར་ཕེབས་ཐོན་གྱིས་མི་སྣ་མཇལ་འཕྲད་གནང་རྒྱུ་དང་། ཕྱི་ཚེས་ ༨ ཉིན་ལྡི་ལི་ནས་མུ་ནིཀ་བརྒྱུད་ཨ་རིར་ཕེབས་ཐོན་གྱིས་ཕྱི་ཚེས་ ༢༤ བར་ཨ་རིར་ལས་འཆར་ཡོད་འདུག
དེ་ཡང་ཐོག་མར་བྷོ་སི་ཊོན་དང་། ནིའུ་ཡོཀ་ཁུལ་དུ་མི་སྣ་མཇལ་འཕྲད་དང་། དེ་རྗེས་རྒྱལ་ས་ཝ་ཤིང་ཊོན་དུ་དོན་ཁང་སྤོ་བཞུད་ཀྱི་ལས་དོན་ཁག་ལ་གཟིགས་ཞིབ་གནང་རྒྱུ་བཅས་ཀྱི་ལས་འཆར་ཡོད་འདུག ཕྱི་ཚེས་ ༢༥ ཉིན་བྷོ་སི་ཊོན་ནས་ཁེ་ན་ཌའི་རྒྱལ་ས་ཨོ་ཊ་ཝར་ཕེབས་ཐོན་གྱི་གྲོས་ཚོགས་འོག་མའི་ཚོགས་ཆུང་ཞིག་གི་བོད་དོན་གསན་ཞིབ་ཐོག་ལྷན་ཞུགས་གནང་ཡིན་འདུག་བཅས། །
