༢༠༡༢ ཟླ་ ༡༢ ཚེས་ ༡༣ རེས་གཟའ་ཕུར་བུ།
༄༅། །འདི་གར་ལྡི་ལི་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༡༢ ཚེས་ ༡༠ ཉིན་རྒྱ་གར་གྱི་རྒྱལ་ས་ལྡི་ལིར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་པའི་དུས་དྲན་དང་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་སྲུང་བརྩི་གཟབ་རྒྱས་ཞུས་ཡོད།
དེ་ཡང་ཐོག་མར་ལྡི་ལིར་གནས་སྡོད་བོད་རིགས་སེར་སྐྱ་མི་མང་དང། མཐོ་སློབ་ཁག་ཏུ་སྐྱོད་བཞིན་པའི་བོད་པའི་སློབ་ཕྲུག གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག དེ་བཞིན་ལྡི་ལི་ཁུལ་དུ་བོད་མི་སུད་ཚོང་བ་བཅས་ཁྱོན་མི་གྲངས་ ༣༠༠༠ བརྒལ་བ་འདུ་འཛོམས་ཀྱིས་ཐོག་མར་རམ་ལི་ལ་ཐང་ཆེན་ནས་ཇན་ཏར་མན་ཏར་བར་སྨོན་ལམ་གསུང་འདོན་དང་ལྷན་ཞི་བའི་གོམས་འགྲོས་གནང། དེ་ནས་ཇན་ཊར་མན་ཏར་དུ་མཛད་སྒོ་དངོས་གཞིའི་སྐབས་གནད་ཡོད་ལས་ཀྱི་སྣེ་མོ་བ་རྣམས་ཀྱིས་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་ཞུས་གྲུབ་མཚམས། ས་གནས་བོད་ཁྱིམ་ཉིན་མོ་སློབ་གྲྭའི་སློབ་ཕྲུག་རྣམས་ནས་རྔ་རོལ་དང་སེར་སྐྱ་མི་མང་རྣམས་ཀྱིས་འཕགས་བོད་གཉིས་ཀྱི་རྒྱལ་གླུ་དང་ནོ་བེལ་ཞི་བདེའི་གཟེངས་རྟགས་ཀྱི་བསྟོད་དབྱངས་མཉམ་གཞས་ཕུལ་ཡོད། དེ་བཞིན་བོད་ཆབ་སྲིད་ཀྱི་དོན་དུ་རང་སྲོག་བློས་གཏོང་གནང་མཁན་རྒྱལ་གཅེས་པ་ཕོ་མོ་འདས་གསོན་ཡོངས་ལ་གདུང་སེམས་མཉམ་སྐྱེའི་མཚོན་ཆེད་མྱ་ངན་ངག་བཅད་སྐར་མ་གཅིག་གནང། དེ་རྗེས་ལྡི་ལི་ས་གནས་འགོ་འཛིན་ལེགས་སྐྱེས་རྡོ་རྗེ་ལགས་ཀྱིས་སྐུ་མགྲོན་རྣམས་ལ་ཕེབས་བསུའི་འཚམས་འདྲི་དང་དུས་དྲན་ངོ་སྤྲོད་ཀྱི་གསུང་བཤད་གནང། དེ་ནས་ལྡི་ལི་དོན་གཅོད་བཀའ་ཟུར་བསྟན་པ་ཚེ་རིང་མཆོག་གིས་བཀའ་ཤག་གི་གསུང་བཤད་དང། སྤྱི་འཐུས་ཆོས་སྐྱོང་དབང་ཕྱུག་ལགས་ཀྱིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོགས་སྦྱང་གནང། དེ་རྗེས་བདེན་པའི་མེ་ལྕེ་སྐོར་བསྐྱོད་ཀྱི་ལས་འགུལ་མཇུག་བསྒྲིལ་བའི་མཛད་སྒོ་དབུ་འཛུགས་གནང་ཡོད་པ་བཅས།།
