༢༠༡༢ ཟླ་ ༡༠ ཚེས་ ༢༧ རེས་གཟའ་སྤེན་པ།

༄༅། །ཕྱི་ལོ་ ༢༠༡༢ ཟླ་ ༡༠ ཚེས་ ༢༦ རེས་གཟའ་པ་སངས་ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཨི་ཊ་ལིའི་བྱང་ཕྱོགས་སུ་རྟེན་གཞི་བྱས་པའི་ཊོ་རི་ནོ་ Torino ཞེས་པ་དེར་ཕེབས་ཏེ་ཁུལ་དེའི་གྲོང་ཁྱེར་པ་ཡེ་མོན་ཊེ་ Piemonte ཞེས་པའི་ནང་ཆགས་པའི་ས་གནས་གྲོས་ཚོགས་ལྷན་ཁང་གི་ལས་ཁུངས་སུ་མགྲོན་འབོད་ཞུས་པ་ལྟར་ཕེབས་ཏེ་རྒྱ་ནག་གཞུང་གིས་བོད་མིའི་ཐོག་དམ་བསྒྲགས་མཚམས་འཇོག་བྱས་ཚེ་བོད་མི་ཚོས་རང་ལུས་མེར་སྲེག་གཏོང་དགོས་དོན་མེད་སྐོར་གསུངས་དོན། རྒྱ་ནག་གཞུང་གིས་བོད་མིའི་ཐོག་འཛིན་བཞིན་པའི་དམ་བསྒྲགས་ཅན་གྱི་སྲིད་བྱུས་དེའི་འོག་དེང་སྐབས་བོད་ནང་གི་བོད་མི་ཚོར་ངོ་རྒོལ་རྔམ་སྟོན་བྱ་རྒྱུའི་ཐོབ་ཐང་གང་ཡང་མེད་སྟབས། ཐབས་ཟད་འུ་ཐུག་གིས་བོད་མི་ཚོས་མཐར་རང་ལུས་མེར་སྲེག་གཏོང་དགོས་ཐུག་པའི་གནས་ཚུལ་བྱུང་བ་རེད། གལ་ཏེ་རྒྱ་ནག་གཞུང་གིས་བོད་མིའི་ཐོག་འཛིན་བཞིན་པའི་དམ་བསྒྲགས་ཅན་གྱི་སྲིད་བྱུས་དེ་མཚམས་འཇོག་བྱས་ཚེ་བོད་མིས་རང་ལུས་མེར་སྲེག་གཏོང་དགོས་དོན་གང་ཡང་མེད།

འདི་ལོ་ཕྱི་ཟླ་ ༦ ཟླ་མཇུག་ཙམ་དུ་བོད་ཁམས་དཀར་མཛེས་ཁུལ་དུ་རང་ལོ་ ༡༧ སོན་པའི་བུ་མོ་འཇིགས་མེད་སྒྲོལ་མས་རྒྱ་ནག་གཞུང་གི་སྲིད་བྱུས་ལ་ངོ་རྒོལ་བྱེད་སྐབས་རྒྱ་མིའི་ཉེན་རྟོག་དམག་མིས་ཁོ་མོར་ཉེས་རྡུང་བཏང་བ་མ་ཟད། ཟླ་བ་གཉིས་ཙམ་གྱི་རྗེས་སུ་ཁོ་མོར་ལོ་གསུམ་གྱི་བཙོན་འཇུག་གི་ཁྲིམས་ཐག་བཅད་ཡོད། བོད་མིས་རང་ལུས་མེར་སྲེག་གཏོང་དགོས་ཐུག་པའི་རྒྱུ་རྐྱེན་གཙོ་བོ་ནི། བོད་ནང་རྒྱ་ནག་གཞུང་གི་སྲིད་བྱུས་འོག་བོད་མི་རྣམས་ལ་ཆབ་སྲིད་ཀྱི་དམ་བསྒྲགས་དང། དཔལ་འབྱོར་ཟུར་ཕུད། བོད་ཀྱི་ཁོར་ཡུག་གཏོར་བཤིག བོད་མིའི་ཆོས་དང་སྐད་ཡིག རིག་གཞུང་སོགས་ལ་རྩིས་མེད་རྡོག་རོལ་བཏང་སྟེ་བོད་ཡུལ་རྒྱ་ཡུལ་དུ་འགྱུར་རྒྱུའི་སྲིད་བྱུས་ལག་བསྟར་བྱས་དང་བྱེད་མུས་ཡིན་པ་དེར་ཐུག་ཡོད། ཅེས་སོགས་ཀྱི་གསུང་བཤད་གནང་རྗེས་སྲིད་སྐྱོང་མཆོག་གིས་ཊོ་རི་ནོ་ས་གནས་གྲོས་ཚོགས་ལྷན་ཁང་གི་འཐུས་མི་རྣམས་ལ་བོད་དོན་ཆེད་རྒྱབ་སྐྱོར་གནང་བར་སྙིང་ཐག་པ་ནས་ཐུགས་རྗེ་ཆེ་ཞུའི་གསུང་བཤད་གནང་དོན། ངས་ཁྱེད་རྣམ་པར་ཛ་དྲག་གི་འབོད་སྐུལ་ཞུ་རྒྱུ་ཞིག་ཡོད་པ་ནི། ཁྱེད་རྣམ་པས་རྒྱ་ནག་གཞུང་ལ་བོད་ཀྱི་གནད་དོན་དེ་བཞིན་ཞི་བའི་ལམ་ནས་སེལ་དགོས་པའི་རེ་འདུན་འདོན་རོགས་ཞུ་རྒྱུ་ཡིན། ཞེས་གསུངས། དེ་ཡང་སྲིད་སྐྱོང་མཆོག་གིས་ས་གནས་གྲོས་ཚོགས་ལྷན་ཁང་གི་ལས་ཁུངས་སུ་གསུང་བཤད་མ་གནང་གོང། སྲིད་སྐྱོང་མཆོག་ལ་གུས་འདུད་མཚོན་ཆེད་བོད་རྒྱལ་ཁབ་ཆེ་པོའི་རྒྱལ་གླུ་བཏང་ཡོད།

ཐེངས་འདིར་སྲིད་སྐྱོང་མཆོག་ས་གནས་དེར་ཕེབས་པའི་དུས་སྐབས་སུ་ཁུལ་དེར་ས་གནས་གྲོས་ཚོགས་ལྷན་ཁང་གི་བོད་དོན་དང་འགྲོ་བ་མིའི་ཐོབ་ཐང་རྒྱབ་སྐྱོར་ཚོགས་པ་ Association for Tibet and human rights in the Regional Council of Piemonte བཙུགས་ནས་ལོ་བཅུ་ཧྲིལ་པོ་འཁོར་བའི་དུས་ཚིགས་དང་སྟབས་འཁེལ་ཡོད། ཕྱོགས་མཚུངས་སྲིད་སྐྱོང་མཆོག་གིས་ཐེངས་འདིར་པ་ཡེ་མོན་ཊེ་ Piemonte ས་གནས་གྲོས་ཚོགས་ལྷན་ཁང་གི་ཚོགས་གཙོ་སྐུ་ཞབས་ཝ་ལེ་རིའོ་ཀ་ཊ་ནིའོ་ Mr Valerio Cattaneo མཆོག་དང་། ས་གནས་གྲོས་ཚོགས་ལྷན་ཁང་གི་བོད་དོན་དང་འགྲོ་བ་མིའི་ཐོབ་ཐང་རྒྱབ་སྐྱོར་གྱི་ཚོགས་པའི་ཚོགས་གཙོ་སྐུ་ཞབས་ཇིམ་པེ་རོ་ལིའོ་ Mr Giampiero Leo མཆོག་དང་མཇལ་འཕྲད་གནང་ཡོད། དེ་རྗེས་སྲིད་སྐྱོང་མཆོག་དང་སྐུ་ཞབས་ཇིམ་པེ་རོ་ལིའོ་ལྷན་ཞུགས་ཐོག་གསར་འགོད་ལྷན་ཚོགས་ཤིག་ཚོགས་ཡོད། སྐབས་དེར་སྲིད་སྐྱོང་མཆོག་དང་སྐུ་ཞབས་ཇིམ་པེ་རོ་ལིའོ་རྣམ་གཉིས་ཀྱིས་བོད་དོན་དང་འབྲེལ་བའི་གསུང་བཤད་དང་གསར་འགོད་པའི་དྲི་བར་ལན་འདེབས་ཀྱང་གནང་ཡོད། གསར་འགོད་ལྷན་ཚོགས་སྐབས་ཨི་ཊ་ལིའི་རྒྱལ་ཡོངས་བརྙན་འཕྲིན་དང་ས་གནས་གསར་འགྱུར་བརྒྱུད་ལམ་འདྲ་མིན་གྱིས་གནས་ཚུལ་རྒྱང་སྲིང་ཞུས་ཡོད། ཉིན་དེའི་ཕྱེད་ཡོལ་དུ་ས་གནས་ཁྲིམས་རྩོད་ལྷན་ཚོགས་ The region’s lawyers association ཀྱིས་གོ་སྒྲིག་འོག་རང་བྱུང་ཚན་རིག་འགྲེམས་སྟོན་ཁང་ Natural Science Museum in གི་ཚོགས་ཁང་དུ་སྲིད་སྐྱོང་མཆོག་གིས་མང་ཚོགས་རྣམས་ལ་བོད་ནང་གི་ཛ་དྲག་གནས་སྟངས་ཐོག་གཏམ་བཤད་གནང་དོན།

ཕྱི་ལོ་ ༢༠༠༧ ལོར་༸གོང་ས་༸སྐྱབས་མགོན་ཆེན་པོ་མཆོག་ས་གནས་འདིར་ཆིབས་སྒྱུར་སྐྱོང་སྐབས་རྣམ་པ་ཚོས་༸གོང་ས་མཆོག་གི་ཞལ་མཇལ་གསུང་ཐོས་རྒྱུའི་གོ་སྐབས་བྱུང་ཡོད། དེ་དང་ཕྱོགས་མཚུངས་བོད་ནང་གི་གཞིས་ཞུགས་བོད་མི་ཚོས་༸གོང་ས་༸སྐྱབས་མགོན་ཆེན་པོ་མཆོག་གི་ཞལ་མཇལ། གསུང་ཐོས་རྒྱུའི་གོ་སྐབས་ཐོབ་ཆེད་༸གོང་ས་མཆོག་བོད་དུ་གདན་འདྲེན་ཞུ་དགོས་པའི་དགོས་འདུན་ཤུགས་ཆེ་འདོན་བཞིན་ཡོད་པར་རྒྱ་ནག་གཞུང་གིས་དྲག་གནོན་ཐོག་ནས་དམ་བསྒྲགས་བྱེད་བཞིན་པ་དེ་ནི་བློ་ཕམ་དགོས་པ་ཞིག་ཡིན། དེང་སྐབས་བོད་ནང་དུ་བོད་རིགས་ལས་རྒྱ་རིགས་མང་བ་དང། བོད་མི་དགེ་འདུན་པ་ལས་རྒྱ་མིའི་དམག་མི་མང་བ། སྒིའུ་ཁུང་ལས་པར་ཆས་མང་བ། བོད་མིའི་མཆོད་མེ་ལས་རྒྱ་མིའི་མེ་མདའ་མང་བའི་གནས་ཚུལ་ཆགས་ཡོད། ཅེས་གསུངས་པ་མ་ཟད། བོད་མི་རྣམས་ཀྱིས་དབུ་མའི་ལམ་གྱི་སྲིད་བྱུས་ཐོག་ནས་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་ཐོབ་ཐབས་བྱེད་བཞིན་ཡོད་པ་ལས་རྒྱ་ནག་དང་ཁ་བྲལ་ནམ་ཡང་རྩོད་ཀྱི་མེད། བཅས་གསལ་བཤད་གནང་ཡོད། སྲིད་སྐྱོང་མཆོག་ཕྱི་ཚེས་ ༢༧ ཉིན་རྒྱ་གར་དུ་ཕེབས་རྒྱུ་ཡིན་འདུག་པ་བཅས།།
ཡོད་པ་བཅས།།