༢༠༡༢ ཟླ་ ༩ ཚེས་ ༢༢ རེས་གཟའ་སྤེན་པ།

༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བསྟན་འགྲོ་སྤྱི་དང་ཁྱད་པར་གངས་ལྗོངས་འགྲོ་བའི་མགོན་དཔུང་དམ་པར་སྐུ་ཚེ་བསྐལ་བརྒྱའི་བར་དུ་བརྟན་སླད་རང་རིགས་དྭང་སློབ་འགོ་མང་སྤྱི་ཡོངས་ཀྱིས་ཕྱི་ལོ་ ༢༠༡༢ ཟླ་ ༩ ཚེས་ ༢༢ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཚེ་སྦྱིན་རྣམ་པར་རྒྱལ་མའི་སྒོ་ནས་བརྟན་བཞུགས་བསྟར་འབུལ་ཞུས་ཡོད།
དེ་ཉིན་སྔ་དྲོ་ཆུ་ཚོད་ ༨།༣༠ ཐོག་དྭང་སློབ་ཀྱི་མདའ་དཔོན་བཀའ་བརྒྱུད་ཆོས་འཕེལ་ལགས་དང་རུ་དཔོན་གྲགས་པ་བསྟན་འཛིན་ལགས་གཉིས་ཀྱིས་སྤོས་སྣེས་སྔོན་བསུས་ཏེ་༸གོང་ས་མཆོག་ཕོ་བྲང་ནས་གདན་ཞུས་ཀྱིས་གཙུག་ལག་ཁང་གི་བཞུགས་ཁྲིར་༸ཞབས་སོར་འཁོད་བསྟུན་མང་གཙོའི་ཀ་བ་གསུམ་གྱི་མཛད་གཙོ་རྣམ་པས་དབུས་བོད་མི་མང་སྤྱི་འཐུས་རྣམ་པ། ལྷན་ཁང་ཁག་གི་དྲུང་ཆེ་རྣམ་པ། ཆེད་བཅར་དྭང་སློབ་འགོ་མང་ཀྱི་འཐུས་ཚབ་ལས་བྱེད་རྣམ་པ། མི་མང་བཅས་ཁྱོན་མི་གྲངས་ ༣༠༠༠ བརྒལ་བ་ལྷན་འཛོམས་ཐོག་རྣམ་རྒྱལ་གྲྭ་ཚང་གིས་དབུས་ཆོག་གྲྭ་འདུས་ཚོགས་ནས་སྒྲུབ་ཆོག་སྔོན་དུ་ཟིན་པའི་ཐོག་བརྟན་བཞུགས་ཀྱི་དབུ་བཞུགས་རྣམ་གྲྭ་མཁན་པོ་ཁྲོམ་ཐོག་རིན་པོ་ཆེས་མཇལ་དར་རྐྱང་འབུལ་རྗེས་ཞལ་འདོན་ཆོས་སྤྱོད་ཀྱི་རིམ་པ་ཁག་གསུང་མུར་གསོལ་ཇ་འབྲས་སིལ་འདེགས་འབུལ་ཞུས། དངོས་གཞི་སློབ་དཔོན་ལྷར་བསྐྱེད་ནས་མཆོད་བསྟོད། ཚེ་ཁྲིད་བརྒྱུད་པའི་ཐུགས་དམ་བསྐུལ་བ་སོགས་སོང་ནས་གསོལ་འདེབས་མཎྜལ་སྐབས་རྣམ་གྲྭ་མཁན་རིན་པོ་ཆེ་སྐུ་བཞེངས་ཀྱིས་མཎྜལ་ལྗགས་བཤད་གནང་མུར་དྭང་སློབ་མདའ་དཔོན་དང་རུ་དཔོན་རྣམ་གཉིས་ནས་མཎྜལ་གཡས་གཡོན་ནས་བཏེགས། ལྗགས་བཤད་གྲུབ་པ་དང་ཞལ་འདོན་ཚིག་བསྟུན་གྱིས་སྐུ་རྟེན། གསུང་རྟེན། ཐུགས་རྟེན། བུམ་པ། རིགས་ལྔའི་མཚན་མ། བཀྲིས་རྫས་བརྒྱད། ལྗགས་བཤད་བཅས་ཕུལ་རྗེས་དབུ་བཞུགས་ཀྱི་མཇལ་ཞུ་དང་། མདའ་དཔོན་བཀའ་བརྒྱུད་ཆོས་འཕེལ་ལགས་ཀྱིས་དྭང་སློབ་སྤྱིའི་སྐུ་ཚབ་ཞུས་ཏེ་མཎྜལ་རྟེན་གསུམ་འདེགས་འབུལ་ཞུས། དེ་ནས་འབྲེལ་ཡོད་རྣམ་པར་མཇལ་ཁ་དང་འབུལ་དངོས་རྣམས་བསྟར་ཏེ་༸རྒྱལ་བའི་ཞབས་བརྟན་གསུང་བཞིན་གཏང་རག་མཎྜལ་སྐབས་རུ་དཔོན་གྲགས་པ་བསྟན་འཛིན་གྱིས་གོང་བཞིན་མཎྜལ་རྟེན་གསུམ་འདེགས་འབུལ་གྱི་འབྲེལ་ཡོད་རྣམ་པར་མཇལ་ཁ་སྩོལ་བཞིན་གསོལ་ཇ་གཉིས་པ་འདེགས་འབུལ་ཞུས། དེ་ནས་སྐུ་ཡོན་འབུལ་བཞིན་ཆོག་གཞུང་གི་བཀྲིས་དང་རིས་མེད་བསྟན་རྒྱས་སྨོན་ལམ། བསྟན་འབར་མ། བདེན་ཚིག་སྨོན་ལམ་བཅས་གསུངས་མཐར་ཀ་ཁྲི་སྒྲོགས་ཏེ་བརྟན་བཞུགས་བསྟར་འབུལ་གྱི་མཛད་སྒོ་ལེགས་པར་གྲུབ་སྟེ་མགོན་པོ་གང་ཉིད་མཆོག་གཟིམ་ཆུང་ཕོ་བྲང་དུ་ཆིབས་ཞལ་བསྒྱུར།
ད་ཐེངས་བརྟན་བཞུགས་འདི་ནི་དྭང་སློབ་བཙུགས་ནས་ལོ་ངོ་ལྔ་བཅུ་འཁོར་བའི་རྗེས་དྲན་སླད་༸གོང་ས་༸སྐྱབས་མགོན་ཆེན་པོ་མཆོག་སྐྱེ་འགྲོ་སྤྱི་དང་། བྱེ་བྲག་བོད་གངས་ཅན་པ་རྣམས་ཀྱི་མགོན་དཔུང་དམ་པར་སྐུ་ཚེ་ཞབས་པད་བསྐལ་བརྒྱར་བརྟན་ཅིང་ཐུགས་ཀྱི་བཞེད་དོན་ལྷུན་གྱིས་འགྲུབ་ཆེད་ཡིན་འདུག་པ་བཅས། །