༢༠༡༢ ཟླ་ ༩ ཚེས་ ༡༢ རེས་གཟའ་ལྷག་པ།
༄༅། །བརྒྱུད་ལམ་ཁག་ཏུ་གནས་ཚུལ་ཐོན་གསལ་ལྟར་ན། བོད་མིའི་འདི་ཕྱི་གཉིས་ཀྱི་སྐྱབས་གནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༡༢ ཟླ་ ༡༠ ཚེས་ ༨ ནས་ཁྱོན་ཉིན་གྲངས་བཅོ་ལྔ་ཙམ་གྱི་རིང་ཨ་རིའི་ནིའུ་ཡོཀ་གཙོས་པའི་མངའ་སྡེ་ཁག་གཅིག་ནང་ཆིབས་སྒྱུར་བསྐྱང་གཏན་འཁེལ་ཡོད་པའི་ཁོངས་ནས་ཨ་རིའི་གྲོང་ཁྱེར་ནིའུ་ཡོཀ་གི་ཉེ་འཁྲིས་སུ་རྟེན་གཞི་བྱས་པའི་(Syracuse)གཙུག་ལག་སློབ་གཉེར་ཁང་དུ་རྒྱལ་སྤྱིའི་ཆེ་མཐོང་ལྡན་པའི་རྒྱལ་ཁབ་འདྲ་མིན་གྱི་གཞས་པ་གྲགས་ཅན་ཁག་གཅིག་ལྷན་འཛོམས་ཐོག་༸གོང་ས་མཆོག་སྐུའི་རླབས་ཆེན་གྱི་མཛད་འཕྲིན་ལ་བཀའ་དྲིན་རྗེས་དྲན་གྱི་བསྟོད་དབྱངས་འབུལ་ལམ་ཞུ་རྒྱུའི་ལས་རིམ་དམིགས་བསལ་བ་ཞིག་ཡོད་སྟབས།
ཉེ་ཆར་ཁུལ་དེར་རྟེན་གཞི་བྱས་པའི་ས་གནས་རྒྱ་ནག་གཞུང་ཚབ་ལས་ཁུངས་ནས་སློབ་གཉེར་ཁང་དེར་༸གོང་ས་མཆོག་གདན་ཞུ་ཕུལ་དགོས་དོན་མེད་སྐོར་གསུངས་ཡོད་པར་བརྟེན། གཙུག་ལག་སློབ་གཉེར་ཁང་དེའི་གཙོ་འཛིན་ལྕམ་སྐུ་ནེ་སི་ཀེན་ཌན་ལགས་ཀྱིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ང་ཚོའི་སློབ་གཉེར་ཁང་དུ་བསྐྱང་རྒྱུའི་ཆིབས་སྒྱུར་ཐོག་རྒྱ་ནག་གཞུང་ནས་ཐེ་བྱུས་གང་ཡང་བྱེད་དགོས་དོན་མེད། ཅེས་སོགས་ཀྱི་ལན་འདེབས་གནང་འདུག
སྤྱིར་བཏང་མགོན་པོ་གང་ཉིད་མཆོག་སེ་ར་ཁུ་སེ་གཙུག་ལག་སློབ་གཉེར་ཁང་དུ་ཉིན་གྲངས་གཉིས་ཙམ་གྱི་མཛད་འཆར་སྐབས་ཕྱི་ཚེས་ ༨ སློབ་གཉེར་ཁང་དེའི་ཚོགས་ཁང་ནང་༸གོང་ས་མཆོག་དབུ་བཞུགས་ཐོག་ཁ་ཆེའི་ལོ་རྒྱུས་སྨྲ་བ་སོགས་གནད་ཡོད་མི་སྣ་ཁག་གཅིག་གིས་དཀྱིལ་ཤར་ཨི་ཤེ་ཡའི་ནང་གི་གསར་བརྗེ་སྐོར་གྱི་བགྲོ་གླེང་ཚོགས་འདུ་དང་། ཕྱི་ཚེས་ ༩ ཉིན་གྱི་དགོང་དྲོ་མགོན་པོ་གང་ཉིད་མཆོག་གིས་གཙུག་ལག་སློབ་གཉེར་ཁང་གི་དགེ་ལས་སློབ་མ་ཡོངས་ལས་གོ་ལའི་རྩོད་རྙོག་སེལ་ཐབས་དང་འབྲེལ་བླང་དོར་གྱི་བཀའ་སློབ་སྩལ་རྒྱུ་དང་། དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་གྲོང་ཁྱེར་ཆེ་གྲས་ཁག་གཅིག་ནང་ཆིབས་སྒྱུར་བསྐྱང་སྟེ་མང་ཚོགས་སོགས་ལ་བཀའ་སློབ་སྩལ་རྒྱུ་ཡིན་འདུག་པ་བཅས། །
