༢༠༡༢ ཟླ་ ༩ ཚེས་ ༢༩ རེས་གཟའ་སྤེན་པ།
༄༅། །ཕྱི་ལོ་ ༢༠༡༢ ཟླ་ ༩ ཚེས་ ༢༩ རེས་གཟའ་སྤེན་པའི་སྔ་དྲོ་ཆུ་ཚོད་ ༨ ཐོག་༸གོང་ས་༸སྐྱབས་མགོན་ཆེན་པོ་མཆོག་དང་བསྟན་བདག་བླ་ཆེན་རྣམ་པ་དབུ་བཞུགས་ཐོག་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔར་མཆོད་འབུལ་སྨོན་ལམ་རྒྱས་ཚོགས་མཛད་ཡོད། སྐབས་དེར་སྲིད་སྐྱོང་མཆོག་གིས་མཆོད་འབུལ་སྨོན་ལམ་དང་འབྲེལ་བའི་བཀའ་ཤག་གི་གསུང་བཤད་སྙན་སྒྲོན་ཞུས་དོན། ཁམས་གསུམ་ཆོས་ཀྱི་རྒྱལ་པོ་ལྷར་བཅས་སྲིད་ཞིའི་གཙུག་རྒྱན། འཇིག་རྟེན་ཞི་བདེའི་དེད་དཔོན། བོད་མིའི་བླ་ན་མེད་པའི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་བོད་ཀྱི་ཆོས་ལུགས་ཆོས་བརྒྱུད་བཅས་ཀྱི་དབུ་ཁྲིད་བླ་ཆེན་རྣམ་པ། སྐྱབས་གནས་དགེ་འདུན་གྱི་སྡེ། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ། དམིགས་བསལ་ཚོགས་ཆེན་ལ་ཆེད་ཕེབས་པའི་ཚོགས་བཅར་བ་རྣམ་པ། སྲི་ཞུའི་ལས་བྱེད་རྣམ་པ། གཞུང་འབྲེལ་མིན་པའི་ཚོགས་པ་ཁག་གི་འགན་འཛིན་དང། སློབ་ཕྲུག རྒྱ་ཆེ་མི་མང་རྣམ་པ། དེང་སང་འཛམ་གླིང་གང་སར་ནད་མཚོན་དམག་འཁྲུག་དང་འབྱུང་བའི་འཇིགས་པ་སོགས་ཇེ་ཆེར་འཕེལ་བཞིན་པའི་སྐབས་འདིར་བཀའ་སྤྱི་གཉིས་ཀྱི་གོ་སྒྲིག་འོག་སྤྱིར་འཛམ་གླིང་ཞི་བདེ་དང་ཁྱད་པར་མིས་བཟོས་པ་དང་རང་བཞིན་འབྱུང་བའི་གནོད་འཚེ་ཕོག་ཡུལ་ཡོངས་ལ་དམིགས་པའི་གདུང་སེམས་མཉམ་སྐྱེའི་མཆོད་འབུལ་སྨོན་ལམ་རྒྱས་པ་འདི་གོ་སྒྲིག་ཞུས་པ་ཡིན།
ལྷག་པར་འདས་པའི་མི་ལོ་དྲུག་ཅུ་ཉེ་བའི་རིང་རྒྱ་ནག་གཞུང་གིས་བོད་ལ་དྲག་པོས་བཙན་བཟུང་བྱས་པ་ནས་བཟུང། བོད་མི་ཚོས་གདུག་རྩུབ་མནར་གཅོད་མི་ཟད་པ་མྱངས་དང་མྱོང་བཞིན་པ་མ་ཟད། ཡར་རྒྱས་བཏང་ཚུལ་རྫུན་གཏམ་གྱི་དྲིལ་བསྒྲགས་ཇི་ཙམ་སྤེལ་རུང་དོན་དངོས་ཐོག་བོད་ནང་མི་སེར་སྤེལ་བའི་ལམ་ལུགས་ལག་བསྟར་གྱིས་བོད་མི་ཚོའི་ཆོས་དང་རིག་གཞུང། སྐད་ཡིག གོམས་སྲོལ། དཔལ་འབྱོར་དབྱེ་འབྱེད། ཁོར་ཡུག་དང་བཅས་པ་གཏོར་བཅོམ་ཚབས་ཆེ་ཕོག་དང་ཕོག་བཞིན་པར་བོད་མི་ཚོས་ཞི་བའི་སྒོ་ནས་ངོ་རྒོལ་རབ་དང་རིམ་པ་སྤེལ་ཡོད། ཁྱད་པར་ཕྱི་ལོ་ ༢༠༠༨ ལོར་བོད་ཆོལ་ཁ་གསུམ་ཁྱོན་ཡོངས་སུ་སེར་སྐྱ་རྒན་གཞོན་དབྱེ་བ་མེད་པར། བོད་མི་ཡོངས་ནས་རྒྱ་ནག་གཞུང་གི་མཁྲེགས་འཛིན་གྱི་སྲིད་བྱུས་ལ་ཞི་བའི་སྒེར་ལངས་དང་། བོད་ནང་རང་དབང་བསྐྱར་གསོ་དང་༸གོང་ས་མཆོག་བོད་ལ་གདན་འདྲེན་ཞུ་དགོས་པའི་འབོད་སྒྲ་བསྒྲགས་དང་སྒྲོག་མུས་ཡིན་པ། རྒྱ་ནག་གཞུང་གི་འགོ་ཁྲིད་ཙམ་དུ་མ་ཟད། འཛམ་གླིང་ཡོངས་ཀྱིས་ཤེས་རྟོགས་ཐུབ་པ་བྱུང་ཡོད། འོན་ཀྱང་བློ་ཕམ་པ་ཞིག་ལ་རྒྱ་ནག་གཞུང་གི་འགོ་ཁྲིད་ཚོས་དངོས་ཐོག་བདེན་འཚོལ་གྱི་ལམ་ནས་བོད་མིའི་དཀའ་ངལ་སེལ་ཐབས་བྱ་རྒྱུའི་ཚབ་ཏུ་མུ་མཐུད་སྲིད་བྱུས་མཁྲེགས་བཟུང་ཁོ་ནས་བོད་མི་རྣམས་འུ་ཐུག་ཐབས་ཟད་ཀྱི་གནས་སུ་ལྷུང་བ་དང་། གྲོས་མོལ་གྱི་ལམ་ནས་བོད་དོན་འགྲིག་ཆགས་ཡོང་ཐབས་སུ་ང་ཚོས་འབད་བརྩོན་ཇི་ཙམ་བྱས་རུང། དབུས་འཐབ་ཕྱོགས་གཅིག་གྱུར་ལས་ཁུངས་ཀྱིས་དེ་དག་ལ་བཟང་ཕྱོགས་ཀྱི་ཡ་ལན་མེད་པར། མི་གཞན་གྱིས་ཆ་འཇོག་བྱས་མིན་ལ་མ་ལྟོས་པར་ཆེད་མངགས་འཛམ་གླིང་གང་སར་བདེན་པ་མིན་པའི་དྲིལ་བསྒྲགས་ཤུགས་ཆེ་སྤེལ་བཞིན་ཡོད། ཁྱད་པར་ཆོས་བྱེད་དགེ་འདུན་གྱི་སྡེ་དང་། དགོན་པ་གྲྭ་ཚང་ཁག་ལ་དམིགས་བསལ་སྡང་ཟུག་གི་ལས་དོན་རུ་ཁག་ཟེར་བའི་མི་སྣ་ཆེད་གཏོང་བྱས་ཏེ་ཆོས་ཀྱི་བྱ་ཆ་བར་དམ་བསྒྲགས་དང་སུན་གཙེ་ཐེ་བྱུས་གང་བྱུང་བྱེད་བཞིན་ཡོད་སྟབས། ཕྱི་ལོ་ ༢༠༠༩ ལོའི་ཕྱི་ཟླ་ ༣ ནས་བཟུང་བོད་ཀྱི་རྒྱལ་ས་ལྷ་ས་གཙོས་བོད་ཆོལ་ཁ་གསུམ་གྱི་ཁྱོན་ལ་སྔར་མ་བྱུང་བའི་བོད་མི་ལྔ་བཅུ་ང་གཅིག་གིས་རང་ལུས་མེར་སྲེག་བཏང་བའི་ཁྲོད་ནས་ ༤༡ འདས་གྲོངས་སུ་གྱུར་ཡོད། སྤྱིར་བསྟན་སྲིད་མི་རིགས་ཀྱི་དོན་དུ་ལུས་སྲོག་བློས་གཏོང་གནང་མཁན་ཡོངས་དང་ཁྱད་པར་གོང་གསལ་འདས་གསོན་རྣམས་དང་ཁོང་ཚོའི་ཕ་མ་ཉེ་འབྲེལ་ཚོ་གཙོ་བོར་གྱུར་བའི་འཛིན་བཟུང་བཙོན་འཇུག་གི་དམ་བསྒྲགས་འོག་ཚུད་པའི་གཞིས་བཞུགས་སེར་སྐྱ་མི་མང་ཡོངས་ལ་གདུང་སེམས་མཉམ་སྐྱེ་ཞུ་རྒྱུ་ཡིན།
དེར་བརྟེན་ཐེངས་འདིར་མཆོད་འབུལ་སྨོན་ལམ་གྱི་ཚོགས་མགོན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཆིབས་སྒྱུར་བཀའ་དྲིན་བསྐྱངས་པར་སྙིང་ཐག་པ་ནས་ཐུགས་རྗེ་བླ་མེད་དུ་ཆེ་ཞུས་པ་དང་ཆབས་ཅིག བོད་ཀྱི་ཆོས་ལུགས་དང་ཆོས་བརྒྱུད་ཆེན་པོ་བཞིའི་བླ་ཆེན་རྣམ་པ་དབུས་པའི་འདིར་ཕེབས་པའི་བླ་སྤྲུལ་རྣམ་པ་དང། སེར་སྐྱ་མི་མང་ཡོངས། དམིགས་བསལ་ཚོགས་ཆེན་གྱི་ཚོགས་བཅར་བ་ཡོངས་ལའང་ཐུགས་རྗེ་ཆེ་ཞུ་རྒྱུ་ཡིན། མཐའ་དོན་གཞིས་བཞུགས་བོད་མི་ཡོངས་ཀྱི་མངོན་འདོད་བོད་མིའི་རང་དབང་བསྐྱར་གསོ་དང། ༸གོང་ས་མཆོག་ཕ་ཡུལ་གངས་ཅན་གྱི་ལྗོངས་སུ་མྱུར་དུ་༸ཞབས་སོར་བདེ་བར་འཁོད་ཐུབ་རྒྱུའི་མཆོག་གསུམ་༸རྒྱལ་བ་རྒྱ་མཚོར་སྨོན་འདུན་ཤུག་དྲག་ཞུ་རྒྱུ་ཡིན། ཞེས་གསུང་བཤད་གནང་ཡོད། ཐེངས་འདིར་མཆོད་འབུལ་སྨོན་ལམ་སྐབས་དཔལ་ས་སྐྱ་བདག་ཁྲི་རིན་པོ་ཆེ་མཆོག་དང་། སྨན་རི་ཁྲི་འཛིན་རིན་པོ་ཆེ་མཆོག དགའ་ལྡན་ཁྲི་པ་རི་རྫོང་རིན་པོ་ཆེ་མཆོག སྟག་ལུང་རྩེ་སྤྲུལ་རིན་པོ་ཆེ་མཆོག བཅས་ཆེད་ཕེབས་གནང་ཡོད་པ་བཅས།།
