༢༠༡༢ ཟླ་ ༨ ཚེས་ ༡༨ རེས་གཟའ་སྤེན་པ།
༄༅། །ཕྱི་ལོ་ ༢༠༡༢ ཟླ་ ༨ ཚེས་ ༡༨ ཉིན་བོད་ཀྱི་དཔེ་མཛོད་ཀྱི་ཚོགས་ཁང་ནང་སྨོན་ལམ་བོད་ཀྱི་ཀུན་བཏུས་གློག་ཀླད་ཚིག་མཛོད་ཆེན་མོའི་སྒྲོམ་གཞི་གཏན་འབེབས་དང་འབྲེལ་བའི་མཁས་པའི་བགྲོ་གླེང་ཚོགས་ཡོད།
གོང་ཚེས་ཉིན་གྱི་སྔ་དྲོ་ཆུ་ཚོད་ ༩ པའི་ཐོག་སྐུ་མགྲོན་གཙོ་བོ་མཁས་དབང་ཟམ་གདོང་རིན་པོ་ཆེ་མཆོག་དང་ཀིརྟི་རིན་པོ་ཆེ་མཆོག དེ་བཞིན་བོད་མི་མང་སྤྱི་འཐུས་ཚོགས་གཙོ་ཚོགས་གཞོན་མཆོག་གིས་གཙོས་སྤྱི་འཐུས་རྒྱུན་ལས་རྣམ་པ། སྐུ་སྒེར་དྲུང་ཆེ། ལྷན་ཁང་ཁག་གི་དྲུང་ཆེ་རྣམ་པ། རྡ་སའི་ཉེ་འཁོར་དུ་གནས་པའི་ཤེས་ཡོན་ཅན་སོགས་ཁྱོན་མི་གྲངས་ ༨༠ བརྒལ་བ་ལྷན་འཛོམས་ཐོག་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་སྐུ་ཞབས་བློ་བཟང་སྨོན་ལམ་ལགས་ཀྱིས་བགྲོ་གླེང་ཚོགས་འདུའི་དགོས་དམིགས། དེ་བཞིན་ལས་ཁུངས་ཀྱི་དྲ་རྒྱ་ངོ་སྤྲོད་ཀྱི་གསུང་བཤད་གནང་། དེ་ནས་ཚིག་མཛོད་རྩོམ་སྒྲིག་པ་སྤྲོ་ཚིགས་ཆོས་གྲགས་ལགས་ཀྱིས་ཚིག་མཛོད་ནང་བརྡ་སྤྲོད་ཀྱི་དབྱེ་བ་དང་བརྡ་ཆད་དགར་ལུགས་སྐོར་དང་ཚིག་མཛོད་རྩོམ་སྒྲིག་འགན་འཛིན་འཇུ་བསྟན་སྐྱོང་ལགས་ཀྱིས་ཚིག་མཛོད་ནང་ཐ་སྙད་ལ་འགྲེལ་བཤད་རྒྱག་སྟངས་ཀྱི་ཚད་གཞིའི་སྐོར་ངོ་སྤྲོད་གནང་ཡོད། དེ་རྗེས་སྐུ་མགྲོན་གཙོ་བོ་བཀའ་ཟུར་ཀིརྟི་རིན་པོ་ཆེ་བློ་བཟང་བསྟན་འཛིན་འཇིགས་མེད་ཡེ་ཤེས་རྒྱ་མཚོ་མཆོག་དང་སྐུ་མགྲོན་གཙོ་བོ་བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་མཆོག་གིས་ལམ་སྟོན་གསུང་བཤད་གནང་གྲུབ་མཚམས་ཉིན་དགུང་ཚིགས་ཕུལ་ཡོད།
ཕྱེད་ཡོལ་ཆུ་ཚོད་ ༢ པའི་ཐོག་ཤེས་རིག་ལས་ཁུངས་ཀྱི་རྩོམ་སྒྲིག་འགན་འཛིན་ཀརྨ་སྨོན་ལམ་ལགས་ཀྱིས་ཚིག་མཛོད་རྩོམ་སྒྲིག་བྱ་ཕྱོགས་ཐད་ཉམས་མྱོང་དང་འབྲེལ་ནས་གསུང་བཤད་གནང་རྗེས་ཚིག་མཛོད་ཀྱི་སྒྲོམ་གཞི་སོགས་གོང་གསལ་བརྗོད་གཞི་ཁག་དང་འབྲེལ་བའི་བསམ་ཚུལ་བཏོན་པ་དང་དྲི་བ་དྲིས་ལན་གནང་གྲུབ་མཚམས་ཕྱེད་ཡོལ་ཆུ་ཚོད་ ༥ པའི་ཐོག་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་དྲུང་ཆེ་སྤྲོ་ཚིགས་ཆོས་གྲགས་ལགས་ཀྱིས་ཚོགས་འདུའི་མཇུག་སྡོམ་དང་འབྲེལ་ཐུགས་རྗེ་ཆེ་ཞུ་རྒྱུ་ཡིན་འདུག་པ་བཅས། །
