༢༠༡༢ ཟླ་ ༨ ཚེས་ ༣ རེས་གཟའ་པ་སངས།
༄༅། །ཕྱི་ལོ་ ༢༠༡༢ ཟླ་ ༨ ཚེས་ ༢ ཉིན་གྱི་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་ མཆོག་གིས་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་གི་གཞིས་ཆགས་སུ་འཚམས་གཟིགས་གནང་ཡོད།
མོན་གྷོ་གཏན་སློབ།
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཐོག་མར་བཀའ་ཁྲི་མཆོག་གིས་དབུས་གཏན་ཉིན་སློབ་གྲྭར་འཚམས་གཟིགས་སུ་ཕེབས་ཏེ་དགེ་ལས་སློབ་རྣམས་ལ་མི་སུ་དང་སུ་ཞིག་ཡིན་རུང་རང་ཉིད་ཀྱི་འབད་བརྩོན་བྱས་པ་དང་ཆབས་ཅིག་གྲུབ་འབྲས་མི་དམན་པ་ཞིག་ཐོབ་རྒྱུར་རང་ཉིད་ལ་ཡིད་ཆེས་དང་བློ་སྟོབས་ལྡན་པའི་སྒོ་ནས་སློབ་སྦྱོང་བྱེད་དགོས་སྐོར་སོགས་ཀྱི་གསུང་བཤད་གནང་ཡོད།
དེ་ནས་བཀའ་ཁྲི་མཆོག་གིས་སློབ་ཕྲུག་ཚོའི་དྲི་བར་ལན་འདེབས་གནང་དོན། སྤྱིར་བཏང་ཤེས་ཡོན་ཐོག་ཆ་མཚོན་ན་རྒྱ་གར་ནང་ཤེས་ཡོན་གྱི་འགྲོ་སྟངས་ལ་འགྱུར་བ་གཏོང་གི་ཡོད། དེ་བཞིན་སློབ་ཕྲུག་ཚོས་དྲ་རྒྱའི་ནང་བྲིས་ཡོད་པ་དེ་ནས་ཕབ་བཤུས་བྱས་ཏེ་རང་ཉིད་ཀྱི་ཨང་རིམ་མཐོ་རུ་བཏང་བ་ཙམ་གྱིས་འགྲིག་ཐབས་མེད། བྱ་སྤྱོད་དེ་རིགས་ཨ་རིའི་ནང་ལ་ཆ་མཚོན་ནའང་ཧ་ཅང་ཐབས་སྐྱོ་པོ་རྩི་བཞིན་ཡོད། དྲ་རྒྱའི་ནང་ནས་ཕབ་བཤུས་ཐེངས་གཅིག་གཉིས་ཤིག་བྱས་པ་ཙམ་གྱིས་རྒྱལ་ཁབ་ཀྱི་སྲིད་འཛིན་ཡིན་ཡང་ལས་གནས་ནས་དགོངས་ཞུ་བྱེད་དགོས་པའི་གནས་ཚུལ་དེ་འདྲ་འཛམ་གླིང་སྟེང་བྱུང་མྱོང་ཡོད། ནོར་འཁྲུལ་ཐེངས་གཅིག་གིས་རང་ཉིད་ཀྱི་མི་ཚེ་གང་པོ་འཕྲོ་བརླག་མ་བཏང་བར་སྔ་ས་ནས་སློབ་སྦྱོང་གི་ལམ་ཁ་མ་ནོར་བ་བྱ་རྒྱུ་གལ་ཆེན་པོ་ཡིན། ཞེས་ལན་འདེབས་གནང་ཡོད།
མོན་གྷོ་རྒས་གསོ་ཁང།
དེ་བཞིན་སློབ་ཕྲུག་གཞན་ཞིག་གི་དྲི་བར་ལན་འདེབས་གནང་དོན། ང་ཚོས་ཆོས་བྱེད་མུས་ལ་སྲིད་ཀྱི་བྱ་བ་སྒྲུབ་ཆོག་གི་རེད་བསམ་གྱི་ཡོད། བོད་ཀྱི་ནང་པ་སངས་རྒྱས་ཀྱི་ཆོས་དེ་བཞིན་རྨོངས་དད་མིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ལ་རྟེན་ནས་དེང་སྐབས་འཛམ་གླིང་ནང་གི་ཚན་རིག་མཁས་པ་མང་དག་ཅིག་གིས་ནང་ཆོས་ལ་དོ་སྣང་སྔར་ལྷག་བྱས་པ་བརྒྱུད་ནས་བོད་དོན་ལ་རྒྱབ་སྐྱོར་གནང་མཁན་ཇེ་མང་དུ་ཡོང་བཞིན་ཡོད། ཅེས་ལན་འདེབས་གནང་ཡོད།
ལྷག་པར་བཀའ་ཁྲི་མཆོག་གིས་རང་ལུས་མེར་སྲེག་སྐོར་གྱི་དྲི་བར་ལན་འདེབས་གནང་དོན། བོད་མིའི་རང་ལུས་མེར་སྲེག་གི་གནད་དོན་དེ་མ་འོངས་པར་གང་འདྲ་ཞིག་ཆགས་ཀྱི་རེད་དམ་ཞེས་པ་དེ་ཕྱོགས་གཅིག་ནས་བརྗོད་ཐུབ་རྒྱུ་ཧ་ཅང་ཁག་པོ་རེད། གང་ལ་ཞེ་ན། དོན་གྱི་བདག་པོ་བོད་ནང་བཞུགས་པའི་བོད་མི་རྣམས་ཡིན། ང་ཚོའི་ངོས་ནས་རང་ལུས་མེར་སྲེག་གཏོང་མཁན་དེ་འདྲ་མང་པོ་ཞིག་ཡོང་གི་རེད་བསམ་གྱི་མེད་ཀྱང་མང་པོ་ཞིག་བྱུང་ཡོད། རྒྱ་ནག་གཞུང་གིས་མཁྲེགས་བཟུང་གི་སྲིད་བྱུས་བཟུང་སྟེ་བོད་མིར་མནར་གཅོད་གཏོང་རྒྱུ་སོགས་མུ་མཐུད་ལག་བསྟར་བྱས་ན་དེར་ངོ་རྒོལ་དང་ལས་འགུལ་སྤེལ་མཁན་མང་དུ་འགྲོ་སྲིད་པ་ཞིག་རེད། བོད་ནང་གི་བོད་མིའི་མངོན་འདོད་དང་རེ་བ་གང་ཡིན་པ་དེར་ང་ཚོ་བཙན་བྱོལ་དུ་ཡོད་པའི་བོད་མི་ཚོས་རྒྱབ་སྐྱོར་དང་ལས་འགུལ་སྤེལ་རྒྱུ་ང་ཚོའི་འགན་འཁྲི་རེད། ཅེས་ལན་འདེབས་གནང་ཡོད།
མོན་གྷོ་སྨན་ཁང།
དེ་བཞིན་བཀའ་ཁྲི་མཆོག་གིས་ས་གནས་ཀྱི་གཞིས་གྲོང་ཁག་ལ་འཚམས་གཟིགས་གནང་བ་དང་ཆབས་ཅིག་ཕྱེད་ཡོལ་གདན་ས་འབྲས་སྤུངས་ཀྱི་བླ༌སྤྱིའི་འདུ་ཁང་ནང་དགེ་འདུན་འདུས་མང་ཡོངས་ལ་གསུང་བཤད་གནང་ཡོད་པ་བཅས། །
