༢༠༡༢ ཟླ་ ༨ ཚེས་ ༢༨ རེས་གཟའ་མིག་དམར།
༄༅། །ཇར་མན་གྱི་གྲོང་ཁྱེར་མུ་ནིག་ནང་རྟེན་གཞི་བྱས་པའི་བོད་དོན་རྒྱབ་སྐྱོར་ཚོགས་པའི་ས་གནས་ཡན་ལག་གིས་གོ་སྒྲིག་འོག་བོད་དོན་རྒྱབ་སྐྱོར་བ་མི་གྲངས་ ༣༠ ཙམ་ནས་མུ་ནིག་གྲོང་ཁྱེར་གྱི་ཁྲོམ་གཞུང་ཐོག་བོད་ནང་རང་དབང་དགོས་པ་དང་བོད་མི་རང་ལུས་གཏོང་མེར་སྲེག་གཏོང་མཁན་འདས་གསོན་ཡོངས་ཀྱི་མཚན་གཞུང་མི་མང་ལ་བརྒྱུད་བསྒྲགས་ཀྱིས་བོད་དོན་རྒྱབ་སྐྱོར་ཀྱི་ལས་འགུལ་སྤེལ་འདུག
ཕྱི་ལོ་ ༢༠༡༢ ཟླ་ ༨ ཚེས་ ༢༥ ཉིན་ལས་འགུལ་དེའི་སྐོར་སྤྱི་ཁྱབ་འགན་འཛིན་མཆོག་གིས་གསར་འགྱུར་བརྒྱུད་ལམ་ཁག་ནང་གསུང་དོན། ང་ཚོས་སྤེལ་བའི་ལས་འགུལ་འདིའི་དམིགས་ཡུལ་གཙོ་བོ་ཇར་མན་མི་མང་ལ་ད་བར་བོད་ནང་གི་བོད་མི་ ༤༩ ནས་བོད་ཀྱི་བདེན་དོན་ཆེད་རང་ལུས་མེར་སྲེག་བཏང་སྟེ་བོད་ལ་རང་དབང་ཐོབ་ཆེད་འཐབ་རྩོད་གནང་བཞིན་ཡོད་པ་དེ་དག་དྲིལ་བསྒྲགས་བྱེད་རྒྱུ་ཡིན། སྤྱིར་བཏང་རྒྱ་ནག་གཞུང་ནས་བོད་ལ་བཟུང་བའི་གདུག་རྩུབ་ཅན་གྱི་སྲིད་བྱུས་ལ་འགྱུར་བ་ཞིག་མ་བཏང་བར་དུ་བོད་མིའི་རང་ལུས་མེར་བསྲེགས་ཀྱི་གནད་དོན་མཚམས་ཆད་རྒྱུ་ཧ་ཅང་ཁག་པོ་ཡིན། དེར་བརྟེན་ད་ལྟའི་ཆར་བོད་ནང་གི་གནས་སྟངས་ཛ་དྲག་ཅན་ཞིག་ཆགས་ཡོད་སྟབས། ཇར་མན་གཞུང་གི་ཆབ་སྲིད་མི་སྣ་རྣམས་ནས་བོད་དོན་ཐོག་ཐུགས་ཁུར་གང་ལེགས་གནང་རྒྱུའི་རེ་འདུན་ཞུ་རྒྱུ་ཡིན། དེ་བཞིན་ལས་འགུལ་འདི་བརྒྱུད་ནས་ང་ཚོས་རྒྱ་ནག་གཞུང་ནས་བོད་ཀྱི་གནད་དོན་གང་ཅིའི་ཐོག་སྦས་གསང་རྩ་བ་ནས་མེད་པར་ཕྱི་གསལ་ནང་གསལ་བྱེད་དགོས། ལྷག་པར་བོད་ཀྱི་ས་ཁུལ་གང་སར་རྒྱལ་སྤྱིའི་རང་དབང་ལྡན་པའི་སྐུ་ཚབ་དང་གསར་འགོད་པ་སོགས་ཆེད་བསྐྱོད་བྱེད་བཅུག་དགོས་པ་མ་ཟད། ཁོང་རྣམས་ལ་བོད་ནང་གི་ད་ལྟའི་ཛ་དྲག་གནས་སྟངས་རྟོག་ཞིབ་བྱེད་བཅུག་དགོས་པའི་རེ་འདུན་འདོན་བཞིན་ཡོད། དེ་བཞིན་འཛམ་གླིང་མཉམ་འབྲེལ་རྒྱལ་ཚོགས་ནས་ཀྱང་བོད་ནང་གི་ཛ་དྲག་གནས་སྟངས་ཐོག་འགན་ཁུར་རྐང་ལེན་གནང་དགོས་པའི་རེ་འདུན་ཡང་ཞུ་བཞིན་ཡོད། ཅེས་གསུངས་འདུག་པ་བཅས། །