༢༠༡༢ ཟླ་ ༧ ཚེས་ ༢༦ རེས་གཟའ་ཕུར་བུ།

བུ་ཆུང་ཚེ་རིང་ལགས།

༄༅། །ཕྱི་ལོ་ ༢༠༡༢ ཟླ་ ༧ ཚེས་ ༢༥ ཉིན་ཨ་རིའི་གྲོས་ཚོགས་འོག་མའི་ཕྱི་འབྲེལ་ལས་དོན་ཚོགས་ཆུང་ House Committee on Foreign Affairs ནང་བོད་དོན་ཉན་ཞིབ་གནང་སྐབས་བོད་མིའི་སྐུ་ཚབ་རྒྱལ་སྤྱིའི་བོད་དོན་ལས་འགུལ་ཁང་ (ICT) གི་ཚོགས་གཞོན་བུ་ཆུང་ཚེ་རིང་ལགས་ཀྱིས་བོད་མིའི་འགྲོ་བ་མིའི་ཐོབ་ཐང་དང་འབྲེལ་ནས་གཙོ་བོ་གནད་དོན་དྲུག་ཐོག་ཞིབ་ཕྲ༌གསལ་བཤད་ཞུས་འདུག དེ་ཡང་ཉན་ཞིབ་གཙོ་སྐྱོང་བ་ལྕམ་སྐུ་ཨེ་ལི་ན་རོ་སི་ལེ་ཊི་ནན་མཆོག་ Ileana Ros-Lehtinen དབུ་བཞུགས་ཐོག

༡༽རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་ལ་མུ་མཐུད་རྩིས་མེད་རྡོག་རོལ་གཏོང་བཞིན་པར་བརྟེན་བོད་ནང་རང་ལུས་མེར་སྲེག་གི་དོན་རྐྱེན་འབྱུང་བཞིན་པ།

༢༽བོད་ཀྱི་གནད་དོན་དང་བོད་མིའི་དངོས་ཡོད་དཀའ་ངལ་གྲོས་མོལ་གྱི་ལམ་ནས་སེལ་མ་ཐུབ་པར་བརྟེན། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་བརྟན་ལྷིང་ཐོག་ཉེན་ཁ་འཕྲད་བཞིན་པ།

༣༽བོད་ཀྱི་བདག་དབང་རྒྱ་ནག་གཞུང་ལ་ཡོད་པའི་སྲིད་བྱུས་འཛིན་བཞིན་པ་དེར་རྒྱལ་ཁབ་གཞན་གྱིས་ཐེ་བྱུས་མི་ཡོང་ཆེད། རྒྱལ་སྤྱིའི་ཞི་བདེ་བརྟན་ལྷིང་དང་འབྲེལ་བའི་སི་རི་ཡའི་གནད་དོན་ཐོག་རྒྱ་ནག་གཞུང་གིས་རྒྱབ་སྐྱོར་མ་བྱས་པའི་བྱ་སྤྱོད།

༤༽རྒྱ་ནག་གཞུང་གིས་བལ་ཡུལ་གྱི་ནང་སྲིད་ལ་ཐེ་བྱུས་བྱས་ཏེ་ཁུལ་དེར་བོད་མི་སྐྱབས་བཅོལ་བའི་ཐོག་དམ་བསྒྲགས་བྱ་རྒྱུར་བལ་པོའི་སྲིད་གཞུང་ལ་གནོན་ཤུགས་སྤྲད་པ།

༥༽རྒྱ་ནག་གི་འཇམ་པོའི་སྟོབས་ཤུགས་དེང་སྐབས་རྒྱལ་སྤྱིའི་ནང་ཤུགས་ཆེ་རུ་འགྲོ་བཞིན་ཡོད་པ་དང་། ལྷག་པར་ཁུང་རྩི་བསྟི་གནས་ཁང་ Confucius Institutes ཟེར་བ་འཛམ་གླིང་ས་ཕྱོགས་གང་གསར་བཙུགས་ཏེ་རྒྱ་ནག་གི་སྲོལ་རྒྱུན་རིག་གཞུང་གི་སློབ་གཉེར་ཁང་དེ་དག་ནང་རྒྱ་ནག་གཞུང་གི་སྲིད་བྱུས་ཁྱབ་བརྡལ་བྱེད་བཞིན་པ་མ་ཟད། བོད་མིའི་རིག་གཞུང་དང་འབྲེལ་བའི་སྐོར་ལ་སྐད་ཆ་ཤོད་རྒྱུར་དམ་བསྒྲགས་བྱེད་བཞིན་ཡོད་པ།

༦༽རྒྱ་ནག་གཞུང་གིས་བོད་ཀྱི་རྒྱུག་ཆུ་དང་ཆུ་ཆེན་ཁག་ལ་ཆུ་མཛོད་བརྒྱབ་པའམ་ཁ་བསྒྱུར་བྱས་པར་བརྟེན་འབྲེལ་ཡོད་ས་ཁུལ་ནང་ཆུའི་དོན་དུ་རྙོག་གྲ་ལང་རྒྱུའི་ཉེན་ཁ་ཡོད་པ།

བཅས་གནད་དོན་དྲུག་ཐོག་སྤྱིར་བུ་ཆུང་ཚེ་རིང་ལགས་ཀྱིས་སྐབས་དེར་གསལ་བཤད་སྙིང་བསྡུས་ཤིག་གནང་ཡོད་ཀྱང། ཞིབ་ཕྲ་གསལ་བཤད་ཡིག་ཐོག་ཏུ་བཀོད་པ་རྣམས་སྐབས་དེར་འགྲེམས་སྤེལ་གནང་ཡོད་འདུག་པ་བཅས།།