༢༠༡༢ ཟླ་ ༧ ཚེས་ ༡༧ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༡༦ ཉིན་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་ཨ་རིའི་རྒྱལ་ས་ཝ་ཤིང་ཊོན་དུ་ཕེབས་འབྱོར་བྱུང་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། བཀའ་ཁྲི་མཆོག་རི་ལིའི་འབབ་ཚུགས་སུ་ཕེབས་འབྱོར་སྐབས་རྒྱལ་སའི་མངའ་ཁུལ་གྱི་བོད་མིའི་སྤྱི་མཐུན་ཚོགས་པའི་ཚོགས་གཙོས་དབུས་རྒྱུན་ལས་དང༌། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས་སོགས་ཀྱིས་ཕེབས་བསུ་ཞུས་འདུག བཀའ་བློན་ཁྲི་པ་མཆོག་གི་ལྷན་དུ་བྱང་ཨ་རིའི་སྐུ་ཚབ་དོན་གཅོད་བློ་བཟང་སྙན་གྲགས་ལགས་ཀྱང་ཕེབས་ཡོད། བཀའ་ཁྲི་མཆོག་ཨ་རིའི་ནང་ཉིན་བཞིའི་རིང་ལས་འཆར་ཁོངས་སུ།  ཨ་རིའི་སྲིད་འཛིན་ལས་ཁུངས་དང་།  ཕྱི་སྲིད་ལས་ཁུངས་ཀྱི་འབྲེལ་ཡོད་དཔོན་རིགས་ཁག་གཅིག དེ་བཞིན་གྲོས་ཚོགས་འཐུས་མི་སོགས་འབྲེལ་ཡོད་མི་སྣ་ཁགཅིག་དང་མཇལ་འཕྲད་གནང་རྒྱུ་ཡིན་འདུག
ཕྱོགས་མཚུངས་རེས་གཟའ་ཕུར་བུའི་ཉིན་རྒྱལ་སའི་མངའ་ཁུལ་གྱི་བོད་མི་ཚོ་ཐུག་འཕྲད་ཀྱིས་གསུང་བཤད་དང་། བཅར་འདྲི་དང་ལེན་གནང་རྒྱུ་ཡིན་འདུག་པ་བཅས། །