༢༠༡༢ ཟླ་ ༧ ཚེས་ ༤ རེས་གཟའ་ལྷག་པ།
༄༅། །འདི་གར་ཨོ་སི་ཊོ་ལི་ཡའི་སྐུ་ཚབ་དོན་གཅོད་ལས་ཁུངས་ཀྱི་རྒྱ་རིགས་འབྲེལ་མཐུད་པ་ཟླ་སྒྲོན་ལགས་ཀྱིས་ཕྱི་ལོ་ ༢༠༡༢ ཟླ་ ༧ ཚེས་ ༤ ཉིན་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་མཁས་དབང་བློ་བཟང་སེང་གེ་མཆོག་ཕྱི་ཟླ་ ༦ ཚེས་ ༢༤ ནས་ཕྱི་ཟླ་ ༧ ཚེས་ ༡ བར་ཉིན་གྲངས་བདུན་རིང་ཨོ་སི་ཊོ་ལི་ཡར་གཞུང་འབྲེལ་འཚམས་གཟིགས་རིང་། གྲོས་ཚོགས་ཀྱི་ཚོགས་གཙོས་དབུས་གྲོས་ཚོགས་གོང་འོག་གཉིས་ཀྱི་འཐུས་མི་དང་ཆབ་སྲིད་ཚོགས་པའི་འཐུས་མི། དེ་བཞིན་ལྗང་གུ་ཚོགས་པའི་ཚོགས་གཙོས་དབུས་གྲོས་ཚོགས་འཐུས་མི་བཞི་བཅུ་ལྷག་དང་མཇལ་འཕྲད་གནང་བ་མ་ཟད་། ཨོ་སི་ཊོ་ལི་ཡའི་རྒྱལ་ཡོངས་གསར་འགོད་ལྷན་ཚོགས་སུ་བོད་ནང་གི་ད་ལྟའི་ཛ་དྲག་གནས་སྟངས་ངོ་སྤྲོད་དང་གསར་འགོད་པའི་དྲི་བར་ལན་འདེབས་གནང་ཡོད། བཀའ་ཁྲི་མཆོག་གིས་ད་དུང་ཨོ་སི་ཊོ་ལི་ཡའི་གྲོང་ཁྱེར་མེལ་བྷོན་དང་སིད་ནི་ཁུལ་གནས་རྒྱ་མི་རིགས་དང་མཇལ་མོལ་ཡང་གནང་ཡོད་།
དེ་ཡང་ཕྱི་ཟླ་ ༦ ཚེས་ ༢༤ ཉིན་བཀའ་ཁྲི་མཆོག་མེལ་བྷོན་ཁུལ་གནས་རྒྱ་རིགས་གྲངས་ ༥༠ ལྷག་དང་མཇལ་མོལ་སྐབས། རང་ཉིད་ལོ་མང་རིང་རྒྱ་ནག་ནང་གི་འགྲོ་བ་མིའི་ཐོབ་ཐང་དང་མང་གཙོའི་གནད་དོན་ལ་ཞིབ་འཇུག་གནང་ཡོད་ལ། རང་དབང་ནི་འགྲོ་བ་མིའི་གཞི་རྩའི་ཐོབ་ཐང་ཡིན་སྟབས། རྒྱ་ནག་ནང་རིམ་བཞིན་མང་གཙོའི་ལམ་ལུགས་སུ་བསྐྱོད་རྒྱུར་གལ་ཆེ་ཡིན་སྐོར་དང་། བཀའ་ཁྲི་མཆོག་གིས་བཀའ་ཤག་གསར་པའི་སྲིད་བྱུས་དང་བོད་ནང་རང་ལུས་མེར་སྲེག་བཏང་བ་སོགས་ཛ་དྲག་གནས་སྟངས་སྐོར་ངོ་སྤྲོད་གནང་རྗེས་རྒྱ་རིགས་ཚོས་དྲི་བར་ལན་འདེབས་དང་གསལ་བཤད་གནང་ཡོད།
ཕྱི་ཟླ་ ༦ ཚེས་ ༣༠ ཉིན་སིད་ནིའི་ཁུལ་དུ་ཚོགས་པའི་རྒྱ་ནག་མང་གཙོ་ཚོགས་པའི་རྒྱལ་སྤྱིའི་ཚོགས་ཆེན་གྱི་ཚོགས་བཅར་བའི་གསོལ་སྟོན་ཞིག་བཤམས་ཡོད་པ་དང་། བཀའ་ཁྲི་མཆོག་དམིགས་གསལ་གདན་ཞུས་ལྟར་ཆེད་བཅར་ཞུས་ཏེ་གསུང་བཤད་གནང་སྐབས། བཙན་བྱོལ་བོད་མིའི་མང་གཙོའི་ལམ་ལུགས་དར་འཕེལ་ཕྱིན་ཏེ་ད་ཆ་འཐུས་སྒོ་ཚང་བའི་མང་གཙོའི་ལམ་ལུགས་སུ་སྐྱོད་བཞིན་ཡོད་པ་དང་། ང་ཚོས་རྒྱ་ནག་གཞུང་གི་རྩ་ཁྲིམས་དང་གྲངས་ཉུང་མི་རིགས་ཀྱི་ཁྲིམས་ལུགས་དང་མཐུན་པའི་ཐོག་ནས་རང་སྲིད་རང་སྐྱོང་རྩོད་ཀྱི་ཡོད་ནའང་། ད་བར་བཟང་ཕྱོགས་ཀྱི་ལན་འདེབས་གང་ཡང་བྱས་མེད། རྒྱ་ནག་གཞུང་གི་ཧོང་ཀོང་དང་མ་ཁའོ་གཉིས་ལ་རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་བྱུས་ལག་བསྟར་བྱས་ཡོད་པ་མ་ཟད། ཐེ་ཝན་ལ་ཚད་མཐོའི་ཆབ་སྲིད་ཀྱི་གནས་བབས་སྤྲོད་རྒྱུའི་ཁས་ལེན་བྱས་རུང་། བོད་ལ་དེ་ལྟར་མིང་དོན་མཚུངས་པའི་རང་སྲིད་རང་སྐྱོང་གི་གནས་བབས་སྤྲོད་རྒྱུར་འདོད་པ་མེད་པ་ནི་རྒྱ་རིགས་མིན་སྟབས། ཡིད་ཆེད་རྩ་བ་ནས་བྱེད་ཀྱི་མེད་པ་ལས་དེ་མིན་རྩ་ཁྲིམས་དང་རྒྱབ་འགལ་འགྲོ་གི་མེད་པ་སོགས་ཀྱི་ལན་འདེབས་གནང་ཡོད་།
གྲོང་ཁྱེར་སི་ཌི་ནིའི་རྒྱ་ནག་མང་གཙོ་ཚོགས་པའི་རྒྱལ་སྤྱིའི་ཚོགས་ཆེན་གོ་སྒྲིག་གནང་མཁན་སྐུ་ཞབས་ཀའོ་ཅན་ Gao Jian ལགས་ཀྱིས་གསུང་བཤད་གནང་སྐབས། བོད་མིས་མང་གཙོའི་ལམ་ལུགས་ཐོག་ནས་བོད་མིའི་ཆབ་སྲིད་ཀྱི་དབུ་ཁྲིད་གསར་པ་བཀའ་ཁྲི་བློ་བཟང་སེང་གེ་འདེམས་ཐོན་བྱུང་བ་ནི། བཙན་བྱོལ་བོད་མིའི་ཆབ་སྲིད་ལས་རིགས་གོམ་ལྟབས་གསར་པ་ཞིག་སྤོས་པ་མ་ཟད། རྒྱ་ནག་གཞུང་ལ་ཡང་བརྡ་ལན་ཆེན་པོ་ཞིག་བཏང་ཡོད། དེ་ནི་བོད་མི་རྣམས་རང་སོ་སོའི་འཐུས་སྒོ་ཚང་བའི་མང་གཙོའི་སྒྲིག་སྲོལ་ལྡན་ཡོད་པ་རེད་ཅེས་དང་། རྒྱ་ནག་གཞུང་གི་བོད་ནང་དྲག་པོའི་སྲིད་བྱུས་ཇེ་སྡུག་ཏུ་བཏང་བའི་རྐྱེན་གྱིས་ད་བར་བོད་མི་ ༤༢ ལྷག་རང་ལུས་མེར་སྲེག་བཏང་བའི་ཡ་ང་བའི་བྱ་སྤྱོད་དེས་རྒྱ་མི་རིགས་གཙོས་པའི་རྒྱལ་སྤྱིའི་ཁྲོད་ནས་དོ་སྣང་དང་གདུང་སེམས་མཉམ་སྐྱེ་དགོས་པའི་འབུལ་སྐུལ་ཡང་ཞུས་གནང་ཡོད། ཉིན་རྒྱབ་བཀའ་ཁྲི་མཆོག་ད་དུང་སིད་ནི་ཁུལ་གནས་རྒྱ་རིགས་མི་གྲངས་ ༦༠ ལྷག་དང་མཇལ་མོལ་གནང་སྟེ། བཀའ་ཤག་གསར་པའི་སྲིད་བྱུས་དང་བོད་ནང་གི་གནད་དོན་ངོ་སྤྲོད་གནང་བ་མ་ཟད། དྲི་བ་ཁག་ལ་ལན་འདེབས་དང་གསལ་བཤད་ཡང་གནང་ཡོད་།
བཀའ་བློན་ཁྲི་པ་བློ་བཟང་སེང་གེ་མཆོག་ཨོ་སི་ཊོ་ལི་ཡར་འཚམས་གཟིགས་རིང་ད་དུང་མེལ་བྷོན་Deakin University དང་། ཀེན་བྷེ་ར ANU ། སིད་ནི་ UTS བཅས་གྲོང་ཁྱེར་ཆེ་ཁག་གསུམ་ནང་གི་མཐོ་སློབ་ཁག་དང་རྒྱ་རིགས་མཁས་དབང་། རྒྱ་ནག་གནད་དོན་གྱི་མཁས་དབང་ལྷན་བགྲོ་གླེང་ལྷུག་པོ་གནང་ཡོད་པ་བཅས།།
