༢༠༡༢ ཟླ་ ༧ ཚེས་ ༡༩ རེས་གཟའ་ཕུར་བུ།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༡༨ ཉིན་༸གོང་ས་༸སྐྱབས་མགོན་ཆེན་པོ་མཆོག་ཇ་མུ་ཀ་ཤི་མིར་མངའ་སྡེ་ཁུལ་གྱི་མཛད་འཕྲིན་ཁག་ལེགས་པར་གྲུབ་རྗེས་དེ་ཉིན་གྱི་སྔ་དྲོ་ཆུ་ཚོད་ ༡༠།༢༠ ཙམ་ལ་དྭགས་ཀྱི་རྒྱལ་ས་སླེའི་གནམ་ཐང་དུ་༸ཞབས་སོར་བདེ་བར་འཁོད་ཡོད།
དེ་ཡང་༸གོང་ས་མཆོག་ལ་དྭགས་སླེ་གནམ་ཐང་དུ་༸ཞབས་སོར་འཁོད་སྐབས་ལ་དྭགས་ནང་པའི་ཆོས་ཚོགས་ཀྱི་ཚོགས་གཙོ་དང། དགོན་པའི་ཆོས་ཚོགས་ཀྱི་ཚོགས་གཙོ། ཡུལ་སྐོར་སྤྲོ་འཆམ་པའི་བློན་ཆེན་ངག་དབང་རིགས་འཛིན་ཇོ་ར་མཆོག དེ་བཞིན་ལ་དྭགས་ཡར་རྒྱས་ཚོགས་པའི་འཐུས་མི་རྣམ་པ། བླ་སྤྲུལ་རྣམ་པ། ས་གནས་ཀྱི་ཆབ་སྲིད་ཚོགས་པ་ཁག་གཅིག་གི་སྐུ་ཚབ་རྣམ་པ་སོགས་ཀྱིས་ཕེབས་བསུ་གཟབ་རྒྱས་ཞུས་ཡོད། དེ་བཞིན་མགོན་པོ་གང་ཉིད་མཆོག་གནམ་ཐང་ནས་སླེའི་ཕོ་བྲང་དུ་ཆིབས་སྒྱུར་སྐབས་ལམ་བར་དུ་བོད་རིགས་དང་ཡུལ་པ་སོགས་དད་ལྡན་ཆོས་ཞུ་བ་རྣམས་ཀྱིས་རུ་བསྟར་བསྒྲིགས་ནས་ལག་ཏུ་མཇལ་དར་ཐོགས་ཏེ་དགའ་དད་སྤྲོ་གསུམ་གྱིས་ཕེབས་བསུ་གཟབ་རྒྱས་ཞུས་ཡོད།
དེ་ནས་༸གོང་ས་མཆོག་བཞུགས་ཁྲི་རིན་པོ་ཆེར་༸ཞབས་སོར་འཁོད་མཚམས་ལ་དྭགས་སུ་གདན་ཞུའི་གསོལ་འདེབས་ཞུ་མཁན་གནད་ཡོད་མི་སྣས་མཎྜལ་རྟེན་གསུམ་འདེགས་འབུལ་ཞུས། སྐབས་དེར་༸གོང་ས་མཆོག་གིས་ལ་དྭགས་ནང་གི་འཛུགས་སྐྲུན་ཡར་རྒྱས་དང། དེ་བཞིན་ཆུ་གློག་གི་གོད་ཆག་ཕོག་པ་ཚོར་ཉམ་གསོའི་ལས་དོན་སོགས་ཀྱི་སྐོར་བཀའ་སློབ་སྩལ་ཡོད་པ་མ་ཟད། ཧི་མ་ལ་ཡའི་རི་རྒྱུད་ཀྱི་མི་མང་རྣམས་ལ་བོད་ཀྱི་ནང་ཆོས་མི་ཉམས་རྒྱུན་འཛིན་དང་ཉམས་པ་སླར་གསོའི་འགན་ཁུར་དམིགས་བསལཁོང་རྣམ་པར་ཡང་་ཡོད་སྐོར་བཀའ་སློབ་ཕེབས་ཡོད། ཐེངས་འདི་༸གོང་ས་མཆོག་ལ་དྭགས་སུ་གདན་ཞུའི་གསོལ་འདེབས་ཞུ་མཁན་གཙོ་བོ་ལ་དྭགས་ས་གནས་ནང་པའི་ཆོས་ཚོགས་དང་དགོན་པའི་ཆོས་ཚོགས་གཉིས་ཡིན་འདུག་པ་བཅས།།
