༢༠༡༢ ཟླ་ ༦ ཚེས་ ༡༤ རེས་གཟའ་ཕུར་བུ།
༄༅། །འདི་གར་ཨ་རིའི་དོན་ཁང་གི་རྒྱ་རིགས་འབྲེལ་འཐུད་པ་དྲུང་འཕར་ཀུན་དགའ་བཀྲ་ཤིས་ལགས་ཀྱིས་བཏང་གནས་ནང་འཁོད་དོན། ཉེ་ཆར་ཨ་རིའི་རྒྱལ་ས་ཝ་ཤིང་ཊོན་དུ་བོད་ནང་ངལ་རྩོལ་བསྒྱུར་བཀོད། ཅེས་པའི་བོད་སྐོར་གྱི་ཚོགས་འདུ་ཞིག་སྐོང་ཚོགས་བྱས་ཡོད་པ་དང༌། ཚོགས་འདུ་གོ་སྒྲིག་བྱེད་མཁན་ངལ་རྩོལ་བསྒྱུར་བཀོད་ཐེབས་རྩ་ཁང་ནས་གདན་ཞུས་གནང་བ་བཞིན་ཨ་རིའི་སྐུ་ཚབ་དོན་གཅོད་བློ་བཟང་སྙན་གྲགས་ལགས་ཀྱིས་ཚོགས་འདུ་དབུ་འབྱེད་མཛད་སྒོར་གསུང་བཤད་གནང་ཡོད།
བོད་དོན་དང་འབྲེལ་བའི་ཚོགས་འདུ་དེར་བོད་ནང་གི་ངལ་རྩོལ་བསྒྱུར་བཀོད་སྐོར་བཀའ་མོལ་གནང་མཁན་གྱི་གྲས་སུ།
ཨ་རིའི་གྲོས་ཚོགས་འཐུས་མི་སྐུ་ཞབས་རི་ཆཱཌ་ཝུལྤ་མཆོག
དེ་སྔ་རྒྱ་ནག་གཞུང་གི་བཙོན་ཁང་ནང་དངོས་སུ་དཀའ་སྡུག་མྱངས་མྱོང་མཁན་བཞུགས་སྒར་རྡ་རམ་ས་ལ་ནས་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་གཞོན་པ་ཆབ་སྲིད་བཙོན་ཟུར་འཇམ་དཔལ་སྨོན་ལམ་ལགས་དང༌། སྒྲོལ་དཀར་སྐྱབས་ལགས། གངས་ལྷ་མོ་ལགས། ཀླུ་མཁར་བྱམས་ལགས། ཕྱི་ལོ་ ༢༠༠༨ ལོའི་ས་བྱི་ཞི་རྒོལ་ཆེན་མོའི་ངོ་རྒོལ་ལས་འགུལ་ནང་ཞུགས་མཁན་ཚེ་དབང་དོན་གྲུབ་ལགས། ཨ་རིའི་གྲོང་ཁྱེར་སྦོ་སི་ཊོན་ནས་ཆབ་སྲིད་བཙོན་ཟུར་ངག་དབང་གསང་སྒྲོལ་ལགས། ཝ་ཤིང་ཊོན་ནས་ཆབ་སྲིད་བཙོན་ཟུར་ཐུབ་བསྟན་མཁས་བཙུན་ལགས་བཅས་གདན་ཞུ་གནང་ཡོད།
ཚོགས་འདུ་དབུ་འབྱེད་མཛད་སྒོའི་སྐུ་མགྲོན་གཙོ་བོའི་གྲས་སུ། ཨ་རིའི་གྲོས་ཚོགས་ཀྱི་འཐུས་མི་ Frank Wolf མཆོག་དང༌། Chris Smith མཆོག ཨ་རིའི་སྐུ་ཚབ་དོན་གཅོད་བློ་བཟང་སྙན་གྲགས་ལགས། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ Mary Beth བཅས་གདན་ཞུ་གནང་ཡོད་པ་ལྟར། ཁོང་རྣམ་པས་དབུ་འབྱེད་གསུང་བཤད་གནང་ཡོད། ངལ་རྩོལ་བསྒྱུར་བཀོད་ཐེབས་རྩ་ཁང་གི་འགན་འཛིན་རྒྱ་རིགས་ཧལ་རི་ཝུའུ་ཡིས་ངོ་སྤྲོད་གསུང་བཤད་གནང་ཡོད།
དེ་རྗེས་སྐུ་ཚབ་དོན་གཅོད་བློ་བཟང་སྙན་གྲགས་ལགས་ཀྱིས་གསུང་བཤད་གནང་དོན། གཞིས་ལུས་བོད་མི་ཚོས་མྱོང་བཞིན་པའི་སྡུག་བསྔལ་ནི་ཕྱི་ལོ་ ༡༩༤༩ ལོར་རྒྱ་ནག་དམར་པོའི་གཞུང་བཙུགས་རྗེས་འགོ་ཚུགས་པ་ཞིག་ཡིན། འདས་པའི་མི་ལོ་ ༦༠ ལྷག་ཙམ་རིང་བོད་མི་ས་ཡ་གཅིག་དང་འབུམ་གཉིས་ཙམ་དཀའ་སྡུག་མ་བཟོད་པར་འདས་གྲོངས་སུ་ཕྱིན་ཡོད། རྒྱ་ནག་གཞུང་གིས་དུས་རྟག་ཏུ་བོད་ནང་བདེ་སྐྱིད་ཡོད་ཚུལ་རྒྱལ་སྤྱིའི་ཐོག་དྲིལ་བསྒྲགས་བྱེད་ཀྱི་ཡོད་ཀྱང༌། དེ་རིང་གི་ཚོགས་འདུ་འདིས་བོད་ནང་དཀའ་སྡུག་གིས་ཁེངས་པ་ལས། བདེ་སྐྱིད་མེད་པ་གསལ་སྟོན་བྱེད་ཀྱི་ཡོད། ད་ལྟའི་རྒྱ་ནག་གཞུང་གིས་བོད་ཐོག་དམ་བསྒྲགས་ཆེ་བའི་སྲིད་བྱུས་འཛིན་བཞིན་ཡོད་པར་བརྟེན་བོད་ནང་གི་གནས་སྟངས་ཇེ་སྡུག་དང༌། ཛ་དྲག་ཆེ་རུ་འགྲོ་གི་ཡོད། ཅེས་སོགས་ཀྱི་གསུང་བཤད་གནང་ཡོད།
ཨ་རིའི་གྲོས་ཚོགས་ཀྱི་འཐུས་མི་གཉིས་དང༌། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ནས་ཀྱང་བོད་ཀྱི་གནས་སྟངས་དང་འབྲེལ་བའི་ཐོག་ཐུགས་ཚོར་ཆེན་པོའི་སྒོ་ནས་གསུང་བཤད་གནང་ཡོད།
ཨ་རིའི་རྒྱལ་ས་ཝ་ཤིང་ཊོན་དུ་ཡོད་པའི་ངལ་རྩོལ་བསྒྱུར་བཀོད་ཐེབས་རྩ་ཁང་གིས་གོ་སྒྲིག་བྱས་པའི་བོད་ནང་ངལ་རྩོལ་བསྒྱུར་བཀོད། ཅེས་པའི་ཚོགས་འདུ་དེ་ནི་ཕྱི་ཟླ་ ༦ ཚེས་ ༨ ཉིན་འགོ་ཚུགས་ཤིང༌། ཕྱི་ཚེས་ ༡༢ ཉིན་མཇུག་བསྒྲིལ་གནང་ཡོད་པ་དང༌། རྒྱལ་སྤྱིའི་བོད་དོན་ལས་འགུལ་ཁང་སོགས་ཚོགས་པ་ཁག་ཅིག་ནས་ཚོགས་འདུ་དེར་རྒྱབ་སྐྱོར་ཤུགས་ཆེ་གནང་ཡོད་པ་པ་བཅས།།
