༢༠༡༢ ཟླ་ ༦ ཚེས་ ༧ རེས་གཟའ་ཕུར་བུ།
༄༅། །ཉེ་ལམ་བོད་ནས་དྲ་རྒྱའི་ཐོག་གནས་ཚུལ་བཀོད་པར་གཞིགས་ན། རྨ་ཆུ་རྫོང་དངུལ་ར་ལྡ་སྡེ་དབལ་པན་སྡེ་བའི་ཕོ་གཞོན་མང་པོ་ཞིག་གིས་སྔོན་མ་ལྟར། རང་གི་ལུས་ལ་མཚོན་ཆ་འདོགས་པ་དང་དེར་བརྟེན་ཕན་ཚུན་དམར་འཛིངས་སྣ་ཚོགས་ཡོང་བཞིན་ཡོད་ལ། དམར་འཛིངས་དེ་དག་གི་ཁྲོད་ལོ་རེར་ཕོ་གསར་ཁ་ཤས་རྐྱེན་ལམ་དུ་ཤོར་བའི་དབང་གིས་གྱོད་དང་ཁ་མཆུ་སོགས་ཚུལ་མིན་གྱི་བྱ་གཞག་མང་པོ་ཞིག་ཡོང་བཞིན་ཡོད་པར་བརྟེན། ཕ་མ་དང་སྤུན་ཉེ་ཚང་མའི་སེམས་ཉིན་གཅིག་ཀྱང་གནས་བཟོད་མི་བདེ་བར་མ་ཟད། བཤད་ན་མི་གོ་བའི་བུ་ཕྲུག་དེ་ཚོར་རེ་ཐག་ཆད་ཅིང་ཐབས་ཟད་པའི་སྐབས་དེར། ས་གནས་དེ་ཀའི་མ་ནི་བླ་མ་ངག་དབང་བློ་གྲོས་མཆོག་གིས་ཐབས་ཤེས་སྣ་ཚོགས་ལ་བརྟེན་ནས་ཕོ་གཞོན་བརྒྱ་ཕྲག་ཁ་ཤས་ཀྱིས་རང་གི་ལུས་ལ་མཚོན་ཆ་མི་འདོགས་པའི་དམ་བཅའ་བཞག་སྟེ་མཚོན་ཆ་དེ་དག་བེད་སྤྱད་དེ་རང་རིགས་ཕན་ཚུན་མི་གསོད་པ་སོགས་ཀྱི་བྱ་བ་བཟང་པོ་ལག་བསྟར་ཐུབ་པ་བྱུང་བའི་གནས་ཚུལ་ཐོན་འདུག
དེ་ལྟར་དེ་སྔ་སྐལ་བ་བཟང་བའི་སྐབས་བོད་ཀྱི་སྲོལ་རྒྱུན་ཁག་གཅིག་དེང་སྐབས་དགོས་མེད་ཕན་མེད་རེ་ཟུང་ཡོད་པ་ང་ཚོས་ཤེས་པ་བྱས་ཏེ་བོད་ནང་གི་ས་གནས་མང་པོར་རི་དྭགས་ཀྱི་པགས་པ་བེད་སྤྱོད་བྱེད་པ་དང་། ཚོད་མིན་གྱི་རྒྱན་གོས་གྱོན་པ། གོང་དུ་གསལ་བ་ལྟར་རང་གི་ལུས་པོར་མཚོན་ཆ་སྣ་ཚོགས་འདོགས་རྒྱུ་དེ་དག་ངེས་པར་དུ་སྤོངས་དགོས་པ་ནི་རྩ་བའི་བླ་མས་རབ་དང་རིམ་པར་སྩལ་བའི་བཀའ་སློབ་ལམ་སྟོན་དང་བོད་མི་རང་ཉིད་ཀྱི་བཟང་སྤྱོད་ཡིན་པ་བཅས། །