༢༠༡༢ ཟླ་ ༦ ཚེས་ ༣༠ རེས་གཟའ་སྤེན་པ།
༄༅། །འདི་གར་ཕྱི་ལོ་ ༢༠༡༢ ཟླ་ ༦ ཚེས་ ༣༠ ཉིན་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་ཕྱི་ཚེས་ ༢༨ སྔ་དྲོ་ཐེ་ཝན་དུ་ཕེབས་འབྱོར་བྱུང་བ་དང་། གནམ་ཐང་དུ་སྐུ་ཚབ་དོན་གཅོད་དང་དྲུང་ཆེ།
བོད་རིགས་ཚོགས་པ་དང་བོད་རྒྱ་མཐུན་ཚོགས་ཀྱི་ཚོགས་གཙོ་སོགས་ཕེབས་བསུར་བཅར་ཡོད། དེ་ཉིན་ཕྱི་དྲོ་བཀའ་བློན་མཆོག་གིས་ཐེ་ཝན་མང་གཙོ་ཐེབས་རྩ་ཁང་དུ་འབྲེལ་ཡོད་དཔོན་རིགས་དང་མཇལ་འཕྲད་གནང་སྟེ་ཕན་ཚུན་བཀའ་བསྡུར་ལྷུག་པོ་གནང་རྗེས། དོན་གཅོད་ལས་ཁུངས་སུ་ཕེབས་ནས་དོན་ཁང་ལ་གཟིགས་ཞིབ་དང་། དོན་ཁང་ནས་ལས་དོན་དང་གངས་ལྗོངས་དཔེ་སྐྲུན་ཁང་གི་ལས་དོན་སྙན་སེང་ཞུས་པ་གསན་བཞེས་གནང་།
ཕྱི་ཚེས་ ༢༩ སྔ་དྲོ་དོན་གཅོད་ལས་ཁུངས་དང་གྲོས་ཚོགས་འཐུས་མི་ལྕམ་ཤའོ་མའེ་ཆིང་ཡིག་ཚང་ནས་གོ་སྒྲིག་གནང་བ་ལྟར། ཐེ་ཝན་གྲོས་ཚོགས་ནང་བཀའ་ཤག་གསར་པའི་སྲིད་བྱུས་དང་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པ་ངོ་སྤྲོད། བོད་ནང་བོད་མིས་རང་ལུས་མེར་སྲེག་བཏང་བ་སོགས་ཛ་དྲག་གནས་སྟངས་སྐོར་ངོ་སྤྲོད་གནང་རྗེས་ཚོགས་བཅར་བའི་དྲི་བར་ལན་འདེབས་དང་གསལ་བཤད་གནང་། བཀའ་བློན་མཆོག་གིས་ཐེ་ཝན་གྲོས་ཚོགས་ནང་གསུང་བཤད་གནང་བ་ཐོག་མ་དེ་ཆགས་ཀྱི་ཡོད། ཐེངས་འདིར་གྲོས་ཚོགས་འཐུས་མི་བདུན་དང་།
གྲོས་ཚོགས་འཐུས་མིའི་སྐུ་ཚབ། གཞུང་འབྲེལ་མིན་པའི་བོད་དོན་རྒྱབ་སྐྱོར་ཚོགས་མི་སོགས་མི་གྲངས་ལྔ་བཅུ་ལྷག་ལྷན་འཛོམས་བྱུང་ཡོད། ཚོགས་ཞུགས་གྲོས་ཚོགས་འཐུས་མི་བདུན་གྱིས་གསུང་བཤད་གནང་སྐབས་གྲོས་ཚོགས་འཐུས་མི་སྐུ་ཞབས་ལན་ཧྲི་ཅཱ་ལགས་ཀྱིས་༸གོང་ས་མཆོག་ཐེ་ཝན་གྲོས་ཚོགས་ནང་གདན་ཞུ་དང་བཀའ་སློབ་སྩལ་རྒྱུའི་དགོངས་འཆར་བཏོན་པ་དང་། གྲོས་ཚོགས་འཐུས་མི་ལྕམ་ཤའོ་མའེ་ཅིང་ལགས་ཀྱིས་ཐེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པ་གསར་འཛུགས་ཀྱི་འབོད་སྐུལ་གནང་བར་ཚོགས་ཞུགས་འཐུས་མི་རྣམས་ཀྱིས་རྒྱབ་སྐྱོར་གནང་བ་དང་སྦྲགས། གྲོས་ཚོགས་བོད་དོན་རྒྱབ་སྐྱོར་ཚོགས་ཆུང་གསར་འཛུགས་ཀྱི་ཡོངས་ཁྱབ་གསལ་བསྒྲགས་སྤེལ། གྲོས་ཚོགས་འཐུས་མི་རྣམས་ཀྱིས་བཀའ་བློན་མཆོག་ཐེ་ཝན་ནང་ཕེབས་པར་དགའ་བསུའི་སྣེ་ལེན་ཆེད་ཉིན་གུང་གསོལ་ཚིགས་དང་། ཕྱི་དྲོ་ཆུ་ཚོད་གཉིས་པའི་ཐོག་དམངས་གཙོ་ཡར་ཐོན་ཚོགས་པའི་ཚོགས་གཙོ་ཟུར་པ་ལྕམ་ཚའེ་དབྱིང་ཝིན་ལགས་དང་མཇལ་འཕྲད་གནང་སྟེ། ཁོང་གིས་བོད་དོན་ཐོག་མཐའ་གཅིག་ཏུ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་སྦྲགས།
བོད་ཕྱི་ནང་གཉིས་ཀྱི་གནས་སྟངས་ངོ་སྤྲོད་སོགས་ཕན་ཚུན་བཀའ་བསྡུར་ལྷུག་པོ་གནང་། དེ་བཞིན་བཀའ་བློན་མཆོག་གིས་ཕྱི་དྲོ་ཆུ་ཚོད་ ༤ པའི་ཐོག་རྒྱ་གར་གཞུང་ཚབ་དང་མཇལ་འཕྲད་གནང་བ་དང་། དགོང་དྲོ་རྒྱལ་སྤྱིའི་ཉེས་ཡངས་ཚོགས་པའི་ཐེ་ཝན་ཡན་ལག་ཚོགས་པ་ནས་གོ་སྒྲིག་གནང་བའི་བོད་ནང་གི་བོད་མིས་རང་ལུས་མེར་སྲེག་བཏང་བའི་བགྲོ་གླེང་ཚོགས་འདུའི་ཐོག་དོན་གཅོད་ཟླ་བ་ཚེ་རིང་ལགས་ཀྱིས་བོད་ཀྱི་རྒྱལ་རབས་ལོ་རྒྱུས་ངོ་སྤྲོད་དང་། བཀའ་བློན་མཆོག་གིས་བོད་ནང་རང་ལུས་མེར་སྲེག་བཏང་བའི་སྐོར་སོགས་ངོ་སྤྲོད་གནང་བ་དང་སྦྲགས་ཚོགས་བཅར་བའི་དྲི་བ་རྣམས་ལ་ལན་འདེབས་གསལ་བཤད་གནང་། བགྲོ་གླེང་ཚོགས་འདུར་ཁྱོན་མི་གྲངས་བརྒྱ་སྐོར་ཙམ་ཕེབས་ཡོད།
ཕྱི་ཚེས་ ༣༠ ཉིན་གྱི་སྔ་དྲོ་ཐེ་ཝན་རྒྱལ་སྤྱིའི་བོད་བརྒྱུད་ནང་བསྟན་མཐུན་ཚོགས་ནས་གོ་སྒྲིག་ཐོག་ཐའེ་པེ་ཚན་རྩལ་སློབ་གྲྭ་ཆེན་མོའི་ཚོགས་ཁང་ནང་༸གོང་ས་མཆོག་གི་སྐུའི་འཁྲུངས་སྐར་དུས་ཆེན་སྲུང་བརྩི་ཞུ་བའི་སྨོན་ལམ་ཚོགས་ཆེན་དུ་ཁྱོན་མི་གྲངས་སྟོང་ཕྲག་བརྒལ་བས་མཉམ་ཞུགས་གནང་ཡོད། སྐུ་མགྲོན་གཙོ་བོ་དོན་གཅོད་ནས་ཐེ་ཝན་མི་མང་གིས་༸གོང་ས་མཆོག་གི་སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་པར་ཐུགས་རྗེ་ཆེ་དང་། ཕྱི་དྲིལ་བཀའ་བློན་མཆོག་གིས་ཚོགས་ཁང་དེའི་ནང་ལྷན་འཛོམས་གནང་བའི་གནད་ཡོད་མི་སྣ་སྟོང་ཕྲག་བརྒལ་བར་སྤྱི་དང་། ཡང་སྒོས་ཐེ་ཝན་ནང་བོད་བརྒྱུད་ནང་བསྟན་ལ་དད་མོས་དང་སྲུང་སྐྱོབ་བྱེད་མཁན། དེ་བཞིན་བོད་དོན་ཐོག་རྒྱབ་སྐྱོར་བྱེད་མཁན་ཡོངས་ལ་ཐུགས་རྗེ་ཆེ་ཞུས་པ་དང་བོད་ནང་གི་བོད་མི་ཚོས་ཆོས་དད་རང་དབང་དགོས་པ་དང་། ༸གོང་ས་མཆོག་བོད་ལ་གདན་ཞུའི་ཆེད་རང་ལུས་མེར་སྲེག་བཏང་བའི་སྐོར་ངོ་སྤྲོད་ཞིབ་ཕྲ་གནང་། དགོང་དྲོ་རྒྱུན་དུ་བོད་དོན་ཐོག་རྒྱབ་སྐྱོར་གནང་མཁན་གཞུང་འབྲེལ་མིན་པའི་ཚོགས་པ་ཁག་ལ་ཐུགས་རྗེ་ཆེ་ཞུའི་གསོལ་ཚིགས་སྟབས་བདེ་ཞིག་འབུལ་རྒྱུ་ཡིན་འདུག་པ་བཅས།།
