༢༠༡༢ ཟླ་ ༦ ཚེས་ ༢༦ རེས་གཟའ་མིག་དམར།
སྐུ་པར་ཇེ་རེ་མི་ར་སེལ་ནས།
ལྕམ་སྐུ་བྷེ་ཊི་ཝིལ་ཡེམ་སི་མཆོག་དང་ལྷན། སྐུ་པར་ཇེ་རེ་མི་ར་སེལ་ནས།
༄༅། །ཕྱི་ལོ ༢༠༡༢ ཟླ་ ༦ ཚེས་ ༢༥ ཉིན་༸གོང་ས་མཆོག་གིས་ཨི་ཊ་ལིའི་ལྷོ་ཕྱོགས་ཀྱི་གྲོང་ཁྱེར་མ་ཏེ་ར་ཞེས་པའི་ས་ཁུལ་དུ་གསར་འཛུགས་གནང་བའི་ཞི་བདེའི་གྲོང་སྡེ་ཞེས་པ་དེར་ཆིབས་སྒྱུར་བསྐྱངས་ཏེ་བཀའ་སློབ་སྩལ་ཡོད། གྲོང་ཁྱེར་དེ་ནི་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ལྕམ་སྐུ་བྷེ་ཊི་ཝིལ་ཡམ་སི་མཆོག་ (Betty Williams) གིས་དམག་འཁྲུག་དང་མུ་གེ དབུལ་ཕོངས། སྤྱི་ཚོགས་དང་ཆབ་སྲིད་སོགས་ཀྱི་དཀའ་ངལ་འོག་སྐྱབས་བཅོལ་དུ་བྲོས་བྱོལ་ཡོང་བའི་མི་མང་ཚོར་མི་ཚེའི་མདུན་ལམ་གསར་པ་ཞིག་བསྐྲུན་རྒྱུའི་ཆེད་གསར་འཛུགས་གནང་བ་ཞིག་ཡིན་འདུག
སྐུ་པར་ཇེ་རེ་མི་ར་སེལ་ནས།
དེ་ཡང་སྐབས་དེར་ལྕམ་སྐུ་བྷེ་ཊི་ཝིལ་ཡེམ་སི་མཆོག་གིས་༸གོང་ས་མཆོག་ལ་གྲོང་སྡེ་གསར་པའི་འཛུགས་སྐྲུན་ཆེད་ཨར་ལས་ཀྱི་ལས་གཞི་འགྲོ་བཞིན་པ་རྣམས་ངོ་སྤྲོད་ཞུས་རྗེས་མགོན་པོ་གང་ཉིད་མཆོག་གིས་ཁང་པ་གསར་པར་ཐུགས་སྨོན་མཛད།
དེ་རྗེས་༸གོང་ས་མཆོག་ཉེ་འགྲམ་དུ་བྷ་རོ་ན་ལེ་ཞེས་པའི་ཕོ་བྲང་ཞིག་ཡོད་པ་དེར་མཛད་སྒོ་ཚོགས་སྐབས་ཐོག་མར་གྲོང་སྡེའི་སྤྱི་ཁྱབ་པ་མཆོག་གིས་༸གོང་ས་མཆོག་ལ་ཕེབས་བསུ་གཟབ་རྒྱས་ཞུས། དེ་ནས་ལྕམ་སྐུ་བྷེ་ཊི་ཝིལ་ཡེམ་སི་མཆོག་གིས་གསུང་བཤད་གནང་དོན། འཚེ་མེད་ཞི་བའི་ཐབས་ལམ་དེ་ནི་མི་སྙིང་སྟོབས་ཡོད་མཁན་གྱི་ལག་ཆ་ལྟ་བུ་ཡིན། ཞེས་སོགས་ཀྱི་གསུང་བཤད་གྲུབ་བསྟུན་༸གོང་ས་མཆོག་གིས་བཀའ་སློབ་སྩལ་དོན། ང་ཚོ་ཚང་མ་བདེ་བ་འདོད་པ་དང་སྡུག་བསྔལ་མི་འདོད་མཁན་གཅིག་མཚུངས་ཆགས་ཡོད་ཀྱང་།
སྐུ་པར་ཇེ་རེ་མི་ར་སེལ་ནས།
སྐུ་པར་ཇེ་རེ་མི་ར་སེལ་ནས།
ང་ཚོས་མ་ཤེས་པའི་རྐྱེན་གྱིས་དཀའ་ངལ་མང་པོ་ཞིག་བཟོ་བཞིན་ཡོད། མཐར་དཀའ་ངལ་དེ་དག་རང་ལ་འཕྲད་སྐབས་ཁོང་ཁྲོ་དང་སུན་སྣང་ཡོང་བཞིན་ཡོད།
དེར་བརྟེན་འཚེ་བའི་ལས་ལ་འཇུག་གི་ཡོད། དཀའ་ངལ་དེ་དག་སེལ་རྒྱུའི་ཐབས་ལམ་མཆོག་ནི་གཞན་གྱི་བདེ་དོན་ལ་བསམ་བློ་མང་ཙམ་གཏོང་རྒྱུ་དེ་ཡིན། དེ་ལྟར་བྱས་ཚེ་ང་ཚོས་ཁོང་ཁྲོ་ལ་སོགས་པའི་ཉོན་མོངས་པའི་སེམས་ཤུགས་ཆུང་དུ་འགྲོ་རྒྱུ་ཡིན། དེང་སྐབས་འཛམ་གླིང་མི་མང་རྣམས་འཚེ་བའི་བྱ་སྤྱོད་ལ་སུན་སྣང་ཧ་ཅང་ཡོང་བཞིན་ཡོད་པར་བརྟེན། ཞི་བདེའི་ཁོར་ཡུག་བསྐྲུན་རྒྱུའི་བསམ་བློ་འཁོར་བཞིན་ཡོད། དེར་བརྟེན་ལས་གཞི་འདི་རིགས་ལ་མི་ཚོས་རང་བཞིན་གྱིས་རྒྱབ་སྐྱོར་བྱེད་རྒྱུ་རེད། དུས་རབས་ ༢༠ དེ་མི་གསོད་ཁྲག་སྦྱོར་གྱི་དུས་རབས་ཤིག་ཆགས་ཡོད།
ད་ཆ་དུས་རབས་ ༢༡ འདི་འཚེ་བ་མེད་པའི་གྲོས་མོལ་གྱི་དུསརབས་ཤིག་ང་ཚོས་བཟོ་རྒྱུའི་འཆར་སྣང་དགོས། ས་ཆ་འདིར་རྡུལ་ཕྲན་སྙིགས་རོ་ཕུང་གསོག་བྱ་རྒྱུའི་ཚབ་ཏུ་ལྕམ་སྐུ་མཆོག་གིས་ཨི་ཊ་ལིའི་ལྷོ་ཕྱོགས་སུ་ཞི་བདེའི་གྲོང་འདི་ལྟ་བུ་ཞིག་གསར་འཛུགས་གནང་རྒྱུའི་དགོངས་པ་འདི་རླབས་ཆེན་ཞིག་ཡིན།
ལས་གཞི་འདི་མ་འོངས་པར་འཛམ་གླིང་ནང་ཞི་བདེ་བསྐྲུན་རྒྱུའི་ས་བོན་ལྟ་བུ་ཆགས་ཡོད།
སྐུ་པར་ཇེ་རེ་མི་ར་སེལ་ནས།
དེར་བརྟེན་ང་ཚོས་ས་གནས་གཞན་དུའང་ལས་གཞི་འདི་ལྟ་བུ་སྤེལ་ཐབས་བྱེད་དགོས། འཛམ་གླིང་བདེ་སྐྱིད་ལྡན་པ་ཞིག་དགོས་ན་མི་དཀྱུས་མ་རྣམས་ཕན་ཚུན་མཉམ་རུབ་ཀྱིས་ལས་གཞི་འདི་ལྟ་བུའི་ཐོག་ནས་འགོ་འཛུགས་ཐབས་བྱེད་དགོས་པ་ལས་འཛམ་གླིང་མཉམ་འབྲེལ་རྒྱལ་ཚོགས་ཀྱིས་གྲོས་ཆོད་བཞག་ནས་དེ་ལྟར་བསྒྲུབ་མི་ཐུབ། ཅེས་སོགས་ཀྱི་བཀའ་སློབ་སྩལ།
དེ་རྗེས་ལྕམ་སྐུ་བྷེ་ཊི་ཝིལ་ཡེམ་སི་མཆོག་གིས་༸གོང་ས་མཆོག་ལ་ཉིན་གུང་ལྗགས་སྨིན་འབུལ་ལམ་ཞུས། དེ་ནས་༸གོང་ས་མཆོག་སྟོན་འཁོར་དང་བཅས་ལྕམ་སྐུ་བྷི་ཊི་ཝིལ་ཡེམ་སི་མཆོག་གིས་ཉམས་གསོ་གནང་བའི་ཡི་ཤུའི་གནའ་བོའི་མཆོད་ཁང་སན་ཨར་ཆི་ཨན་ཇི་ལོ་ཞེས་པ་དེར་ Sant’Arcangelo ཆིབས་སྒྱུར་བསྐྱངས།
སྐུ་པར་ཇེ་རེ་མི་ར་སེལ་ནས།
སྐུ་པར་ཇེ་རེ་མི་ར་སེལ་ནས།
༸གོང་ས་མཆོག་གིས་མཆོད་ཁང་ནང་དུ་ཐུགས་ཞིབ་མཛད་རྗེས་མཆོད་ཁང་གི་རྭ་བའི་ནང་དུ་མང་ཚོགས་རྣམས་ལ་མཇལ་ཁ་དང་ཆོས་ལུགས་མཐུན་སྒྲིལ་སྐོར་བཀའ་སློབ་སྩལ།
དེ་རྗེས་ས་གནས་ཡི་ཤུའི་ཆོས་དཔོན་ཞིག་གིས་ཐུགས་རྗེ་ཆེ་ཞུའི་གསུང་བཤད་གནང་རྗེས་སླར་ཡང་ཐད་འཕུར་གནམ་གྲུ་བརྒྱུད་མ་ཏེ་རར་ཆིབས་ཞལ་སྒྱུར། ཕྱི་ཚེས་ ༢༦ ཉིན་༸གོང་ས་མཆོག་གྲོང་ཁྱེར་མི་ལ་ནོར་ནང་རྟེན་གཞི་བྱས་པའི་དགེ་འཕེལ་གླིང་ཆོས་ཚོགས་དང་གཙུག་ལག་སློབ་ཁང་ཞིག་ཏུ་ཆིབས་སྒྱུར་བསྐྱང་སྟེ་བཀའ་སློབ་སྩལ་རྒྱུ་ཡིན་འདུག་པ་བཅས།།
