༢༠༡༢ ཟླ་ ༦ ཚེས་ ༢༩ རེས་གཟའ་པ་སངས།
༄༅། །༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༡༢ ཟླ་ ༦ ཚེས་ ༡༤ ཉིན་དབྱིན་ཡུལ་ཆིབས་སྒྱུར་བསྐྱངས་ཏེ་ཕྱི་ཚེས་ ༡༦ ཉིན་མགོན་པོ་གང་ཉིད་མཆོག་གིས་གསར་འགོད་ལྷན་ཚོགས་ཐོག་བཀའ་སློབ་དང་། དབྱིན་ཡུལ་གྲོང་ཁྱེར་ལི་ཌ་སི་(Leeds)ནང་དབྱིན་ཇིའི་ཡོག་ཤེར་རྒྱལ་སྤྱིའི་ཚོང་ལས་ལྷན་ཚོགས་(Yorkshire International Business Convention) ཞེས་པའི་ཚོང་པ་གྲངས་ ༦༥༠ བརྒལ་བར་བཀའ་སློབ་སྩལ་ཡོད། ཕྱི་ཚེས་ ༡༧ ཉིན་དབྱིན་ཇིའི་གྲོང་ཁྱེར་མན་ཆེ་སི་ཊར་ཁུལ་དུ་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་ཆོས་དབྱིངས་བསྟོད་པ་དང་། དགེ་བཤེས་གླང་རི་ཐང་པ་རྡོ་རྗེ་སེང་གེས་མཛད་པའི་བློ་སྦྱོང་ཚིགས་བརྒྱད་མའི་ཆོས་འབྲེལ། ཁུལ་དེར་བལ་པོའི་གོར་ཁ་(Gorkha)དམག་མིའི་རུ་ཁག་གི་དམག་མི་ཁག་གཅིག་ལ་མཇལ་ཁ་དང་བཀའ་སློབ་སྩལ། ཕྱི་ཚེས་ ༡༨ ཉིན་དབྱིན་ཡུལ་གྱི་གྲོང་ཁྱེར་མན་ཆེ་སི་ཊར་རྩེད་ཐང་ཆེན་མོའི་ནང་མང་ཚོགས་ལ་དོན་དམ་གྱི་འགྱུར་བ་ནང་སེམས་ནས་ཡོང་དགོས། ཞེས་པའི་བརྗོད་གཞིའི་ཐོག་བཀའ་སློབ་སྩལ། ཕྱི་ཚེས་ ༡༩ ཉིན་འབར་མའི་མང་གཙོ་དོན་གཉེར་བ་ལྕམ་སྐུ་ཨང་སང་སུ་ཀི་མཆོག་དང་ཕྱི་ཚེས་ ༢༠ ཉིན་དབྱིན་ཇིའི་རྒྱལ་སྲས་པི་རིན་སི་ཅལ་སི་(Prince Charles)མཆོག་དང་ཁོང་གི་སྐུ་ཟླ་ཀེ་མི་ལ་(Camilla)མཆོག་མཇལ་འཕྲད་མཛད་ཡོད། ཕྱི་ཚེས་ ༢༢ གྱི་སི་ཁོ་ཊ་ལན་ཌེའི་སིག་ནེ་ཌི་དཔེ་མཛོད་ཁང་(Signet Library)གི་ཚོགས་ཁང་དུ་སི་ཁོ་ཊ་ལན་ཌེའི་གྲོས་ཚོགས་བོད་དོན་རྒྱབ་སྐྱོར་གྱི་འཐུས་མི་རྣམས་(Scottish Parliament Cross Party Group on Tibet) དང་ས་གནས་བོད་རིགས་རྣམས་ལ་བཀའ་སློབ་དང་གསར་འགོད་པའི་ཆེད་དོན་དྲི་བར་བཀའ་ལན། དེ་བཞིན་གྲོས་ཚོགས་ཀྱི་འཐུས་མིར་བཀའ་སློབ་སྩལ་ཡོད། ཕྱོགས་མཚུངས་ཨི་ཊ་ལིའི་ནང་དུའང་མཛད་འཕྲིན་རྒྱ་ཆེ་བསྐྱངས་གྲུབ་རྗེས་ཕྱི་ཚེས་ ༢༩ ཉིན་ལྡི་ལི་ནས་མཁའ་ལམ་བརྒྱུད་ཕྱེད་ཡོལ་ཆུ་ཚོད་ ༡༢།༢༠ ཐོག་གྷ་གལ་གནམ་ཐང་དུ་༸ཞབས་སོར་བདེ་བར་འཁོད་སྐབས། བོད་མིའི་སྒྲིག་འཛུགས་ཀྱི་བཀའ་བློན་ཁྲི་ཚབ་ཆོས་རིག་བཀའ་བློན་པདྨ་ཆོས་འབྱོར་མཆོག་དང་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་སོགས་ཀྱིས་ཕེབས་བསུ་གཟབ་རྒྱས་ཞུས་ཡོད། དེ་ནས་ཕེབས་འགྲོ་བརྒྱུད་བཞུགས་སྒར་ཕོ་བྲང་དུ་༸ཞབས་སོར་འཁོད་སྐབས་ཁྲིམས་ཞིབ་པ་ཆེ་བ་མཆོག་གིས་དབུས་ཁྲིམས་ཞིབ་གཞན་མཆོག་གིས་གཙོས་བདེ་སྲུང་བཀའ་བློན་མཆོག་དང་འཕྲོད་བསྟེན་བཀའ་བློན་མཆོག དེ་བཞིན་སེར་སྐྱ་མི་མང་རྣམས་ཀྱིས་ལག་ཏུ་དཀར་གཙང་མཇལ་དར་ཐོགས་ཏེ་ཕེབས་བསུ་གཟབ་རྒྱས་ཞུས་ཡོད་པ་བཅས། །