༢༠༡༢ ཟླ་ ༦ ཚེས་ ༢༠ རེས་གཟའ་ལྷག་པ།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༡༩ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་དབྱིན་ཇིའི་རྒྱལ་ས་ལོན་ཌོན་དུ་རྟེན་གཞི་བྱས་པའི་ཝེ་སི་མིན་སི་ཊར་གཙུག་ལག་སློབ་ཁང་ (University of Westminster) དུ་མང་གཙོའི་རིན་ཐང་དང་བོད་ཐོག་བཀའ་སློབ་སྩལ་ཡོད།
དེ་ཉིན་སྔ་དྲོ་ཐོག་མར་བྷར་མའི་མང་གཙོ་དོན་གཉེར་བ་ལྕམ་སྐུ་ཨང་སང་སུ་ཀི་མཆོག་གིས་རྒྱལ་ས་ལོན་ཌོན་དུ་༸གོང་ས་མཆོག་ལ་ཆེད་བཅར་ཞུས་ཏེ་དབུ་ཁྲིད་རྣམ་གཉིས་དབར་ཆུ་ཚོད་ཕྱེད་ཀ་ལྷག་ཙམ་རིང་མཇལ་འཕྲད་དང་བཀའ་མོལ་མཛད་ཡོད།
དེ་རྗེས་༸གོང་ས་མཆོག་ཝེ་སི་མིན་སི་ཊར་གཙུག་ལག་སློབ་ཁང་དུ་ཆིབས་སྒྱུར་བསྐྱངས་ཏེ་བཀའ་སློབ་སྩལ་དོན། དུས་རབས་ ༢༡ འདི་ད་ལྟ་གསར་པ་ཆགས་ཡོད་གང་ཡིན་བརྗོད་ན་དུས་རབས་འདིའི་ལོ་དགུ་བཅུ་ཙམ་འབྱུང་རྒྱུ་ལྷག་ཡོད། དེར་བརྟེན་ང་ཚོར་དུས་རབས་འདི་བཟང་པོ་ཞིག་བསྐྲུན་རྒྱུའི་གོ་སྐབས་ཡོད། རྒྱ་གར་དང་རྒྱ་ནག་གཉིས་ལ་མཚུངས་བསྡུར་བྱོས་དང། ཡུལ་དེ་གཉིས་ཀར་མི་འབོར་ཧ་ཅང་མང་པོ་ཡོད་ཀྱང་རྒྱ་གར་ནང་མང་གཙོའི་ལམ་ལུགས་འོག་ཁྲིམས་ཀྱིས་དབང་བསྒྱུར་བྱེད་བཞིན་ཡོད་པར་བརྟེན། སྨྲ་བརྗོད་དང་གསར་འགྱུར་གྱི་རང་དབང་ཡོད། འོན་ཀྱང་རྒྱ་ནག་ལྟ་བུར་ཆ་མཚོན་ན། རྒྱལ་ཁབ་ཁ་བྲལ་འགྲོ་རྒྱུའི་ཉེན་ཁ་བཤད་དེ་གྲངས་ཉུང་མི་རིགས་ཀྱི་ཐུན་མིན་ངོ་བོ་སྲུང་སྐྱོབ་བྱེད་རྒྱུའི་རང་དབང་ལ་བཙན་ཤུགས་ཀྱིས་དམ་བསྒྲགས་བྱེད་བཞིན་ཡོད། དེར་བརྟེན་ངོས་ཀྱིས་རྒྱ་རིགས་ཆོས་གྲོགས་ཕོ་མོ་ཚོ་དང་ཐུག་འཕྲད་ནམ་བྱུང་སྐབས་ཁྱེད་ཚོས་རྒྱ་གར་གྱི་ལམ་སྲོལ་བཟང་པོ་དེར་མིག་དཔེ་ལྟ་དགོས་པ་བརྗོད་ཀྱི་ཡོད། དཔེར་ན་ཨ་རིའི་ཡུལ་དེ་ཨ་རིའི་མི་མང་ས་ཡ་ ༣༠༠ ཡས་མས་ཡོད་པ་ཁོང་ཚོར་བདག་པ་ལས་མང་གཙོ་དང་སྤྱི་མཐུན་ཚོགས་པ་གཉིས་ལ་བདག་མེད་པ་བཞིན། རྒྱ་ནག་ཀྱང་རྒྱ་ནག་མི་མང་དུང་ཆུར་བཅུ་གསུམ་ལ་བདག་པ་ལས་གུང་ཁྲན་དམར་ཤོག་ཚོགས་པ་གཅིག་པུར་བདག་མེད། དེ་བཞིན་འཛམ་གླིང་འདི་ཡང་མི་གྲངས་ཐེར་འབུམ་བདུན་ཡོད་པ་ཚོར་བདག་ཡོད།
ཅེས་བཀའ་སློབ་སྩལ་བ་དང་སྦྲགས། མང་གཙོའི་རིན་ཐང་སྐོར་བཀའ་སློབ་སྩལ་དོན། མང་གཙོའི་ལམ་ལུགས་འོག་རྒྱལ་ཁབ་སུ་དང་སུ་ཡིན་རུང་རྒྱལ་ཁབ་དེའི་མི་མང་དེས་རྒྱལ་ཁབ་དེ་འཛིན་སྐྱོང་བྱེད་བཞིན་ཡོད། མི་མང་གིས་བཙུགས་པ་དང་མི་མང་གི་ཆེད་དུ་བཙུགས་པའི་སྲིད་གཞུང་དེར་མང་གཙོའི་ལམ་ལུགས་ཞེས་བརྗོད་བཞིན་ཡོད། ལམ་ལུགས་དེ་ནི་མཆོག་ཏུ་གྱུར་བ་དེ་ཡིན། གང་ཡིན་བརྗོད་ན་ལམ་ལུགས་དེའི་འོག་མང་ཚོགས་ཀྱིས་འོས་འདེམས་བྱས་པའི་འགོ་ཁྲིད་ཚོས་མང་ཚོགས་ལ་འགན་ཁུར་དགོས་པ་ཆགས་ཡོད། དཔེར་ན། རྒྱ་ནག་མི་མང་དུང་ཆུར་བཅུ་གསུམ་ཡོད་པ་རྣམས་ལ་དངོས་ཡོད་གནས་ཚུལ་ཤེས་རྒྱུའི་ཐོབ་ཐང་ཡོད། རྒྱ་ནག་མི་མང་ཚོར་དངོས་ཡོད་གནས་ཚུལ་ཤེས་རྒྱུའི་གོ་སྐབས་བྱུང་ན་ཁོང་ཚོས་ལེགས་ཉེས་རྣམ་དཔྱོད་ཐོག་ནས་དྲང་བདེན་ཐག་གཅོད་བྱ་རྒྱུའི་ནུས་པ་ཆ་ཚང་ལྡན་ཡོད་ཅེས་བཀའ་སློབ་སྩལ་བ་དང་སྦྲགས།
དེ་སྔ་མགོན་པོ་གང་ཉིད་མཆོག་གི་གྲོགས་པོ་གཅིག་གིས་བརྗོད་པར་ཐུགས་དྲན་གསོ་མཛད་དེ་བཀའ་སློབ་སྩལ་དོན། ངོས་ཀྱི་གྲོགས་པོ་དེས་བརྗོད་པར་གཞིག་ན་ནིའུ་ཛི་ལན་ཌི་ལྟ་བུ་ཡུལ་མི་གྲངས་ས་ཡ་གསུམ་ལས་མེད་ཀྱང་ཆབ་སྲིད་དབང་ཆ་ཡུལ་མི་ཚང་མར་བདག་ཡོད་པ་དང། རྒྱ་ནག་མི་འབོར་གྲངས་དུང་ཕྱུར་བཅུ་གསུམ་ཡོད་ཀྱང་ཆབ་སྲིད་དབང་ཆ་དེ་མི་དགུའི་ལག་ཏུ་ཡོད་ཚུལ་བརྗོད་བྱུང་ཞེས་བཀའ་སློབ་སྩལ། དེ་རྗེས་༸གོང་ས་མཆོག་གིས་གཞུང་འབྲེལ་མིན་པའི་ཚོགས་པ་དང་བོད་དོན་རྒྱབ་སྐྱོར་ཚོགས་པའི་ཚོགས་མི་ཁག་གཅིག་ལ་མཇལ་ཁ་དང་བཀའ་སློབ་སྩལ་ཡོད་པ་བཅས།།
