༢༠༡༢ ཟླ་ ༤ ཚེས་ ༢༧ རེས་གཟའ་པ་སངས།
༄༅། །བཀའ་ཁྲི་མཆོག་གིས་ཨ་རིའི་གྲོང་ཁྱེར་ཆི་ཁ་གོའི་ནང་དུ་ལྷོ་ཨ་ཕི་རི་ཀའི་སྲིད་འཛིན་ཟུར་པ་ཌི་ཀ་ལག་མཆོག་དང་ཨ་རི་བ་ལྕམ་སྐུ་ཇུ་ཌི་ཝིལ་ཡེམ་སི་མཆོག ཨི་རན་གྱི་ལྕམ་སྐུ་ཤི་རིན་ཨི་བྷ་ཌི་མཆོག་བཅས་དང་མཇལ་འཕྲད་གནང་སྟེ་ཞི་བདེའི་དབུ་ཁྲིད་རྣམས་ཀྱིས་བོད་དོན་ཐོག་རྒྱབ་སྐྱོར་གནང་བར་སྙིང་ཐག་པ་ནས་ཐུགས་རྗེ་ཆེ་ཞུས་ཡོད། ནོ་བེལ་གཟེངས་རྟགས་བཞེས་མྱོང་མཁན་རྣམས་ཀྱིས་ས་རྟགས་བཀོད་པའི་འབོད་སྐུལ་གྱི་ཞུ་སྙན་ཞིག་རྒྱ་ནག་གི་འགོ་ཁྲིད་ཚོར་སྤྲད་ཡོད། ཞུ་སྙན་དེའི་ནང་བོད་ཀྱི་གནད་དོན་སེལ་ཆེད་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་གྲོས་མོལ་བྱེད་དགོས་པའི་དགོས་འདུན་བཏོན་འདུག།
སྐབས་དེར་བཀའ་ཁྲི་མཆོག་ནས་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༡ ཟླ་ ༨ ནང་ཆབ་སྲིད་ཀྱི་སྐུ་དབང་ཡོངས་རྫོགས་མང་གཙོའི་ལམ་ནས་འོས་འདེམས་བྱས་པའི་བཀའ་ཁྲིར་རྩིས་སྤྲོད་མཛད་པ་སོགས་བཙན་བྱོལ་བོད་མིའི་ཆབ་སྲིད་ཀྱི་གནས་སྟངས་ལ་འཕོ་འགྱུར་ཇི་འདྲ་བྱུང་ཡོད་མེད་སྐོར་གསལ་བཤད་གནང་ཡོད། ཞི་བདེའི་དབུ་ཁྲིད་རྣམ་པས་སྐབས་དེར་༸གོང་ས་མཆོག་གིས་བོད་མིའི་ཆབ་སྲིད་ལ་བཅོས་བསྒྱུར་མཛད་པའི་མཛད་བཟང་དེར་ཧ་ཅང་རྗེས་སུ་ཡི་རང་དང་བསྔགས་བརྗོད་ཞུས་དོན། ༸གོང་ས་ཏཱ་ལའི་བླ་མ་མཆོག་གིས་བོད་མིའི་ཆོས་སྲིད་ཀྱི་དབུ་ཁྲིད་ཐ་དད་དུ་དབྱེ་གནང་མཛད་པའི་མཛད་རྗེས་ནི་ཆེས་གཟིད་བརྗིད་ལྡན་པ་ཞིག་ཡིན་པ་མ་ཟད། ཕུགས་ལ་བོད་མི་ཚོར་ཕན་ཐོགས་ཡོད་པ་ཞིག་ཆགས་ཡོད་སྐོར་གསུངས་ཡོད། གཞན་ཡང་སྐབས་དེར་བཀའ་ཁྲི་མཆོག་གིས་ཞི་བདེའི་དབུ་ཁྲིད་ཚོར་ད་ལྟའི་བོད་ནང་དུ་བོད་མི་ཚོས་རྒྱ་ནག་གཞུང་གིས་བོད་མི་ཚོར་འཛིན་བཞིན་པའི་དམ་བསྒྲགས་ཅན་གྱི་སྲིད་བྱུས་དེར་ངོ་རྒོལ་མཚོན་ཆེད། རང་ལུས་མེར་སྲེག་བསྟུད་མར་གཏོང་བཞིན་པའི་ཛ་དྲག་གི་གནས་སྟངས་ཞིབ་ཕྲ་གསལ་བཤད་གནང་བར། ཞི་བདེའི་དབུ་ཁྲིད་རྣམ་པས་བོད་ནང་གི་བོད་མི་ཚོའི་དཀའ་ངལ་དེར་ཧ་ཅང་བློ་ཕམ་གྱི་རྣམ་པ་བསྟན་པ་དང་སྦྲགས། བཀའ་ཁྲི་མཆོག་ལ་བོད་ནང་གི་ཛ་དྲག་གི་གནས་སྟངས་ཇི་བྱུང་ཁོང་ཚོར་བརྡ་ལན་མུ་མཐུད་ནས་གནང་དགོས་པའི་འབོད་སྐུལ་ཞུས་དོན། ང་ཚོས་བོད་མི་ཚོར་གདུང་སེམས་མཉམ་སྐྱེ་ཐོག་བོད་ཀྱི་གནད་དོན་དེ་བཞིན་ཞི་བའི་ལམ་ནས་སེལ་རྒྱུར་རྒྱབ་སྐྱོར་ཞུ་རྒྱུ་ཡིན། ཞེས་དམ་བཅའ་ཞུས་ཡོད་པ་བཅས།།