༢༠༡༢ ཟླ་ ༤ ཚེས་ ༢ རེས་གཟའ་ཟླ་བ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་ཕྱི་ལོ་ ༢༠༡༢ ཟླ་ ༤ ཚེས་ ༢ ཉིན་བཏང་གནས་ནང་འཁོད་དོན། བོད་ནང་རྒྱ་ནག་གཞུང་གིས་འཛིན་པའི་སྲིད་བྱུས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པ་དང་། གཞིས་བཞུགས་བོད་མི་རྣམས་བཟོད་པར་དཀའ་བའི་ཛ་དྲག་གི་གནས་སྟངས་འོག་ཞུམ་པ་མེད་པའི་སྙིང་སྟོབས་ཀྱིས་རྒྱ་ནག་གཞུང་གི་དྲག་པོའི་སྲིད་བྱུས་ལ་རྣམ་པ་འདྲ་མིན་གྱི་ངོ་རྒོལ་མུ་མཐུད་གནང་བཞིན་ཡོད་པ་མ་ཟད། ལྷག་པར་དེང་སྐབས་བོད་ཕྱི་ནང་གཉིས་སུ་རྒྱལ་གཅེས་དཔའ་བོ་དཔའ་མོ་རྣམས་ཀྱིས་རང་གི་གཅེས་པའི་ལུས་སྲོག་མེར་སྲེག་གཏོང་བཞིན་ཡོད་པ་རྣམས་ཀྱི་སྙིང་སྟོབས་ལ་རྗེས་དྲན་དང་། དཔའ་བོ་དེ་དག་གི་བྱས་རྗེས་འཛམ་གླིང་མི་མང་གིས་ཤེས་རྟོགས་ཡོང་སླད། གཙོ་བོ་ཐེ་ཝན་ས་གནས་བོད་ཀྱི་ལྷན་ནུ་ལྷན་ཚོགས་ཀྱིས་གོ་སྒྲིག་ཐོག་ཐེ་ཝན་དུ་གནས་སྡོད་བོད་རིགས་ཚོགས་པ་དང་། ས་གནས་བུད་མེད་ཚོགས་པ་མཉམ་ཞུགས་ཀྱིས་ཕྱི་ཟླ་ ༤ ཚེས་ ༡ རེས་གཟའ་ཉི་མའི་དགོང་དྲོ་ཐེ་ཝན་རང་དབང་ཐང་ཆེན་མདུན་དུ་མཆོད་འབུལ་སྨོན་ལམ་ཞིག་གོ་སྒྲིག་གནང་ཡོད། གོ་སྒྲིག་ཞུ་མཁན་གྱིས་མཆོད་འབུལ་སྨོན་ལམ་གྱི་ལས་འགུལ་སྤེལ་དགོས་པའི་དམིགས་ཡུལ་ངོ་སྤྲོད་གནང་བ་དང་། སྐུ་མགྲོན་གྱི་གཙོ་བོ་ཐེ་ཝན་བོད་ཀྱི་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་བོད་ནང་རང་དབང་མེད་པའི་གནས་སྟངས་འོག་བོད་མི་རྣམས་ཀྱིས་རང་སྲོག་བློས་བཏང་ནས་ལས་འགུལ་སྤེལ་བཞིན་ཡོད་པ་དེ་དག་ཆུད་ཟོས་སུ་མ་འགྲོ་བར་བོད་མི་རིགས་ཀྱི་རྩ་དོན་ལ་ཕན་པའི་ཐོག་ཁོང་རྣམ་པའི་མགྲིན་ཚབ་གནང་སྟེ་འཛམ་གླིང་ཐོག་ངོ་སྤྲོད་གནང་རྒྱུ་ནི་ཕྱི་རྒྱལ་རང་དབང་ལུང་པར་གནས་པའི་བོད་མི་རྣམས་ཀྱི་ལས་འགན་ཡིན་སྐོར་སོགས་ཀྱི་གསུང་བཤད་གནང་ཡོད། དེ་རྗེས་བོད་ཀྱི་བླ་སྤྲུལ་དགེ་འདུན་པ་མི་གྲངས་ཉི་ཤུ་ལྷག་དབུ་ཞུགས་ཀྱིས་བོད་མི་དང་བོད་དོན་རྒྱབ་སྐྱོར་གནང་མཁན་ཁྱོན་མི་གྲངས་དགུ་བཅུ་ལྷག་གིས་ཆུ་ཚོད་གཉིས་རིང་སྨོན་ལམ་གསུང་འདོན་གནང་ཡོད་པ་མ་ཟད། མཇུག་ཏུ་ཁོང་རྣམ་པ་ཡོངས་ནས་རང་དབང་ཐང་ཆེན་ལ་སྐོར་བ་ཐེངས་གསུམ་བརྒྱབ་རྗེས་ལས་འགུལ་མཇུག་སྒྲིལ་གནང་འདུག་པ་བཅས། །