༢༠༡༢ ཟླ་ ༤ ཚེས་ ༡༧ རེས་གཟའ་མིག་དམར།

ཧ་ཝའི་སྲོལ་རྒྱུན་ལམ་ནས་༸གོང་ས་མཆོག་ལ་སྐྱེད་མོས་ཚལ་དུ་གདན་འདྲེན་ཞུ་བཞིན་པ།

༄༅། །ཕྱི་ལོ་ ༢༠༡༢ ཟླ་ ༤ ཚེས་ ༡༦ ཉིན་གྱི་སྔ་དྲོར་༸གོང་ས་མཆོག་གིས་ཀ་ཡི་ལའོ་སློབ་གྲྭ་(Kailua High School)ཆེ་བར་ཆིབས་སྒྱུར་བསྐྱངས། སྐབས་དེར་ཧ་ཝའི་ཤེས་ཡོན་སྡེ་ཚན་གྱི་འགན་འཛིན་ལྕམ་སྐུ་མ་ཏ་ཡོ་ཤི་(Ms.Kathryn Matayoshi)མཆོག་གིས་གཙོས་གནད་ཡོད་མི་སྣ་ཁག་གཅིག་གིས་སློབ་གྲྭའི་རྒྱལ་སྒོའི་མདུན་དུ་ཕེབས་བསུ་ཞུས་ཡོད།

དེ་རྗེས་ཚོགས་ཁང་དུ་༸ཞབས་སོར་འཁོད་མཚམས་སློབ་ཕྲུག་རྣམས་ནས་ཧ་ཝའི་སྲོལ་རྒྱུན་གླུ་གར་གྱི་འཁྲབ་སྟོན་(Hula dance)ཉམས་འགྱུར་ལྡན་པའི་ལམ་ནས་ཕེབས་བསུ་གཟབ་རྒྱས་ཞུ་སྐབས་མགོན་པོ་གང་ཉིད་མཆོག་གིས་ཐུགས་དགྱེས་ཚོར་ཆེན་པོས་གཟིགས་ཞིབ་མཛད། དེ་རྗེས་ལྕམ་སྐུ་མཆོག་གིས་༸གོང་ས་མཆོག་ཁུལ་དེར་གདན་འདྲེན་མ་ཞུས་གོང་སློབ་གྲྭའི་སློབ་ཚན་ནང་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་ནང་ཆོས། དེ་བཞིན་བོད་བཅས་ཀྱི་སྐོར་ལ་ཟུར་དུ་སློབ་ཚན་སློབ་ཁྲིད་བྱས་ཡོད་སྐོར་སྙན་སྒྲོན་ཞུས། དེ་རྗེས་༸གོང་ས་མཆོག་གིས་ཕྱོགས་ལྷུང་མེད་པའི་བྱམས་བརྩེའི་སྐོར་ལམ་སྟོན་བཀའ་སློབ་སྩལ་དོན། ངོས་ལ་གོ་སྐབས་གནང་བར་འཛིན་སྐྱོང་དབུ་ཁྲིད་རྣམ་པར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། ངོས་རང་རྒྱུན་དུ་གཞོན་སྐྱེས་ཚོ་དང་ལྷན་འབྲེལ་བ་བྱ་རྒྱུར་དགའ་མོས་ཆེན་པོ་ཡོད། དུས་འདས་པ་དེ་ཡོལ་ཚར་བ་རེད་ཕྱིར་ལོག་བྱེད་ཐབས་མེད། མ་འོངས་པའི་སྤྱི་ཚོགས་ཇི་འདྲ་ཞིག་ཡོང་མིན་དེ་ཁྱེད་ཚོ་གཞོན་སྐྱེས་ཚོའི་ལག་ཏུ་ཡོད་ཅེས་སོགས་ཀྱི་བཀའ་སློབ་སྩལ་བ་མ་ཟད།

འཚེ་བ་མེད་པ་དང་ཞི་བདེ་གོང་མཐོར་གཏོང་ཐབས་སོགས་ཀྱི་སྐོར་ལའང་བཀའ་སློབ་ཞིབ་ཕྲ་སྩལ་རྗེས་སློབ་ཕྲུག་གི་དྲི་བར་བཀའ་ལན་སྩལ། སྐབས་དེར་སློབ་ཕྲུག་གཅིག་གི་དྲི་བར་བཀའ་ལན་མཛད་པ་དང་སྦྲགས།

ནང་ཆོས་ནས་གསུངས་པའི་ཐོས་བསམ་སྒོམ་གསུམ་གྱི་ལམ་ནས་སློབ་གཉེར་བྱ་རྒྱུའི་གསལ་བཤད་མཛད། བཀའ་སློབ་ཡོངས་སུ་གྲུབ་རྗེས་སློབ་གྲྭ་དེས་༸གོང་ས་མཆོག་ལ་ཧ་ཝའི་སྲོལ་རྒྱུན་གྱི་གྲུ་སྐྱ་(Paddle Of canoe)ཞིག་ཕྱག་རྟགས་སུ་འབུལ་ལམ་ཞུས།
ཉིན་གུང་ལྗགས་སྨིན་གྲུབ་མཚམས་ཀུ་ལའོ་སྐྱེད་མོས་ཚལ་དུ་ཆིབས་སྒྱུར་བསྐྱངས་ཏེ་གསར་དུ་བཟོས་པའི་གྲུ་གཟིངས་ཤིག་ཡོད་པ་དེར་རབ་གནས་བཀའ་དྲིན་ཆེ་བ་བསྐྱངས། གྲུ་གཟིངས་དེས་ཕྱི་ལོ་ ༢༠༡༣ ལོར་འཛམ་གླིང་སྐོར་བ་བརྒྱབ་སྟེ་ཧ་ཝའི་རིག་གཞུང་སྐོར་གོ་རྟོགས་སྤེལ་རྒྱུ་ཡིན་འདུག་པ་བཅས།།