༢༠༡༢ ཟླ་ ༤ ཚེས་ ༢༢ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༤ ཚེས་ ༢༡ ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་ནུབ་ཕྱོགས་མངའ་སྡེ་ལོང་བྷི་ཆིར་(Long Beach)རྟེན་གཞི་བྱས་པའི་དགའ་ལྡན་ཤ་རྩེ་ཐུབ་བསྟན་དར་རྒྱས་གླིང་ཆོས་ཚོགས་ནས་ཇི་ལྟར་གསོལ་འདེབས་ཞུས་དོན་ལྟར་དད་ལྡན་ཆོས་ཞུ་བ་སྟོང་ཚོ་མང་པོར་སྔ་དྲོ་འཇིགས་བྱེད་ཀྱི་བཀའ་དབང་དང་བྱང་ཆུབ་སེམས་པའི་སྡོམ་པ་འབོགས་ཆོག་སྩལ་ཏེ་བཀའ་སློབ་ཕེབས་དོན། བྱང་ས་དང་བསླབ་བཏུས་ནས་གསུངས་ཡོད་པ་ལྟར།
དཀྱིལ་འཁོར་གྱི་ཆོ་ག་དང་འབྲེལ་བའི་ཐོག་ནས་བྱང་ཆུབ་སེམས་པའི་སྡོམ་པ་སྲུང་རྒྱུ་ཧ་ཅང་གལ་ཆེན་པོ་རེད། ཕན་སེམས་ཡག་པོ་ཞིག་བསྐྱེད་ཐུབ་ན། འཇིགས་སྣང་དང་དོགས་པ་རྣམ་རྟོག་ཉུང་དུ་འགྲོ་གི་རེད། རང་ཉིད་བདེ་བ་འདོད་པ་བཞིན་གཞན་ཡང་དེ་ལྟར་རེད་སྙམས་ཏེ་ལྷག་བསམ་རྣམ་དག་ཐོག་གཞན་ཕན་གྱི་བློ་ཞིག་བསྐྱེད་ཐུབ་ན། འཇིགས་སྣང་སོགས་རང་བཞིན་གྱིས་འགག་འགྲོ་གི་ཡོད། དེར་བརྟེན་རང་ཉིད་ཡིན་ཡང་སེམས་པ་དང་སྐྱིད་ལུས་བདེ་བ་ཡོང་རྒྱུ་ཙམ་མ་ཟད། གཟུགས་པོའི་འཕྲོད་བསྟེན་ལ་ཡང་ཧ་ཅང་ཕན་གྱི་རེད། སེམས་ལ་དངངས་སྐྲག་བྱས་ནས་བསྡད་ན་ལུས་པོའི་འཕྲོད་བསྟེན་ལ་གནོད་ཀྱི་ཡོད། གཞན་ཕན་གྱི་བསམ་པ་བསྒོམ་ན་རང་དོན་ཡིན་ཡང་ཞོར་དུ་སྒྲུབ་ཀྱི་རེད། མཐར་ཐུག་སྐྱོན་ཀུན་གསལ་དང་ཡོན་ཏན་ཀུན་ལྡན་དེའི་ཐོག་ནས་ཡོང་གི་ཡོད། དེང་སྐབས་འཛམ་གླིང་འདིའི་ཐོག་དཀའ་རྙོག་མང་ཆེ་བ་བྱམས་པ་དང་ཕན་སེམས་ཀྱིས་ཕོངས་པ་ལས་བྱུང་བ་ཞིག་རེད། བཟང་པོའི་བློ་བསྐྱེད་རྒྱུའི་ནུས་པ་ང་ཚོ་ཚང་མར་ཡོད། དཔེར་ན། ཚོགས་ཁང་འདིའི་ནང་ཡོད་པའི་མི་དེ་དག་ནང་ཆུང་དུས་ནས་བྱམས་བརྩེ་ལྡན་པའི་ཁྱིམ་ཚང་དུ་འཚར་ལོངས་བྱུང་བ་ཞིག་ཡིན་ན་སེམས་སྐྱིད་པ་དང་བྱམས་སེམས་ཆེ་བ་ཏན་ཏན་ཡོད། དེ་བཞིན་ཚོགས་ཁང་འདིའི་ནང་ཡོད་པའི་མིའི་ཁྲོད་རྒྱུ་དཔལ་འབྱོར་དང་ཤེས་ཡོན་ག་ཚོད་ཡོད་ཀྱང་དོན་དམ་ཆུང་དུས་ནས་ཨ་མའི་བྱམས་སྐྱོང་སོགས་མེད་པའི་ཐོག་ནས་འཚར་ལོངས་བྱུང་བ་ཞིག་ཡིན་ན།
རང་བཞིན་གྱིས་སེམས་མ་སྐྱིད་པ་དང་ཁེར་རྐྱང་གི་བསམ་བློ་ཤུགས་ཆེ་བ་ཕལ་ཆེར་ཡོད། དེར་བརྟེན་ང་ཚོས་བྱམས་བརྩེའི་བློར་གོམས་འདྲིས་ཡོང་ཐབས་བྱ་རྒྱུར་དོ་སྣང་ཆེ་ཙམ་སྤྲོད་དགོས། དཔེར་ན། སྤྱི་ཚོགས་ནང་དཔལ་འབྱོར་དང་སློབ་སྦྱོང་ག་ཚོད་ཡོད་ཀྱང་སེམས་གཞན་དབང་དུ་ཕྱིན་པའི་རྐྱེན་གྱིས་སྤྱི་ཚོགས་ནང་རྙོག་གྲ་བཟོ་རྒྱུ་དེ་འདྲ་ཡོང་གི་ཡོད། དེར་བརྟེན་ཆུང་བྱིས་པའི་དུས་ནས་ཕྲུ་གུའི་བསམ་བློའི་འདུ་ཤེས་འཛིན་སྟངས་ཐོག་ཕ་མས་བུ་ཕྲུག་ཚོ་བྱམས་བརྩེས་བསྐྱང་སྟེ་མ་འོངས་པར་བུ་ཕྲུག་དེ་དག་མི་བཟང་པོ་ཞིག་ཡོང་ཐབས་འབད་བརྩོན་བྱེད་དགོས། ཞེས་སོགས་ཀྱི་བཀའ་སློབ་སྩལ་ཡོད་པ་བཅས། །
