༢༠༡༢ ཟླ་ ༣ ཚེས་ ༡ རེས་གཟའ་ཕུར་བུ།
༄༅། །སུད་སིའི་གྲོང་ཁྱེར་འཇི་ནི་ཝར་འཚོགས་བཞིན་པའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཆེས་མཐོའི་ལྷན་ཚོགས་ཐེངས་ ༡༩ པའི་དུས་སྐབས་དང་སྟབས་བསྟུན་རྒྱལ་ཚོགས་ནས་བོད་ནང་གི་བོད་མི་རྣམས་ལ་རྒྱ་ནག་གཞུང་ནས་རྩ་ཁྲིམས་ནང་གསལ་ལྟར་གྲངས་ཉུང་མི་རིགས་ཤིག་གི་ཐོབ་ཐང་ཁག་ཐོབ་ཀྱི་མེད་པའི་མི་རིགས་དབྱེ་འབྱེད་སོགས་ཀྱི་དཀའ་ངལ་འཕྲད་བཞིན་པ་དང་འབྲེལ་བའི་བསྒྲགས་གཏམ་ཞིག་སྤེལ་ཏེ་རྒྱ་གཞུང་ལ་སྐྱོན་བརྗོད་གནང་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ནས་སྤེལ་བའི་བསྒྲགས་གཏམ་ནང་འཁོད་དོན། རྒྱ་ནག་གཞུང་ནས་བོད་ནང་གི་བོད་མི་ཚོར་དམ་བསྒྲགས་ཅན་གྱི་སྲིད་བྱུས་ལག་བསྟར་བྱས་དང་བྱེད་མུས་ཡིན་པ་མ་ཟད། བོད་མི་རྣམས་རྒྱ་མི་རིགས་ལས་ལོགས་ཏུ་དབྱེ་བ་ཕྱེ་ནས་མི་རིགས་དྲང་མཉམ་གྱི་ཐོབ་ཐང་ཁག་སྤྲོད་ཀྱི་མེད་པར། མི་རིགས་དབྱེ་འབྱེད་བྱས་ཏེ་བོད་མིར་མཐོང་ཆུང་བྱེད་ཀྱི་ཡོད། བོད་མིའི་ཆོས་ཕྱོགས་ཀྱི་བྱེད་སྒོ་ཁག་ལ་དམ་བསྒྲགས་བྱས་ཏེ་ཆོས་དད་རང་དབང་སྤྲོད་ཀྱི་མེད། དེ་བཞིན་སློབ་གྲྭའི་ནང་བོད་སྐད་མེད་པ་བཟོས་ཏེ་རྒྱ་སྐད་ཁོ་ནའི་ལམ་ནས་སློབ་ཁྲིད་ལག་བསྟར་བྱེད་ཀྱི་ཡོད། རྒྱ་ནག་གཞུང་ནས་རྩ་ཁྲིམས་ནང་གསལ་བོད་ནང་གྲངས་ཉུང་མི་རིགས་ཀྱི་ཐོབ་ཐང་ཁག་སྤྲོད་ཀྱི་མེད་པའི་ཐོག་དམ་བསྒྲགས་ཅན་གྱི་སྲིད་བྱུས་ཁག་ལག་བསྟར་བྱས་དང་བྱེད་མུས་རེད། དེར་བརྟེན་བྱ་སྤྱོད་དེ་དག་ལ་ང་ཚོ་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ནས་སྐྱོན་བརྗོད་བྱ་རྒྱུ་ཡིན་ཞེས་འཁོད་འདུག
ལྷག་པར་ཕྱི་ལོ་ ༢༠༡༢ ཟླ་ ༢ ཚེས་ ༢༧ འགོ་འཛུགས་ཟླ་བ་གཅིག་མིན་ཙམ་འཚོགས་བཞིན་པའི་ལྷན་ཚོགས་དེའི་ཁྲོད་རྒྱལ་ཚོགས་ཀྱི་སྐུ་ཚབ་ཡོངས་ལ་བསྒྲགས་གཏམ་དེ་ཕུལ་ནས་ཚོགས་འདུའི་བརྒྱུད་རིམ་ནང་དེ་དོན་གསལ་བསྒྲགས་ཀྱང་གནང་གི་ཡོད་པ་བཅས། །