༢༠༡༢ ཟླ་ ༡ ཚེས་ ༡༧ རེས་གཟའ་མིག་དམར།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་གིས་ཕྱི་ལོ་ ༢༠༡༢ ཟླ་ ༡ ཚེས་ ༡༧ ཉིན་བཏང་གནས་ནང་འཁོད་དོན། ཕྱི་ཟླ་ ༡ ཚེས་ ༡༥ ཉིན་ཀྲུང་ཧྭ་ཨེ་ཤི་ཡ་ཕུལ་བྱུང་འབྲེལ་ལམ་མཐུན་ཚོགས་ནས་གོ་སྒྲིག་གནང་བའི་ཐེ་ཝན་གྱི་འོས་བསྡུའི་མཇུག་འབྲས་དང་རྒྱ་ནག་མང་གཙོ་ཅན་དུ་གྱུར་བའི་མདུན་ལྗོངས།  ཞེས་པའི་བགྲོ་གླེང་ཚོགས་འདུ་ཞིག་ཚོགས་ཡོད་པ་དང། བགྲོ་གླེང་ཚོགས་འདུའི་ཐོག་ཐེ་ཝན་བོད་ཀྱི་སྐུ་ཚབ་དོན་ཁང་གི་ལས་བྱེད་བསོད་ནམས་རྡོ་རྗེ་ལགས་ཆེད་བཅར་གྱིས་ཚོགས་ཐོག་ཏུ་རྒྱ་ནག་མང་གཙོ་ཅན་དུ་འགྱུར་རྒྱུ་ཕྱི་ནང་གང་ནས་བལྟས་ཀྱང་གལ་ཆེ་ཡིན་སྐོར་ཐེ་ཝན་དང་། བོད། རྒྱ་ནག་སྐམ་སའི་གནས་སྟངས་དཔེ་མཚོན་དྲངས་ཏེ་གཏམ་བཤད་སྤེལ་ཡོད། ཉིན་གཅིག་གི་ཚོགས་འདུའི་སྐབས་དེར་ཐེ་ཝན་གྱི་འོས་བསྡུའི་སྐོར་དང་། རྒྱ་ནག་མང་གཙོ་ཅན་ཏུ་འགྱུར་རྒྱུ། བོད་ཀྱི་གནད་དོན་ཐག་གཅོད་དགོས་སྐོར་སོགས་ཀྱི་བརྗོད་གཞི་འདྲ་མིན་ཐད་ཕན་ཚུན་བགྲོ་གླེང་ལྷུག་པོ་གནང་ཡོད་པ་མ་ཟད། ཚོགས་བཅར་བ་ཡོངས་ཀྱིས་བགྲོ་གླེང་གཏམ་བཤད་དྲ་རྒྱའི་བརྒྱུད་རྒྱ་ནག་སྐམ་སའི་ནང་ཐད་གཏོང་གནང་ཐུབ་པ་བྱུང་ཡོད།
གཞན་ཡང་ཧོང་ཀོང་དུ་རྟེན་གཞི་བྱས་པའི་གཡུལ་ས་དང་མི་མང་གི་ནུས་ཤུགས།  ཞེས་པའི་ཚོགས་མི་གྲངས་བཅུ་བདུན་ཉེ་ཆར་ཐེ་ཝན་གྱི་འོས་བསྡུ་ཆེན་མོའི་སྐོར་ལ་གཟིགས་ཞིབ་ཕེབས་ཞོར་དུ། ཕྱི་ཚེས་ ༡༦ སྔ་དྲོ་ཆུ་ཚོད་ ༤ རིང་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་གི་མཆོད་ཁང་ནང་མཉམ་འཛོམས་ཐོག་བོད་དོན་སྐོར་བགྲོ་གླེང་ལྷུག་པོ་གནང་སྐབས་ཐོག་མར་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་ཐེ་ཝན་ནང་གི་བོད་མིའི་སྐོར་དང་། བོད་ནང་གི་བོད་མིའི་དཀའ་སྡུག བཙན་བྱོལ་ནང་བོད་མི་སྐྱབས་བཅོལ་བ་ཚོས་མི་ལོ་ལྔ་བཅུ་ལྷག་གི་རིང་ཆོས་དང་རིག་གཞུང་སྲུང་སྐྱོབ། མང་གཙོའི་འཕེལ་རིམ། དབུ་མའི་ལམ་གྱི་དགོངས་གཞི་སོགས་ངོ་སྤྲོད་ཞིབ་ཕྲ་གནང་ཞིང་། ཚོགས་བཅར་བས་བོད་ཕྱི་ནང་གཉིས་ཀྱི་སྐོར་ལ་དྲི་བ་མང་པོ་བཏོན་པ་དང་། ཚོགས་མི་ཁག་གཅིག་གིས་རྒྱ་ནག་གཞུང་འབྲེལ་གྱི་བཤད་སྟངས་ལྟར་དོགས་འདྲི་གནང་བར་ལན་འདེབས་གསལ་བཤད་གནང་བ་བརྒྱུད། ཚོགས་ཞུགས་བ་རྣམས་ལ་བོད་ཀྱི་གནད་དོན་མ་ཤེས་པ་དང་། མ་ཐོས་པ་མང་པོ་ཞིག་ཤེས་རྟོགས་བྱུང་པའི་ཐོག་དོན་གཅོད་ལས་ཁུངས་ནས་ཚོགས་མི་རྣམས་ལ་དབུ་མའི་ལམ་གྱི་ངོ་སྤྲོད་དང་། རྒྱལ་སྤྱིའི་ཁྲིམས་དོན་མཁས་པས་བྲིས་པའི་བོད་ཀྱི་གནས་བབ། དོན་གཅོད་ལས་ཁུངས་ནས་བཟོ་བསྐྲུན་ཞུས་པའི་ལོ་ངོ་ལྔ་བཅུ་བཙན་བྱོལ་དུ་འདས་པའི་བོད་མིའི་སྐྱིད་སྡུག   ཅེས་པའི་གློག་བརྙན་དང་བརྙན་དེབ་སོགས་ཕྱག་རྟགས་སུ་ཕུལ་ནས་བོད་ཕྱི་ནང་གཉིས་ཀྱི་གནས་སྟངས་སྔར་བས་ཤེས་རྟོགས་ཡོང་བ་ཞུས་པ་བཅས།།