༢༠༡༡ ཟླ་ ༡༢ ཚེས་ ༡༥ རེས་གཟའ་ཕུར་བུ།
༄༅། །གཞུང་ཞབས་པ་བགྲེས་ཡོལ་ཀུན་གླིང་བསྟན་པ་བཟོད་པ་ལགས་བར་ལམ་ནས་ཕོ་སྐྲན་ལྟ་བུའི་སྙུན་གཞི་ཕོག་སྟེ་ལྡི་ལིར་ཡོད་པའི་གངྒ་རམ་སྨན་ཁང་ཆེན་མོར་སྨན་བཅོས་སུ་ཕེབས་ཏེ་ཉིན་ཤས་སྔོན་སྨན་པས་གཤག་ལས་སྨན་བཅོས་གང་གཟབ་བྱས་ཀྱང་ནད་གཞི་གཞན་དང་འདོམས་པ་ལྟ་བུས་དྲག་སྐྱེད་མ་བྱུང་བར་ཕྱི་ལོ་ ༢༠༡༡ ཟླ་ ༡༢ ཚེས་ ༡༣ ཉིན་གྱི་སྔ་དྲོ་ཆུ་ཚོད་ ༥ ཡོལ་ཙམ་ལ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་འདུག
དམ་པ་ཁོང་ནི་ཕྱི་ལོ་ ༡༩༣༣ ལོར་སྟག་རྩེ་རྫོང་ཁོངས་ཕག་མོ་ཞོལ་སྒེར་སྒུར་མ་ཁང་གསར་ཞེས་པའི་ཁྱིམ་དུ་འཁྲུངས། ལོ་ན་སོན་པ་དང་བོད་ཡིག་སློབ་གྲྭ་དང་དེ་ནས་གྲྭ་འཕྱགས་ཁོངས་གཞུང་གཉེར་རྩེ་སློབ་གྲྭར་ཞུགས། རང་ལོ་ ༡༩ སོན་སྐབས་བོད་གཞུང་དགའ་ལྡན་ཕོ་བྲང་པ་ཆེན་པོའི་གཞུང་ཞབས་རྩེ་དྲུང་ཞུས་ཏེ་ཐོག་མར་འབབ་ཞིབ་ལས་བྱ་དང་། བཀའ་ཤག་གིས་བཀའ་འབྲེལ་ལྟར་ཤར་ཕྱོགས་ལམ་བཟོའི་ཕོགས་རྒྱག་༸གོང་ས་མཆོག་རྒྱ་ནག་ཏུ་ཆིབས་སྒྱུར་སྐབས་ཕེབས་ལས་སུ་བཅར། ཕྱོགས་མཚུངས་ལེགས་བཅོས་སྤྱི་ཚོགས་ཀྱི་ལས་བྱ། ༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་དུ་གནས་གཟིགས་སུ་ཆིབས་སྒྱུར་བསྐྱངས་སྐབས་ཕེབས་སྒྲིག་ལས་བྱའི་ཞབས་ཞུ་སོགས་དང་། རྒྱ་ནག་གཞུང་གིས་བོད་ས་བཙན་འཛུལ་མ་བྱས་བར་ཞབས་ཞུ་སྣ་ཚོགས་ཞུས་མྱོང་ཡོད་མཁན་རེད། དེ་བཞིན་༸གོང་ས་མཆོག་རྒྱ་ནག་པེ་ཅིང་ཏུ་ཆིབས་སྒྱུར་བསྐྱངས་སྐབས་ཕེབས་སྒྲིག་དོ་དམ་པའི་ལས་བྱའི་ཐོག་ནས་རྒྱ་ནག་ཏུ་ཆིབས་ཞབས་ཁོངས་སུ་བཅར། ཕྱི་ལོ་ ༡༩༥༩ ལོའི་ཟླ་ ༣ ས་ཕག་ལོར་རྒྱ་དམར་ཕྱོགས་ནས་༸གོང་ས་མཆོག་གི་སྐུ་ཕྱྭར་བསྡོ་བའི་ཛ་དྲག་གི་གནས་ཚུལ་བྱུང་སྐབས་ཕོ་བྲང་གི་ལྕགས་རི་སེར་པོའི་སྒོ་སྲུང་གི་ལས་འགན་དང་། སྐབས་དེའི་ཆབ་སྲིད་ཀྱི་ཚོགས་འདུ་ཁག་ཏུ་ཧུར་བརྩོན་ཆེན་པོས་ཞུགས། ཕྱི་ཟླ་ ༣ ཚེས་ ༡༧ མཚན་མོ་༸གོང་ས་མཆོག་སྟོན་འཁོར་ནོར་གླིང་ཕོ་བྲང་ནས་ཆིབས་སྒྱུར་བསྐྱངས་སྐབས་ཆིབས་ཞབས་བཀའ་ཤག་སོགས་ཀྱི་ཆིབས་རྟ་གྲ་སྒྲིག་ལས་འགན་འཐུས་ཚང་ཞུས་ནས་ཕེབས་རྗེས་སུ་ར་མ་གྲུ་ཁ་ཐོན་ཏེ་སྣེའུ་རྫོང་དུ་སླེབས་སྐབས། ཁོང་གི་ཤག་ཚང་དགེ་རྒན་ཀུན་གླིང་ཛ་སག་འོད་ཟེར་རྒྱལ་མཚན་མཆོག་གིས་༸གོང་ས་༸སྐྱབས་མགོན་པོ་མཆོག་གི་བཀའ་ཡིག་གལ་ཆེ་ཞིག་ནོར་གླིང་ཕོ་བྲང་དུ་ཡོད་པའི་དམག་དཔོན་བཀའ་བཀོད་ཁང་ལ་འབུལ་བར་འགྲོ་དགོས་ཞེས་གསུངས་པ་ལྟར་ཉེན་ཁར་མ་འཛེམས་པར་ནོར་གླིང་ཕོ་བྲང་དུ་ཕྱིར་ལོག་གིས་མདའ་འབེན་ཐོག་འཁྱོལ་བ་ཞུས། དེ་ནས་དམག་འཁྲུག་དངོས་སུ་ལངས་ཏེ་རྨས་སྐྱོན་ཕོག་སྟེ་ཕྱི་ལོ་ ༡༩༥༩ ལོར་རྒྱ་མིའི་བཙོན་འོག་ཚུད་དེ་རྒྱ་ནག་ཅེའུ་ཇན་ཞེས་པའི་ས་ཁུལ་དུ་ངལ་རྩོལ་བསྒྱུར་བཀོད་དུ་བཏང་བ་མ་ཟད། དུས་བཀག་བཙོན་འཇུག་མི་ལོ་ ༢༠ ཉེས་ཆད་བཏང་། ཕྱི་ལོ་ ༡༩༧༩ ལོར་བཙོན་བཀྲོལ་ཐོབ་རྗེས་ཕྱི་ལོ་ ༡༩༨༠ ལོར་བོད་གཞིས་བྱེས་གཉེན་འཕྲད་ཀྱི་གོ་སྐབས་དང་བསྟུན་ནས་རྒྱ་གར་དུ་ཕེབས་ཏེ་༸གོང་ས་མཆོག་གི་དགྱེས་མཇལ་ཐོབ། ཕྱི་ལོ་ ༡༩༨༡  ཟླ་ ༦ ཚེས་ ༡ ནས་བདེ་སྲུང་ལས་ཁུངས་སུ་རྒན་དྲུང་གནས་རིམ་ཐོག་ཞབས་ཕྱི་ཞུས་ཡོད་ལ་ཕྱི་ལོ་ ༡༩༨༩ ལོར་གནས་བདུན་པར་གནས་སྤར་གྱིས་མོན་གྷོ་འདོད་རྒུ་གླིང་གི་གཞིས་འགོར་གནས་སྤོས་རྗེས་བགྲེས་ཡོལ་འཕར་འགྱངས་གནང་རྗེས་དྲུང་ཆེ་གཞོན་པའི་གནས་རིམ་ཐོག་ཞབས་ཕྱི་ཞུས་ཡོད། དེ་ནས་ནང་སྲིད་ལས་ཁུངས་སུ་གནས་སྤོས་ཀྱིས་ཁྱོན་མི་ལོ་བཅུ་བཞིའི་རིང་བཀོད་སྒྲིག་ལམ་སྟོན་གཞི་བཟུང་ཕྱི་ལོ་ ༡༩༩༥ ལོར་བགྲེས་ཡོལ་བཀའ་འཁྲོལ་སྩལ་ཐོབ་མ་བྱུང་བར་གཞུང་མང་སྲི་ཞུའི་ཞབས་འདེགས་ཞུ་སྒོ་གང་ཅིར་ལྷག་བསམ་དོ་ཁུར་ཆེ་བསྐྱེད་ཞུས་ཡོད། དེ་རྗེས་སྐུ་ངོ་དམ་པ་ཁོང་གིས་མུ་མཐུད་དཔལ་ལྡན་༸སྐུ་སྒེར་ཡིག་ཚང་ནང་ཞབས་ཞུར་བཅར་ཏེ་ད་བར་ཞབས་ཞུ་ལྷག་བློ་ཆེན་པོས་ཞུས་གནང་ཡོད་པ་བཅས་ཚེ་འདས་དམ་པ་དེ་ཉིད་ཀྱི་མི་ཚེ་གང་པོ་བོད་བསྟན་སྲིད་ཀྱི་དོན་དུ་ཞབས་འདེགས་ཧུར་ཐག་ཞུ་མཁན་ལྷག་བསམ་དང་སྙིང་སྟོབས་ཞུམ་པ་མེད་པའི་བོད་དོན་གྱི་འཐབ་རྩོད་པ་རྒན་གྲས་ཤིག་མེད་པར་གྱུར་བར་བརྟེན། དམ་པ་དེ་ཉིད་ཀྱིས་ཚེ་རབས་འཁོར་བར་བྱས་བསགས་སྡིག་སྒྲིབ་བག་ཆགས་ཐམས་བཅད་བྱང་ཞིང་དག་ནས་དད་ལྡན་རིམ་བརྒྱུད་སྐུ་བཞིའི་ཡེ་ཤེས་ལྔ་ལྡན་གྱི་གོ་འཕང་ཐོབ་པའི་སྨོན་ལམ་ཞུ་རྒྱུ་དང་།  ཤུལ་ལུས་སྤུན་མཆེད་སོགས་ལ་སེམས་གསོ་ཞུ་བཞིན་ཡོད།
མདོར་ན། ༸གོང་ས་༸སྐྱབས་མགོན་ཆེན་པོ་མཆོག་གིས། །གངས་ཅན་ཞིང་གི་ཆོས་སྲིད་བྱ་བའི་གདུགས། །འདེགས་པའི་སྲི་ཞུར་གཏོགས་པའི་སྐྱེ་བོ་ཀུན། །ལྷག་བསམ་རྣམ་དཔྱོད་དཔུང་པ་རབ་བརྟན་ཅིང། །སྐྱེ་ཀུན་ཕྱག་ན་པདྨོས་རྗེས་གཟུང་ཤོག །ཅེས་སྔོན་ནས་ཐུགས་སྨོན་མཛད་པ་དེ་དེ་བཞིན་དུ་འགྲུབ་པར་འགྱུར་ཅིག །