༢༠༡༡ ཟླ་ ༡༢ ཚེས་ ༡༢ རེས་གཟའ་ཟླ་བ།

༄༅། །ཕྱི་ལོ་ ༢༠༠༨ ལོར་བོད་ནང་དུ་ས་བྱི་ཞི་རྒོལ་ཆེན་མོའི་སྐབས་མཉམ་ཞུགས་བྱས་པའི་དོག་གཞི་ཅན་གྱི་བོད་མི་ཁག་གཅིག་རྒྱ་ནག་གཞུང་གི་དམག་མིས་འཛིན་བཟུང་བཙན་ཁྲིད་བྱེད་བཞིན་པའི་གློག་བརྙན་ཞིག་ཕྱི་གྱར་བྱུང་ཡོད། ཕྱི་དྲིལ་ལས་ཁུངས་སུ་འབྲེལ་ཡོད་ནས་བཏང་འབྱོར་བྱུང་བའི་གློག་བརྙན་འདིའི་ནང་བོད་ཀྱི་རྒྱལ་ས་ལྷ་ས་གྲོང་ཁྱེར་སྤྱི་བདེ་ཚན་པའི་ཁྱབ་ཁོངས་ཀྱི་སྡེ་ཚན་ཁག་གཅིག་སྟེ། དྲག་ཆས་ཉེན་རྟོག་དམག་མི་དང། ཉེན་རྟོག་རུ་ཆེན། སྤྱི་བདེ་ཉེན་རྟོག་པ། དམིགས་བསལ་དྲག་ཆས་ཉེན་རྟོག་པ།  (SWAT) མཐའ་མཚམས་སྲུང་དམག་སོགས་ཚན་པ་ཁག་ལྔ་ཙམ་ལས་གྲུབ་པའི་དྲག་ཆས་གྱོན་པའི་དམག་མིས་ལག་ཏུ་མེ་མདའ་དང་ལག་ལྕགས།  གློག་རྒྱུག་སོགས་ཐོགས་ཡོད་པ་མ་ཟད། ཇར་མན་ལུག་རྫི་ཞེས་པའི་ཁྱི་མང་དག་ཅིག་ཁྲིད་དེ་ཕྱི་ལོ་ ༢༠༠༨ ཟླ་ ༣ པའི་མཇུག་བོད་ཀྱི་སེ་ར་དགོན་པའི་ཉེ་འཁྲིས་སུ་ཡོད་པའི་ལྷ་ས་གྲོང་ཁྱེར་ཁྲེང་ཀོན་ཆུས་དོག་སྡེ་ཤང་རུ་ཁག་གཉིས་པ་གཙོ་བོ་གྱུར་བའི་ས་གནས་མང་ཚོགས་ཀྱི་ཁྱིམ་དུ་སྔོག་བཤེར་དང་མི་སྣ་གང་བྱུང་འཛིན་བཟུང་བྱས་ཡོད་འདུག་པ་དང། འཛིན་བཟུང་བྱེད་དགོས་པའི་རྒྱུ་མཚན་གཙོ་བོ་ནི་ཕྱི་ལོ་ ༢༠༠༨ ཟླ་ ༣ ཚེས་ ༡༠ ཉིན་ལྷ་སར་སེར་འབྲས་གཉིས་ཀྱི་དགེ་འདུན་པས་ཞི་བའི་ངོ་རྒོལ་གྱི་ལས་འགུལ་ཐོག་མར་བྱུང་རྗེས་ཕྱི་ཟླ་ ༣ ཚེས་ ༡༡ ཉིན་སེ་རའི་ལམ་སོགས་སུ་སེ་རའི་དགེ་འདུན་པ་དང། ཆུ་བཟང་དགོན་པའི་བཙུན་མ་སོགས་ཀྱིས་ཞི་བའི་སྐད་འབོད་བྱེད་སྐབས་ལམ་བར་དྲག་ཆས་ཉེན་རྟོག་པས་བཀག་འགོག་བྱས་རྗེས་དོག་སྡེ་ཤང་གི་མང་ཚོགས་ཁག་གཅིག་གིས་ཞི་བའི་ངོ་རྒོལ་ནང་མཉམ་ཞུགས་བྱས་པའི་གནས་ཚུལ་ཐོན་ཡོད་འདུག གནས་ཚུལ་དེས་རྐྱེན་པས་ལྷ་ས་གྲོང་ཁྱེར་སྤྱི་བདེ་ཚན་པས་ཉིན་དེ་རང་དུ་འཛིན་བཟུང་བྱེད་མ་ཐུབ་པའི་ས་གནས་མང་ཚོགས་ཁག་གཅིག་ཞིབ་རྩད་བྱས་རྗེས་གློ་བུར་དུ་དྲག་ཤུགས་བེད་སྤྱོད་ཐོག་བོད་མི་རང་ལོ་ ༣༢ ཡིན་པ་ཚེ་རིང་ནོར་བཟང་དང་། རང་ལོ་ ༥༣ ཡིན་པ་བྱམས་པ་རྒྱལ་མཚན། རང་ལོ་ ༢༩ སོན་པ་ཕུར་བུ་དངོས་གྲུབ། དེ་བཞིན་རང་ལོ་ ༤༥ ཡིན་པའི་བུད་མེད་གཅིག རང་ལོ་ ༢༨ སོན་པ་ཉི་མ་ཚེ་རིང། རང་ལོ་ ༣༨ སོན་པ་པ་སངས། རང་ལོ་ ༤༥ སོན་པ་དབང་འདུས། རང་ལོ་ ༢༢ སོན་པ་ཕུར་བུ་བཅས་ཀྱི་ཁྱིམ་དུ་བཙན་འཛུལ་གྱིས་ཁོང་རྣམས་འཛིན་བཟུང་བྱས་ཡོད་པ་མ་ཟད། ཁྱིམ་ཚང་སྔོག་བཤེར་དང་གང་བྱུང་ཉེས་རྡུང་བཏང་བ་སོགས་བྱུང་ཡོད། གློག་བརྙན་དེས་རྒྱ་ནག་གཞུང་ཕྱོགས་ནས་བོད་ལ་དབང་བསྒྱུར་བྱས་པ་དེར་མི་འདོད་པའི་རྣམ་འགྱུར་ཕྲན་བུ་སྟོན་མཁན་ཚོར་ཡང་དམ་བསྒྲགས་ཚབས་ཆེ་ཇི་ལྟར་བྱེད་བཞིན་ཡོད་པ་གསལ་པོར་དངོས་ར་འཕྲོད་ཐུབ་ཡོད་པ་བཅས།