༢༠༡༡ ཟླ་ ༡༢ ཚེས་ ༡༦ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཕྱི་ཟླ་ ༡༢ ཚེས་ ༡ དང་བོད་ཟླ་ ༡༠ ཚེས་ ༧ ནས་ཚེས་ ༡༠ བར་སྔ་འགྱུར་གྲུབ་དབང་རྫོགས་ཆེན་དགོན་དུ་མཧཱ་གུ་རུའི་འབུམ་ཚོགས་ཆེན་མོ་ཚོགས་ཡོད། གུ་རུའི་ཚེས་ ༡༠ ཉིན་རྫོགས་ཆེན་རིན་པོ་ཆེ་མཆོག་དང་གཏེར་སྟོན་བསོད་རྒྱལ་རིན་པོ་ཆེ་རྣམ་གཉིས་དབུ་བཞུགས་ཐོག་དགོན་སྡེ་བརྒྱད་ཀྱི་གྲྭ་བཙུན་རྣམ་པ་དང༌། གྲོང་སྡེ་ཉེར་གཉིས་ཀྱི་སྔགས་འཆང་སོགས་འདུ་བ་གང་མང་ཚོགས་ཞུགས་གནང༌ཡོད། གཞན་ཡང་དེ་ཉིན་ས་གནས་འགོ་འཛིན་ཀརྨ་སེང་གེ་ལགས་ཀྱིས་གཙོས་ས་གནས་འཐུས་ཚོགས་ཀྱི་ཚོགས་གཙོ་དང། མཉམ་འབྲེལ་ཚོགས་གཙོ། རང་བདེན་ཚོགས་ཆུང་གི་ཚོགས་གཙོ་སོགས་ཀྱང་མཉམ་ཞུགས་གནང་ཡོད། ལོ་ལྟར་ཀོ་ལེ་གྷལ་སྔ་འགྱུར་གྲུབ་དབང་རྫོགས་ཆེན་དགོན་དུ་བོད་སྤྱི་པའི་བསོད་ནམས་གོང་སྤེལ་དང༌། ཁྱད་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་བསྟན་འཛིན་གྱི་སྐྱེས་བུ་དམ་པ་རྣམས་སྐུ་ཚེ་བརྟན་ཅིང་མཛད་འཕྲིན་རྒྱས་པ། གཞིས་བྱེས་མཉམ་འཛོམས་ཀྱི་དགའ་སྟོན་མྱུར་དུ་ལོངས་སུ་སྤྱོད་ཐུབ་སླད་མཧཱ་གུ་རུའི་འབུམ་ཚོགས་སྨོན་ལམ་འཚོགས་བཞིན་ཡོད་པ་བཅས།།
