༢༠༡༡ ཟླ་ ༡༢ ཚེས་ ༡༥ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༡༢ ཚེས་ ༡༢ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཡུ་རོབ་ཅེཀ་སྤྱི་མཐུན་རྒྱལ་ཁབ་ཏུ་མཛད་འཕྲིན་རྒྱ་ཆེ་བསྐྱངས་སྐབས་དང་བསྟུན། མགོན་པོ་གང་ཉིད་མཆོག་གིས་སྦེལ་ཇམ་རྒྱལ་ས་བྷར་སིལ་དུ་རྟེན་གཞི་བྱས་པའི་ཡུ་རོབ་སྤྱི་མཐུན་རྒྱལ་ཁབ་ཀྱི་ཕྱི་འབྲེལ་ལས་དོན་ཚན་པའི་འགན་འཛིན་ལྕམ་ཀེ་ཐེ་ར་ཡིན་ཨ་ཤི་ཊོན་(Catherine Ashton)མཆོག་ལ་འབོད་སྐུལ་མཛད་པའི་ཕྱག་བྲིས་ཤིག་སྩལ་བའི་ནང་འཁོད་དོན། བོད་ནང་གི་གནས་སྟངས་ཧ་ཅང་ཛ་དྲག་པོ་ཞིག་ཆགས་ཡོད་པར་བརྟེན། རྒྱལ་སྤྱིའི་སྒྲིག་འཛུགས་ཀྱིས་དངོས་ཡོད་གནས་སྟངས་རྟོག་ཞིབ་ཆེད་བོད་ནང་སྐུ་ཚབ་གཏོང་རྒྱུ་ཧ་ཅང་གལ་ཆེན་པོ་ཆགས་ཡོད། དེ་ལྟར་བྱེད་ཐུབ་ཚེ་རྒྱ་ནག་གཞུང་གི་དཔོན་རིགས་ཚོས་ཕྲན་བུ་འཛེམས་ཟོན་བྱ་རྒྱུར་ཕན་ངེས་ཡིན།
གལ་ཏེ་རྒྱ་ནག་གཞུང་ཕྱོགས་ནས་འབོད་སྐུལ་དེར་དང་ལེན་མ་བྱས་ཚེ་ཡུ་རོབ་སྤྱི་མཐུན་ཚོགས་པས་སེམས་འཚབ་ཆེན་པོའི་ཐོག་ནས་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་སོགས་རྒྱལ་སྤྱིའི་སྒྲིག་འཛུགས་ཀྱི་གླེང་སྟེགས་ཐོག་གླེང་སློང་བྱས་ཆོག རྒྱ་གཞུང་ལ་སྟོབས་ཤུགས་ལྡན་ཡང་གོ་ལའི་ཆ་ཤས་ཤིག་ཡིན་སྟབས་དེང་སྐབས་འཛམ་གླིང་རྒྱ་ཁྱབ་ཏུ་དར་འཕེལ་འགྲོ་བཞིན་པའི་མང་གཙོ་དང་རང་དབང་གི་ལམ་བུ་དེ་ནས་གཡོལ་ཐབས་མེད། རྒྱ་ནག་གིས་འཛམ་གླིང་ནང་འགོ་ཁྲིད་ཐུབ་པའི་བསམ་བློ་དེ་དོན་འཁྱོལ་ཡོང་བར་རྒྱལ་སྤྱིའི་མདུན་དུ་མཐོང་སྣང་དེ་ཧ་ཅང་གལ་ཆེན་པོ་ཆགས་ཡོད་ཅེས་འཁོད་ཡོད། འོན་ཀྱང་དེ་ཉིན་ཀྲུའུ་ཝེ་ཆུན་(Zhu Weiqun)སྦེལ་ཇམ་གྱི་རྒྱལ་ས་བྷར་སེལ་དུ་ཡོད་པར་བརྟེན་གསར་འགོད་པ་ཚོར་རྒྱ་ནག་དེ་བཞིན་མངའ་དབང་ལྡན་པའི་རང་བཙན་གཙང་མའི་རྒྱལ་ཁབ་གཅིག་ཡིན་པར་བརྟེན། དཀའ་ངལ་རྣམས་རྒྱལ་ནང་དུ་སེལ་རྒྱུའི་ནུས་པ་ཆ་ཚང་ཡོད། གནས་སྟངས་ཇི་འདྲ་ཞིག་གི་འོག་ཏུའང་རྒྱལ་ནང་གི་གནས་སྟངས་ལ་ཕྱི་ནས་ཐེ་བྱུས་བྱེད་རྒྱུར་ངོས་ལེན་རྩ་བ་ནས་མེད་པར་བརྟེན་བོད་རང་སྐྱོང་ལྗོངས་སུ་ཞིབ་འཇུག་ཚོགས་ཆུང་གཏོང་རྒྱུ་ཟེར་བ་དེ་བས་ངོས་ལེན་བྱེད་ཐབས་རྩ་བ་ནས་མེད། བོད་རང་སྐྱོང་ལྗོངས་ནང་གི་གནས་སྟངས་ལ་ཕྱི་ནས་ཐེ་བྱུས་བྱས་ཚེ་བཟང་ཕྱོགས་ཀྱི་གྲུབ་འབྲས་གང་ཡང་ཐོན་རྒྱུ་མེད་ཁར་དཀའ་ངལ་ད་དུང་ཆེ་རུ་འགྲོ་རྒྱུ་མ་ཟད། མཐར་དམག་འཁྲུག་ཀྱང་ཤོར་སྲིད་པའི་ཉེན་བརྡ་ཡང་བཏང་ཡོད། དེ་བཞིན་ཉེ་ལམ་ཡུ་རོབ་གྲོས་ཚོགས་འཐུས་མི་ཁག་གཅིག་གིས་བོད་མིའི་སྒྲིག་འཛུགས་ཀྱི་བཀའ་ཁྲི་བློ་བཟང་སེང་གེ་མཆོག་དང་མཇལ་འཕྲད་གནང་བར་ཡུ་རོབ་སྤྱི་མཐུན་རྒྱལ་ཁབ་ཀྱི་ཕྱི་འབྲེལ་ལས་དོན་ཚན་པའི་འགན་འཛིན་ལྕམ་ཀེ་ཐེ་ར་ཡིན་ཨ་ཤི་ཊོན་མཆོག་གིས་བཀའ་སྐྱོན་གཏོང་དགོས་པ་ཀྲུ་ཝེན་ཆུན་གྱིས་བརྗོད་ཡོད་པ་བཅས།།
༸གོང་ས་མཆོག་གིས་བོད་ནང་སྐུ་ཚབ་གཏོང་ཆེད་ཡུ་རོབ་སྤྱི་མཐུན་ཚོགས་པས་རྒྱ་གཞུང་ལ་འབོད་སྐུལ་མུ་མཐུད་གནང་དགོས་པའི་བཀའ་སློབ་སྩལ་བ།
གསར་གནས།
འབྲེལ་གནས།
