༢༠༡༡ ཟླ་ ༡༡ ཚེས་ ༢ རེས་གཟའ་ལྷག་པ།
༄༅། །དེང་སྐབས་བོད་ནང་རྒྱ་ནག་གཞུང་གི་དྲག་པོའི་སྲིད་བྱུས་ལག་བསྟར་བྱས་དང་བྱེད་མུས་ཡིན་པར་བརྟེན། བོད་མི་རྣམས་འ་ཆད་འུ་ཐུག་གིས་གནས་སུ་གྱུར་ཏེ་རྒྱ་ནག་གཞུང་ལ་བོད་མིས་གཅིག་མཇུག་གཉིས་མཐུད་ཀྱིས་རང་ལུས་མེར་སྲེག་བཏང་སྟེ་རྒྱ་གཞུང་ལ་ངོ་རྒོལ་རབ་དང་རིམ་པ་བྱས་ཡོད།  རྒྱ་ནག་གཞུང་ནས་བོད་མིའི་མངོན་འདོད་བསྒྲུབ་རྒྱུའི་ཚབ་ཏུ་ཉམ་ཆུང་བོད་མིའི་ཐོག་སྔར་ལྷག་དྲག་གནོན་བྱེད་ཤུགས་ཆེ་རུ་བཏང་སྟེ་ད་ལྟའི་ཆར་བོད་ནང་གི་གནས་སྟངས་ཛ་དྲག་ཏུ་གྱུར་ཡོད་སྟབས། ཨོ་སི་ཊོ་ལི་ཡར་རྟེན་གཞི་བྱས་པའི་བོད་དོན་རྒྱབ་སྐྱོར་ཚོགས་པས་ཨོ་སི་ཊོ་ལི་ཡའི་ཕྱི་སྲིད་བློན་ཆེན་མཆོག་ནས་རྒྱ་ནག་གཞུང་ལ་གནོན་ཤུགས་སྤྲོད་དགོས་པའི་འབུལ་སྐུལ་ཞུ་སྐབས། ཁོང་གིས་བོད་ནང་གི་ཛ་དྲག་གནས་སྟངས་ངོས་འཛིན་གྱིས་རྒྱ་ནག་གི་གཞུང་ཚབ་དང་འབྲེལ་ཡོད་དཔོན་རིགས་ཚོར་བོད་ཀྱི་གནད་དོན་ཐོག་གོ་བསྡུར་གནང་ཡོད་སྐོར་གསུངས་འདུག
དེ་ཡང་གནད་དོན་དེའི་སྐོར་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཨོ་སི་ཊོ་ལའི་བོད་དོན་རྒྱབ་སྐྱོར་ཚོགས་པའི་ཉམས་ཞིབ་དང་ཕྱི་དྲིལ་འགན་འཛིན་གྱིས་གསུང་དོན།      ང་ཚོའི་ངོས་ནས་ཨོ་སི་ཊོ་ལི་ཡའི་ཕྱི་སྲིད་བློན་ཆེན་མཆོག་ལ་འབྲེལ་བ་བྱས་དང་བྱེད་མུས་ཡིན། བློན་ཆེན་མཆོག་གིས་མི་མང་ལ་གསལ་བསྒྲགས་གང་ཡང་གནང་མེད། འོན་ཀྱང་ཨོ་སི་ཊོ་ལི་ཡའི་གཞུང་ཕྱོགས་ནས་རྒྱ་ནག་གི་གཞུང་ཚབ་ལ་གནད་དོན་དེའི་སྐོར་སྐད་ཆ་བཤད་སྐོར་ང་ཚོར་ཡི་གེ་འབྱོར་བའི་ནང་འཁོད་དོན།  ཨོ་སི་ཊོ་ལི་ཡའི་གཞུང་ཕྱོགས་ནས་བོད་ནང་གི་གནས་སྟངས་ཛ་དྲག་གི་གནས་སྟངས་ཆགས་པ་ཤེས་ཀྱི་ཡོད། དེར་བརྟེན་བློན་ཆེན་མཆོག་གིས་རྒྱ་ནག་གི་གཞུང་ཚབ་མཉམ་དུ་གནད་དོན་དེའི་སྐོར་ལ་སྐད་ཆ་བཤད་ཡོད་པ་མ་ཟད། དེ་བཞིན་རྒྱ་ནག་པེ་ཅིང་དུ་ཡོད་པའི་ཨོ་སོ་ཊོ་ལི་ཡའི་གཞུང་ཚབ་བརྒྱུད་ནས་རྒྱ་ནག་གཞུང་གི་འབྲེལ་ཡོད་ལས་ཁུངས་ལ་ཡང་སྐད་ཆ་བཤད་ཡོད། ཅེས་འགྲེལ་བརྗོད་གནང་འདུག་པ་བཅས། །