༢༠༡༡ ཟླ་ ༡༡ ཚེས་ ༡ རེས་གཟའ་མིག་དམར།
༄༅། །ཨ་རི་དང་རྒྱ་ནག་སྐམ་ས་ནས་རྒྱ་རིགས་ཤེས་ཡོན་ཅན་དང་རྩོམ་པ་པོ་བཅས་ཁྱོན་མི་གྲངས་ ༢༠༠ ཙམ་གྱིས་བོད་ནང་དང་ལྷག་པར་མདོ་སྨད་རྔ་པའི་ཁུལ་དུ་བོད་མི་ཚོའི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པའི་ཐོག་སེམས་འཚབ་ཀྱིས་གདུང་སེམས་མཉམ་སྐྱེའི་རྒྱབ་སྐྱོར་མཚོན་ཆེད་ས་རྟགས་བསྡུ་རུབ་ཀྱི་ལས་འགུལ་ཞིག་སྤེལ་ཡོད། ལས་འགུལ་སྣེ་ཁྲིད་མཁན་གཙོ་བོ་ནི་ཨ་རིའི་ཧར་ཝ་ཌི་གཙུག་ལག་སློབ་གྲྭའི་སློབ་ཐོན་པ་རྒྱ་རིགས་ཤེས་ཡོན་མི་སྣ་ཡང་ཇན་ལི་(Yang Jianli) ལགས་ཡིན་འདུག
དེ་ཡང་རྒྱ་རིགས་བོད་དོན་ལས་འགུལ་བ་ཚོས་མིང་རྟགས་བཀོད་པའི་ཞུ་སྙན་ཞིག་ཡོད་པ་དེའི་ནང་འཁོད་དོན། རྒྱ་ནག་གཞུང་གིས་ཡུན་རིང་ནས་བོད་ཀྱི་དགོན་སྡེ་ཁག་ལ་དམ་བསྒྲགས་ཀྱི་སྲིད་བྱུས་ལག་བསྟར་བྱེད་བཞིན་པར་བརྟེན་བོད་མིའི་ཆོས་དང་རིག་གཞུང། སྐད་ཡིག་རྣམས་ཉམས་ཆག་ཤུགས་ཆེ་བྱུང་དང་འབྱུང་བཞིན་པའི་རྒྱུ་རྐྱེན་གཙོ་བོ་དེ་ཆགས་ཡོད། རྒྱ་ནག་གཞུང་གི་སྲིད་བྱུས་དེའི་འོག་མང་ཚོགས་དཀྱུས་མ་ཚོའི་ཁྲོད་དུའང་ཉིན་རེའི་འཚོ་བའི་ནང་ཆོས་དང་རིག་གཞུང་གི་བྱེད་སྒོ་ཁག་ཉམས་ལེན་བྱེད་རྒྱུར་དཀའ་ངལ་འཕྲད་བཞིན་ཡོད། རྒྱ་ནག་གཞུང་གིས་བོད་པའི་དགོན་སྡེ་ཁག་གི་ནང་ད་བར་བྱུང་མྱོང་མེད་པའི་དམ་བསྒྲགས་ཀྱི་སྲིད་བྱུས་ལག་བསྟར་བྱས་པ་དེར།  བཟོད་ཐབས་བྲལ་ཏེ་བོད་མི་དགེ་འདུན་པ་གཞོན་སྐྱེས་ཚོས་རང་གི་དཀའ་ངལ་རྣམས་འཛམ་གླིང་ཕྱི་ལ་ཤེས་རྟོགས་ཡོང་ཆེད་རང་ལུས་མེར་སྲེག་བཏང་བའི་འུ་ཐུག་ཐབས་ཟད་ཀྱི་བྱ་སྤྱོད་དེ་རིགས་མ་སྤེལ་ཐབས་མེད་བྱུང་བ་ཡིན་ཞེས་སོགས་འཁོད་ཡོད། ཕྱོགས་མཚུངས་ཕྱི་རྒྱལ་དུ་རྟེན་གཞི་བྱས་པའི་རྒྱ་རིགས་བོད་དོན་རྒྱབ་སྐྱོར་ཚོགས་པ་གསུམ་ཙམ་གྱིས་བསྒྲགས་གཏམ་ཞིག་སྤེལ་ཏེ་རྒྱ་ནག་གཞུང་གིས་བོད་མདོ་སྨད་རྔ་པ་ཀིརྟི་དགོན་པ་གཙོ་བོར་གྱུར་བའི་བོད་ཀྱི་དགོན་སྡེ་ཁག་གི་ནང་འཛིན་བཞིན་པའི་དམ་བསྒྲགས་ཅན་གྱི་སྲིད་བྱུས་དེར་སྐྱོན་བརྗོད་ཤུགས་ཆེ་བྱས་ཡོད། ཚོགས་པ་གསུམ་པོ་ནི་ཇར་མན་དུ་རྟེན་གཞི་བྱས་པའི་རྒྱ་ནག་དམངས་གཙོ་སྤྱི་མཐུན་ཚོགས་པ་དང། ཨ་རིར་རྟེན་གཞི་བྱས་པའི་རྒྱ་ནག་མང་གཙོ་ཚོགས་པ། ཨ་རིར་རྟེན་གཞི་བྱས་པའི་རྒྱ་ནག་སྤྱི་ཚོགས་མང་གཙོ་ཚོགས་པ་བཅས་ཡིན་འདུག ས་རྟགས་བསྡུ་རུབ་ཀྱི་ལས་འགུལ་མཇུག་སྒྲིལ་རྗེས་ལས་འགུལ་བ་རྣམས་ཀྱིས་ས་རྟགས་འཁོད་པའི་ཞུ་སྙན་དེ་བཞིན་མཉམ་འབྲེལ་རྒྱལ་ཚོགས་དང་ཨ་རིའི་སྲིད་གཞུང། དེ་བཞིན་ཡུ་རོབ་སྤྱི་མཐུན་ཚོགས་པ་བཅས་ལ་འབུལ་འཆར་ཡོད་འདུག་པ་བཅས།།